Read Poumei Naga 2 SAMUEL 3 Bible Online

2 SAMUEL 3 - Poumei Naga bible

2 SAMUEL 3

¹Saul kikhamai thaikoyu me alia David ye thaikoyu me tea phateile dousho-a reih züvae. David vei maitao nou khoulailai paloua Saul vei maitao hai lelou holailai tare.

²Nahpoutu arou haitao sü Hebron hinou shosho nou David hi napeie: Amnon, puh vei pfü zhih nou Ahinaom pfüpai Jezreel;

³Rai-a Nabal ki veyu Karmel pfüpai Abigail nou Kileab ye napeie; Geshur hi veo Talmai nahpai Maakah nou Absalom napeie.

⁴Haggith nou Adonijah napeie; Abital nou Shephatiah napeie,

⁵Eglah nou Ithream napeie. Nahpoutu haitao sü Hebron hinou nakhai touloue.

⁶David vei maitao alia Saul vei maitao tea reih züyu phaki Saul vei maitao hrohi Abner hai khouko bulailai pare.

⁷Teitheli Saul nahpoutu Ishbosheth nou Abner pei hi Saul khapfü Aiah nahnaotupai Rizpah ye koa hashi soure tea paodu peire.

⁸Hai vanou Abner hai rarou shore. “Enou Saul hi hashi soushulai tea ne tsüchowu?” tea puhnou shapare. “E shurai khanou nevei puo Saul chi zü-a puh thaifüpae, puh vei thaihou jürai maitao alia puh vei samai khamaitao donou hrüpae, David nou southawure hinou neye Enou vupa peie, sükua buyuma zhou teithe naotumai ali vanou ne avei mah phouwu?

⁹Ramai nou David hisü puhye panou Saul hinou vedei hai poloua puhye panou Israel ae Judah maivei vedei ahai hinou, süsü Dan hinou poa Beersheba koute hai veo soulai tea paopei khaitoue. Hai nasü panou cheche-a vepamoyu thaio, Ramai ye panou ahi sü tatei sho-a veahoyu sü peitheo.”

¹¹Ishbosheth nou Abner chi chouloua chila ali koute-a Abner hi paopi-a baire.

¹²Abner nou kopomaiye David hi seive haibüa paoe, süphaki David hai Hebron hinou bue, “Thaonou dei haina hi veo soulai? Eye koa ae-ao touyu vo ali soupei louzü, Enou Israel mai hrülaiye ne hilao save peilaiyu hisü neye soukha peilai.”

¹³“Veishode! Nenou ahi veyu phaki, Saul nah naotupai Mikhal ye sa-a ahi vepei vuzülai toulouzü, Enou neye koa ae-ao touyu vei vo sü soupeilai,” tea David nou chila peie.

¹⁴Ae David nou kopomaiye seive Ishbosheth hi paoe, “Enou Mikhal ye avei khapfü soure donou puhvei muhma phasoua Philistin mai kaihli vei chepei rodeloua pove peiwure, südonou Mikhal ye sü ahi seive peio.”

¹⁵Ishbosheth nou Mikhal ye puhvei kipuo Laish nahpoutu Paltiel hinou sada khailo tea maiye seive Mikhal ye sü saloure.

¹⁶Mikhal khapu Paltiel nou kra-a nou Bahurim nuh hi koute thaifü poa ve-e, ana Abner nou ne khaita-a baio tea kharochi peikhaie, ae tea khaitare.

¹⁷Abner nou Israel maitao vei süthai-apei maitao hi taho dao-a paoe, “Neletao nou teile soshoa David ye panou neletao vei veo sü sounü-a bure.

¹⁸Chuwo teile kao aveih nasü vere. ‘Enou avei kilai David ye sa-a avei Israel maitaoye ngaoba zhubayu Philistin mai bah hinou alia kukhemai bah hinou vupa loure vah soulai,’ tea MAPAO nou paoyu nasü licholo.”

¹⁹Abner nou taibütou tea Benjamin maitao hi-a paopeiwure, ae süthaisü puletao nou Hebron hi taho Israel mai alia Benjamin maitao-a aetoure touyu chi hai David hi paore donou tare.

²⁰Abner nou mai kai ye sa-a Hebron hi ve David ye daoe alia David nou puletaoye panou khonüh ali hai nüloue.

²¹Abner nou David hi paoe, “E chuwo taho Israel maiye sa-a ne hilao vepeilai. Puletao veo sü nenou soulai alia puletao hinou nenou ngaozü teiteisü ngaolai.” Süthaisü David nou Abner ye lududo kinou rako ashi panou ngaomore donou puhye seitawure.

²²Teile daotu buyu thaisü David vei reihmaitao ae Joab nou reih veilou-a maivei nangi khesü pealou-a kini alao poa nou dakhai vere. Ana süteile kisü Abner hai Hebron hinou David ye ko-a bumore, David nou puhye sü ludu donou rako ashi daomore donou veitoua seitawure.

²³Abner nou ve David ye daowu-a tare touyu ko sü Joab alia reihmaitao nou dakhai veyu phaki puletao hisü paongaore. Sübüa David nou puhye seidakhai tawure tea paongao peie.

²⁴Joab nou veo David hi ve haibüa paoe, “Veo, Abner nou ne hi veyu büa ne daisounou puhye tebüa seidakhai tapeiwe?

²⁵Puhnou hai hi veyu sü neye lalure donou baie, ae ne kakua bue, daiki bue touyu khesü süloure donou ve-a baie touyu sü ne-a süwe!”

²⁶Joab nou David hinou tapa louyu thai, maiye seiho Abner ye sü Sirah touyu Dzükhao hinou salou-a dakhai vere, ana hai sü David nou sükhai moe.

²⁷Abner nou Hebron hi velou chezü, Joab nou puhye sa-a kheichi phalaiyu zhai souloua rokhubomü hilo sa-a loutare, alia puhnou Abner pou hi khoche nou khüpeire. Abner nou puhvei thaihou Asahel ye southayu vei khüngu phouyu phasou-a puh ye southawure.

²⁸David nou ko hai sülouyu kisü puh nou paoe, “MAPAO nou süwe, süolouzü Abner ye southayu hi E alia avei maikhe mai vei mah ali-a hae.

²⁹Haina vanou tukha vere sü Joab pei hi vetheo, alia puh vei kihikhamai pei hi vetheo. Maiphao teitei hinou puhvei kihikhamai hisü loukhaora souyu sü panou bukoute peio, mokhaia naotumai ali bütoua hrütheo, mokhaia mai vei khoche hinou thai theo, mokhaia touha soha nou pa hrütheo.”

³⁰Joab alia Abishai nou puhai vei thaihou Asahel ye Gibeon reih hinou southayu navei khüngu sou-a Abner ye sü southawure.

³¹David nou Joab alia puhvei maitaoye lahkuku vei sabanü paipha-a soukousah nou banoulo ae Abner thaiyu vanou dopfükhaio tea kharochi peie. Ae David veo koute Abner vei thaiphao potayu thailaobü hinou koa thaifü tae.

³²Abner ye sü Hebron hi vuwure, veo David-a khü pehinou rasoua krare alia maisou-a krae.

³³David nou kouli haina hai Abner donou lie: “Daidonou Abner sü avomai ali büa thai-a baire?

³⁴Puh vei bah sü phumoe, Alia puhvei phi sü phu moe; Puhnou thaiyu hai mai ashimai ye southayu büa baie!” Ae maisou nou puhye donou krapure.

³⁵Heamajü David ye panou hatoure donou maikhe mainou teshoe, ana puhnou Ramai zhih hinou chaachou ali soungaore, “E zhou teithe akhai soumo koute ha taralia tousore toulouzü, Ramai ye panou Eye southawo.”

³⁶Veo nou haibüa souyu hai maisou nou ngaolou-a khashore. Cheche vujünou veo nou soupfüyu teitei hisü maisou nou kha-a baie.

³⁷Abner ye southayu hisü David veo loumoe touyu hai puhye koa buyu maitao alia Israel mai hrülai nou sükhai touwe.

³⁸Veo nou puhvei peikho maitao hi paoe, “Zhou teithe Israel mai hrohinou matsü kayu mai ali thaiyu teithe-e touyu neletao sümowu?

³⁹Ramai nou Eye panou veo soure donou dopapeiyu E koute-a zhou teithe hai lülou hore. Zeruiah nahpoutu maitao hai soushilere. Mai ashimai haitao hisü puletao nou ngaozü veahoyu nasü Ramai ye panou peitheo.”