Read Poumei Naga 2 SAMUEL 4 Bible Online

2 SAMUEL 4 - Poumei Naga bible

2 SAMUEL 4

¹Abner ye Hebron hinou southawure touyu ko hai Saul nahpoutu Ishbosheth nou choulou-a ngaopire alia Israel maitao-a le vamo shore.

²Saul nahpoutu vei reihmai peikhoyu mai ahai bue, mai alina zhih sü Bannah alia kukhe alina zhih nou Rekhab toue; puhai sü Beeroth hi buyu Benjamin khü hi Rimmon nahpoutu kheie. (Beeroth hi bumai-a Benjamin khü vei maie tea chowe.

³Beeroth hi bumaitao nou tuve Gittaim hi bure, ae puletao hai chu koute sühinou hrüa bue.)

⁴Saul vei tyaosholea ali sü puh nahpoutu Jonathan nahpoutu Maphibosheth tea nou bue. Nahpoutu hainasü po angou pa-a baihie, Saul alia Jonathan puonah haiye reihbu hinou thaiyu phaki. Puhai vei athai ko hai Jezreel nuhdu hinou chouveyu phaki, nahpoutu ye sa-a kipeiyu naotupai nou puhye sü daopfüloua tutayu phaki, nahye sü phaohinou panou dekou-a puh vei phi deishawua puh sü phi shoyu mai ali sou-a baire.

⁵Rekhab ae Baanah sü Ishbosheth ki hi vere donou tapoa hea touchü hinou puh vei ki hi veteloue. Puhai veyu phaki Ishbosheth hai kikha hinou zhi-a bue.

⁶Kikhu khoyu naotupai sü southou che-a nou bue, ae puhsü zhinü sholou-a zhitare. Südonou Rekhab alia Baanah puhai sü khei kheisou-a kihikha louloure.

⁷Kihikha loulou chezü Ishbosheth zübuh kide nahi takoue alia puh sü zhi-a bue alia sühinou puhye sü southawure. Puhai nou puhvei pei valou-a kheimathe nou Arabah vei ludu hilova nou tare.

⁸Puh vei pei sü poa David nou buyu Hebron hisü vere ae puh hi haibüa paoe, “Neye hraiyu alia neye southawulai tea phouyu Saul veo nahpoutu Ishbosheth vei pei sü hai hi bure. Zhou teithe Ramai MAPAOwo nou neye panou puh vei tyaonah pei hi khüngu phouloure donou aetou peiwure.”

⁹David nou chila peie, “Rako ashi tyatyali hinou Eye khailupa peiyu, hri-a buyu Ramai zhih hinou chaachou ali souwe!

¹⁰Saul vei athai ko sü ko aveih alie tea Enou Ziklag hi buyu phaki, ko süna ahi pove peiyu mainaye sü Enou puhye nüloua southawure. Puhnou ko aveih po-a ve ahi paopeiyu buh sou-a puhye southa peiwure.

¹¹Mahmo ali-a hazei tea lah ki hinou zhi-a buyu mai aliye southayu puh pei hi sü taijünoua kazho koute shipu-a vah souyu phae, chuwo Enou puhvei khüngu phouyu sou-a ne haiye sü deiphao hai hinou souhawulai.”

¹²Reihmaitao hi Rekhab alia Baanah puhaiye phibao dudewua Hebron vei dzükhao pehi pove khizhu khaipeio tea David nou kharochi peie. Puletao nou Ishbosheth peisü polou-a Abner ye daovuyu buh hi vupeiwure.