Read Poumei Naga 2 SAMUEL 8 Bible Online

2 SAMUEL 8 - Poumei Naga bible

2 SAMUEL 8

¹Süthaisü teile somoa nou David veo nou Philistin mai pei hi reih hulou-a Philistin mai jünou reih veilou-a puletaoye tukhapü-a buyu Metheg Ammah sü David veo nou poloure.

²David nou Moab mai jünou-a reih veiloue. Puhnou Moab maiye panou deiphi hi kou dazülou-a mai asü hinou mai ahai ahaiye sü southawua panou mai alikhei hriloua baie. Sütea nou Moab mai panou puh khakhe hinou bua puhye kikha peie.

³Süthaisü Zobah hi veo Rehob nahpoutu Hadadezer nou Euphratis rei reilo vatha buyu teideitao sü poda khailoulai tea ta-a buyu hinou David nou puhye reih soua puh jünou reih veiloue.

⁴David nou puhvei rhei pfüyu reihmai thelia kaihnai ae phinou tayu reihmai thekai hai nüloure alia rheiluki kaihli pfülousüyu rheitao likhei khailou-a kukhe taosü phibao soushi khaiwure.

⁵Damaskas hinou hrüyu Sairia mainou Veo Hadadezer ye soukhare donou veyu phaki David nou puletaoye reih soua mai thekaihai ye southa peie.

⁶David nou puhvei reihmai me ali puletao vei vedei hi khailoure ae puletao hai puhvei khakhe hi bua puh hi kikha sü peie. David nou reih soutayu pfüphou hi Ramai nou puhye kozho peia panou reih veikhai touloue.

⁷Hadadezer vei reihmai peikhoyu maitao nou pfüyu sana vei rütao sü David nou pojülou-a Jerusalem hi pfüve khailoue.

⁸Süthemoa Hadadezer veo nou khasa-a buyu Betah ae Berothai, alia nuhdutao hinou baosahu alao poloue.

⁹David nou Veo Hadadezer jünou reih veiloure she touyu ko hai Hamath hi veo Toi nou süloure.

¹⁰Südonou puhnou puh nahpoutu Joram ye seive David hi reih veilouyu vei savayu chido hai panou pove peire donou seitae, daisounou touyuo süteile hi Hadadezer ae Toi sü reih züva-a bue. Joram nou sana, shahu ae baosahu nou soukhai touyu sapeina taoli hai David ye pfüve peie.

¹¹Tyahrü tyatyalih jünou rei veilou-a polouyu sana, shahu alia baosahu nou souyu natao sü pove David nou Ramai bah hi thaothou peie.

¹²Süolouzü Edom mai, Moab mai, Ammon mai, Philistin mai, Amalek mai alia Zobah hi veo Rehob nahpoutu Hadadezer hinou polouyu natao sü pove peie.

¹³David nou Tai vei Deikho hinou reih zü-a Edom mai thekiacha sü southalou-a dakhai veyu phaki puhvei zhih hai tapu sholoure.

¹⁴David nou Edom maivei teidei hinou puhvei reihmai panou bure vei fühao taoli hai soukhai loure ae Edom maiye panou puhvei khakhe hinou hrüe. Ramai nou puhye buh tyatyalih hinou soureih hai panou veilouyu sü ngaoloue.

¹⁵David nou Israel mai teitei hi veo souloua mai hrülaiye raibütou tea checheyu hinou sa-a hrüpeie.

¹⁶Zeruiah pfüpai nahpoutu Joab nou reihmai peikhowo sü soue; Ahilud nahpoutu Jehoshaphat nou larü rü-apeio sü soue.

¹⁷Ahitub nahpoutu Zadok alia Abiathar nahpoutu Ahimelek nou napao soupeie; Seraiah nou vahbu hi rü-apeio hai soupeie.

¹⁸Jehoiada nahpoutu Benaiah nou David veoye khoyu hi peikhowo sü soue, alia David vei nahpoutu maitao hai napao soue.