Read Poumei Naga 2 SAMUEL 9 Bible Online

2 SAMUEL 9 - Poumei Naga bible

2 SAMUEL 9

¹“Saul kikhamai ali koute-a hri-a buho bumoe?” teanou David nou teitheli noue. “Hakinou mai buhie toulouzü Enou Jonathan ye donou puhye sü zhuvea leshi hai soungao peinüe.”

²Süphaki Saul kikhamai kilai souyu mai ali Ziba tea bue. Puhye David hi kuvelou-a “Ne Ziba touyu navu?” tea Veo David nou noue. “Ouvai, ne kilaio E-e” tea puhnou khüpeie.

³Veo nou paoe, “Saul vei kikhamai ali-a hadou? Hakinou bue toulouzü Enou sünapei hisü raichoki nou paohyu thaifüa zhuvea leshiyu vei vah soupei nüwe.” Ziba nou chila peie, “Jonathan vei nahpoutu ali bue, puh sü phi veimo-a shore.”

⁴“Puh sü daiki bue” tea Veo nou noue. “Puh sü Ammiel nahpoutu Makhir tea kuyu Lodebar puona ki hi bue,” tea Ziba nou chila peie.

⁵Südonou Veo nou puhye ho saloure donou mai seitare.

⁶Mephibosheth, Jonathan nahpoutu alia Saul vei tyao nou veyu phaki, puhnou David ye tsükhou-a nakou khurüloue. David nou paoe, “Mephibosheth, ne pi khaitouso.”

⁷“Ne piso, E ne vei puo Jonathan ye donou Enou neye leshi peilai. Daoh ne paoh Saul teidei teitei sü ne hi lukhai peilai ae neye teisa Enou tousoyu buh hinou koa touso zholai.”

⁸Mephibosheth nou nakou khurü pulou-a paoe, “Aduwo, Esü thaiyu sei ali jünou veipuyu hae, ne daisounou apei hi haizho koute havei soupeilai tiwe?”

⁹Süthai veo nou Saul kilaio Ziba ye kulou-a paoe, “Saul alia puhvei kikhamai vei na veishi sü nevei paopu tyao hi lukhai peikhai toulai.

¹⁰Ne, nevei nahmaitao ae nevei kilai maitao nou nevei paopu Saul vei kikhamai donou tah tapeilai ae puletaoye touso sü peilai, ana Mephibosheth louzü Eye koa avei taibel hinou touso zhokoute-a bailai.” (Ziba hai nahpoutu mai kiangou bue alia kilaimai kai bue.)

¹¹Ziba nou chila peie, “Avei paopu, nenou ne kilai ahi kharochi peiyu veishi sü Enou soupeilai.” Südonou Mephibosheth nou veo vei nahpoutu ali bütoua David veo nou tousoyu buh hinou koa touso zhore.

¹²Mephibosheth vei nahpoutu ali bue, puh zhih sü Mika toue. Ziba kikhamai hrülai nou Mephibosheth vei kilai soutakhai toure.

¹³Phi ahai kheinou shi-a shovaiyu Mephibosheth sü teisa nou veo ye koa touzho sozho-a Jerusalem hinou hrüe.