Read Poumei Naga 1 VEMAITO 1 Bible Online

1 VEMAITO 1 - Poumei Naga bible

1 VEMAITO 1

¹Chuo David Veo hai po taoli kouyu thaifüa tsüpare, kilai maitao nou puhye sah hopeiyuma puhsü lühyu ngaolou hore.

²Süvanou, puhvei peikho maitao nou puh hi paoe, “Puo veo, Etao nou sheeyu loumainah ali phouloua neye panou zhupeilai alia neye panou sabu sazüloua neye soulü peilai.”

³Südonou puletao nou Israel maivei teidei teitei hinou hüveiyu loumainah sü phoutare, ae Shunem hinou puletao nou Abishag tiyu loumainah ali ngaolou-a veo hisü save peie.

⁴Nahleyu naotupai hai hüveishoe, ae honapai nou veo sü zhupeia puhvei vah sü sou-a koa nou bue, ana veo nou honapaiye sü koa sazü sabu moe.

⁵Chuo Absalom hai thaire, Adonijah nou David alia Haggith nahpoutu maitao hi tsükare. Puh hai hüvei sho-e. David nou puhvei jüphi hai halia soumoe, ae puh sü veo soure donou tsüle hai dusho-a nou bua baiwe. Puhnou puhye donou rheiluki, rhei, ae puhye khoyu mai raingou hai peie.

⁶

⁷Süthaisü puhnou Zeruiah nahpoutu Joab alia napao Abiathar ye lathao loure, ae puletao nou Adonijah ye soukhare donou ae-ao souloure.

⁸Ana napao Zadok, Jehoiada nahpoutu Benaiah, ae rachipaolawo Nathan, Shimei, Rei, alia David vei khouko bushoyu maitao hai Adonijah hi loumoe.

⁹Süthaisü Adonijah nou puh thaihou jürai maitao, veo vei nahmaitao alia Judah hi peicha maitao kuloua zhaotu, chode hübo veinou dathalou-a En-Rogel nghitei-a buyu Nghou Chuhphao hinou popa posheela peie.

¹⁰Ana puhnou rachipaolawo Nathan, moa Benaiah, moa matsü sho-a buyu veo vei peikho maitao, moa puh thaihou Solomon ye kumoe.

¹¹Süthaisü Nathan nou Solomon pfü Bathsheba hi veloua haibüa nou noue, “Haggith nahpoutu Adonijah nou lah vekou louyu sü ne sühomoe? Haisü Veo David koute-a sümoe.

¹²Südonou chuo kabüa ne ae ne nahpoutu Solomon hai hriloulai toulouzü,

¹³David veo hi thasho-a tave haibüa paolo, ‘Oh puo veowo, nenou nevei kilaipai hi avei nahpoutu Solomon ye panou vekou loulai tea chaachou soupei khaiti movu? Kabüa nou Adonijah sü panou vekou louwe?’ ”

¹⁴Nathan nou haibüa paopue, “Nenou veo hi sübüa pao bukinou E-a talou nenou daie paowe touyu nasü cheche-e tea paopeilai.”

¹⁵Südonou Bathsheba nou veo ye daore donou puhvei zübuki hi taloure. Puh sü tsüpare, ae Shunem hi naotupai Abishag nou puhye kikopeia nou bue.

¹⁶Bathsheba nou veo nghoujü hi nakou khurüloure, ae puh nou haibüa honapai hi noue, “Ne dai paonüyu bue?”

¹⁷Honapai nou haibüa chila peie, “Veo, nevei Ramai MAPAO zhih hinou nenou ahi anahpoutu Solomon ye panou veo soulai tea chaachou soukhai toue.

¹⁸Ana Adonijah nou veo soulai tea soudache-a bure, süsü nenou halia sümoe.

¹⁹Puhnou chaokhaorü, zhaotu hrübo veiyu alao dathalou-a ne nahmaitao, napao Abiathar, ae nevei reihmai peichawo Joab puletaoye kuve jüloua bue, ana ne nahpoutu Solomon ye kumoe.

²⁰Puo veo, Israel mai hrülai nou ne thailo thaonou pa veo soulaisa tiyu sü ne hinou sülou nüa zhia bure.

²¹Nenou haliro paopei mosho, ne thai louzü, E alia anahpoutu Solomon hai mai ashimai ali büa poa bailaie.”

²²Bathsheba nou sübüa pao bukinou, rachipaolawo Nathan-a veo vei ki hisü tavere.

²³Veo hisü Nathan-a hai hi loulai tea laire tea paopeie, ae Nathan nou veo nghoujü hi talouloua nakou khurüe.

²⁴Rachipaolawo Nathan nou paoe, “Puo veo, nenou Adonijahye panou veo soulai tea paosüpa peirevu?

²⁵Zhou teithe puhnou chode, zhaotu alao ae hübo veiyu kikhaorü taoli hai datha-a posheela soulai tea tare. Puhnou veo vei nahmaitao, reihmai peikhowo Joab, alia napao peicha Abiathar puletaoye kuve jüloua khonüh nüa haibüa sha-a nou bure, ‘Veo Adonijah sü hrüsho theo!’

²⁶Ana puhnou Eye kumoe, alia Zadok napao, moa Jehoida nahpoutu Benaiah alia Solomon ye sü kumoe.

²⁷Ne thailo pa vekou laiyu mai nasü nenou nevei kilai maitao hi halia süngao khaimoa souyu hai kao-a baie tea nenou souwu?”

²⁸Veo David nou paoe, “Bathsheba ye haihi lou tea kulo” — ae honapai nou veo nghoujü hi talou laloure.

²⁹Süthaisü puhnou honapai hi paoe, “Enou hria buyu MAPAO, Eye veahoyu veishi hinou vupa-apeio vei zhih hinou ne hi chaachou soua paowe,

³⁰süolouzü zhou teithe hinou, Enou Israel maivei Ramai MAPAO zhih hinou ne nahpoutu Solomon panou athaosoua vekou loulai touyu hai chaachou soua paowe.”

³¹Süthaisü Bathsheba nou pei pfü nakouloua haibüa paoe, “Avei puoveo sü panou teisa nou hria buyu sü soulou theo.”

³²Süthaisü David veo nou Zadok, Nathan, alia Banaiah puletaoye sü seiho kutare. Puletao nou veo hi velouyu phaki,

³³veo nou haibüa puletao hi paoe, “Avei peikho maitaoye salou; anahpoutu Solomon ye panou avei rheisü hinou buloua Gihon vei dzüla payu buh hi sa-a koulo,

³⁴ae buh sühinou napao Zadok ae Nathan nou Solomon ye panou Israel mai hi veo soure donou theadzü napeio. Süthaisü shabe houlo ae haibüa shalo, ‘Veo Solomon ye sü panou hrüsho hrülou theo.’

³⁵Sübüa puhye thaifü poa dakhai khe panou avei vebuh hi bulo. Athaosoua Judah alia Israel mai pei hi veo soure donou Enou puhye sü dokhai toue.”

³⁶Jehoida nahpoutu Banaiah nou veo hi haibüa chila peie, “Amen. Nenou paoyu büa soupeilai, ae süsü nevei Ramai MAPAO panou ae-ao peiyu sü soulou theo.

³⁷MAPAO nou neye kozho peiyu büa Solomon hi-a kozho peiyu sü soulou theo, alia neye souduso peiyu büa puh-a panou souduso peitheo.”

³⁸Südonou Zadok, Nathan, Banaiah, alia veo vei reihkhao maitao nou Solomon ye sü Veo David vei rheisü hi panou buloure, ae puhye Gihon dzüla hi khopoa nou koa takoure.

³⁹Napao Zadok nou MAPAO vei Sahpao hinou pokouyu theadzü nasü popalou-a Solomon ye theadzü napeiwure. Puletao nou shabe sü houre, alia maikhe mainou haibüa sha-e, “Veo Solomon ye sü panou hrüsho hrülou theo!”

⁴⁰Süthaisü maikhe mainou Solomon thaifü poa dakhai tare, puletao nou asah soua shapoulei hou-e, ae dei pfüphere soua puletao nou shura sü soue.

⁴¹Adonijah alia puhvei maitao nou khonüh nüa tovai vaiche louyu phaki, maikhe mainou shurao soua buyu pai sü choure. Pairao soua shabe houyu khosü choulouyu phaki Joab nou noue, “Daivanou nuhdu hi haibüa pairao soua nou bue?”

⁴²Puhnou rao-a buyu teile hinou napao Abithar nahpoutu Jonathan hai tave loure, ae Adonijah nou puh hi haibüa paoe, “Taloulo, daiolouzü ne sü mai veiyu mai aliyu thaifüa ko aveih sü pfüa laibulai.”

⁴³Jonathan nou haibüa chila peie, “Ewo ngaopiyu bue. Veo David nou Solomon ye panou veo soure donou dopeire.

⁴⁴Puhnou Zadok, Nathan alia Baniah ae veo vei reihkhao maitaoye panou kholoua puhye veo vei rheisü nou pfüloure,

⁴⁵ae Zadok alia Nathan nou puhye panou veo soure donou Gihon vei dzüla hinou theadzü napeire. Süthaisü maikhe maitao nou asah soua nou shurao soua nuhdu hi dakhai vere. Nenou shura soua choua buyu nasü süvanoue.

⁴⁶Chuo Solomon nou veo sü soure.

⁴⁷Süjünou la-a Veo David vei kilai maitao alia hasüyu maitao nou Puo Veo David ye tave tsükhoua haibüa nou paoe, ‘Nevei Ramai ye panou Solomon ye sü ne jünou zhih tapuyu sü soulou theo, ae ne jünou puhvei vedei sü panou savapuyu sü souloutheo,’ tea pao-a nou bue. Süthaisü Veo David nou puhvei züphao hinou nakou ratho-a nou bue,

⁴⁸ae haibüa veachi paoe, ‘Zhou teithe avei nahmaiye panou athaosou pa veo soulouyu donou ae Eye panou thaimoa ngaolouyu vanou Etao koa nou Israel maivei Ramai MAPAO ye paosho laikhe.’ ”

⁴⁹Süthaisü Adonijah vei maitao hai ngaopi shopoa nou holo hailo ratare.

⁵⁰Ae Adonijah nou Solomon ye ngaopiloua nou tuve MAPAO vei Sahpao hinou posheelabu kainghou hinou kai büa buyu nasü tao-a nou buloure.

⁵¹Ae Solomon hi haibüa nou tave paopeie, “Zhukhaio, Adonijah sü neye ngaopiyu donou posheelabu vei kainghou hinou taopoa haibüa nou pao-a nou bue, ‘Veo Solomon nou Eye southalai moe tea chaachou soupei moyu thaio Ewo hai hinou bua bailai.’ ”

⁵²Süthaisü Solomon nou chila peie, “Puhnou mai aveih soulouzü, puhvei peishu polia panou raikoulai moe, ana puhnou maishi soulouzü puhsü thai-a bailaie.”

⁵³Süthaisü Veo Solomon nou maiye seiho posheelabu hinou Adonijah sü saloure. Adonijah nou veo nghoujü hi talou puhye khurüre, alia Solomon nou puh hi “Ne ki hi tawo,” tea paopeie.