Read Poumei Naga 1 VEMAITO 10 Bible Online

1 VEMAITO 10 - Poumei Naga bible

1 VEMAITO 10

¹Sheba hi vepfüpai nou Solomon vei zhih tashoyu sü choulou khaie, honapai nou puh hi tave chi tateiyu khesü noure donou tare.

²Honapai nou puhye soukha peire mai taoli, alia racho pfüloua mutei shoyu chuh, sana ae na tyatyali pfüloua tare. Honapai nou Solomon ye ve daolouyu phaki, puhnou noulai tea tsücho poa laiyu veishi sü nouloure.

³Solomon nou sütao veishi hai tatei shomoa chila peikhai toupeie.

⁴Sheba teidei hi vepfüpai nou Solomon vei ratsü sü chouloure alia puhnou soukhai touyu ki sü ngaoloure.

⁵Puhvei tousoyu buh, khonüh nüa buyu phaki kilai maitao nou puhvei paikhao pola peiyu, ae Rathoki hi posheela peiyu veishi sü ngaoloua honapai hai khupa soua nou ssü hailou hore.

⁶Honapai nou Veo Solomon hi paoe, “Enou avei teidei hinou nevei ko chouyu, nevei vahtao, ae ratsü khesü chekhaore!

⁷Ana Enou angheithou nou ve ngaomo koute Enou louche moe. Ana Enou chouyu jünou la-a nevei ratsü ae kini sü buhie.

⁸Nevei chapfü maitao hai daizhou koute rako veisa! Ae nevei kilai maitao, teisa nou ne hinou vah souyu maitao, alia nevei ratsü kei louyu maitao hai daizhou koute rako veisa!

⁹Nevei Ramai MAPAO ye paosholo! Neye jüpa-a puhnou neye panou Israel maivei veo sü souloue, daiolouzü puhnou Israel maiye leshiyu hai akhai ha-e, neye panou kaozü soua teidei kholoure donou puhnou neye panou vekou loue.”

¹⁰Honapai nou sapeina poveyu khesü Veo Solomon hi peie: sana sühcho 4,000 jünou la-a nou peie, ae mutei shoyu chuh alia na tyatyali peie. Honapai nou peiyu büa Solomon hi mailinoua peimoe.

¹¹(Hiram vei dzüluki, Ophir teidei hilo nou sana pfüve peiyu nanou juniper süü alia muteiyu chuh-a alao pfüve peie.

¹²Veo Solomon nou süütao hai poa Rathoki hi ae puhvei ki soue, alia lou souyu mai vei basei-a poa soue. Haibüa veiyu süü hai Israel maivei teidei hi pove khaimo hie; ae haibüa veiyu süü hai ngaopukhai toumoe.)

¹³Veo Solomon nou zhai thaifüa sapeina peiyu pei hinou Sheba hi vepfüpai nou jüpa-a khoyu na veishi sü peie. Süthaisü honapai hai puhvei kilai maitao saloua lahvei teidei hi dakhai tare.

¹⁴Solomon nou po ali hinou ngaolouyu sana hai sühcho 23,000 jünou la-a nou ngaowe,

¹⁵süpei hinou teidei vei kikha, huha souyu mainou peiyu, huha chopa louyu, alia Arab hi vemaitao alia Israel maivei teidei khoyu maitao hinou ngao hie.

¹⁶Solomon nou dushoyu rü kaihhai soukhai toue, ae rü ali hinou sana sühcho anai-anai loua soukhai toue.

¹⁷Puhnou rü taitya-a kaihsü soukhai toue, ae rü ali hinou sana sühcho ahai-ahai loue. Puhnou rü haitao hai Lebanon vei Vaohro Ki hi pokhai khaitoue.

¹⁸Süthai-a veo nou vebuh sü praonü nou soukhailoua süpei hisü sana veikayu tyanou meakha khaitoue.

¹⁹Vebuh hisü phiheadou arou nou dopa khaitoue, phiheadou holo ae hailo ahai khehinou khaopei daothou khaitoue, sütao hai khaopei kiahai-e. Vebuh thailova hai chodepei zhairai hinou southou khaitoue, ae bah khaiyu ahai sü khao zhairai nou southou khaitoue. Vedei ali hia haibüa vebuh soukhai touyu sü hahie.

²¹Solomon vei chapai veishi hai sana nou soukhai toukhaitoue, ae Lebanon Vaohro vei Ki hi buyu leekhao teitei sü sana veitya nou soukhai toukhai toue. Solomon vei teile hi hai shahu sü muhae, südonou shahu nou poa haliro soumoe.

²²Puhvei dzülukitao hai Hiram veo vei dzüluki koa panou Tarshish hi tawe. Po asü hinou bakha ali hai panou sana, shahu, paongi, vao-nga alia vaa khesü pfüve peiwe.

²³Veo Solomon hai deiphao hi vemai hrülai jünou toungi ka-e ae dokai-a puhnou veika-e,

²⁴südonou deiphao mai hrülai nou Ramai nou puh hi peikhai touyu ratsü sü tave keinü sho-e.

²⁵Puh hi veyu mai hrülai nou puhye sapeina sü pove peie— shahu ae sana, sabanü, reih basei, poukai nüvei, rhei ae rheisüh khesü pove peie. Haibüa po patsü sü pove peie.

²⁶Solomon nou reiluki 1,400 ae rhei pfüa reih souyu mai 12,000 souda khaitoue. Puhnou kamai-a Jerusalem hi khaitoue, ae kukhetao hai nuhdu teitei hisü khaipeie.

²⁷Puhvei teile hi Jerusalem hisü shahu hai chuh ali büa bue, ae sedar süü hai mulayu bousüü büa Judah teidei hisü bue.

²⁸Solomon vei kuvah souyu maitao nou rhei sü Musri ae Cilicia hinou huha sou-e,

²⁹alia Ejipt hinou rheiluki poloua puletao nou Hit mai ae Sairia maivei vemaitao hisü zho peie. Rheiluki ali hinou shahu 600 ae rhei ali hinou shahu 150 peia nou zhopeie.