Read Poumei Naga 1 VEMAITO 14 Bible Online

1 VEMAITO 14 - Poumei Naga bible

1 VEMAITO 14

¹Teile süphaki, Jeroboam nahpoutu Ahijah sü souloure.

²Ae Jeroboam nou puh chapfü hi paoe, “Zhu soudaloua panou mailia neye sülouso, sübüa Eye panou Israel mai hi veo soulai tea paopeiyu rachipaolawo Ahijah nou buyu Shiloh hi tawo.

³Puhye raokhaopho kirou, raokhaoki daotu, ae laivoudzü bvüli tea pove peio. Ahai nahpoutu sü daibülai touyu sü puh hi noulo, ae puhnou ne hi paongao peilai.”

⁴Südonou Jeroboam kipfü nou Shiloh hi Ahijah vei ki hisü tare. Ahijah sü tsülouyu donou puh nghithou hai ha ngaomore.

⁵MAPAO nou Ahijah hi Jeroboam chapfü sü puh hi ve puhvei nahpoutu soua buyu na donou noulai tea laire tea paopeie. Ae MAPAO nou puh hi kabüa paolai touyu sü paopeiwure. Honapai nou velouyu phaki, puh sü mai kukhe mai ali zhai souloure.

⁶Ana honapai nou kikhu hi takouyu kho sü Ahijah nou chouloua puhnou honapai hi paoe, “Taloulo. Enou süwe ne sü Jeroboam chapfüe. Ne daisounou mai kukhe ali zhai souwe? Neye donou ahi ko ashi paopeia baire.

⁷Taho Jeroboam hi Israel maivei Ramai MAPAO nou haibüa paoe tea paopeio: ‘Enou neye panou avei Israel maitao hi veo soure donou dopeie,

⁸ae David vei kihikhamai hinou vedei sü ne hi peie. Ana nenou avei kilai David bümore, puh louzü avei chikha züwe, alia puhvei hrümai veishi nou peia Enou jüpayu kaozü vah likhei soua baie.

⁹Ana ne louzü ne jünou rai-a khasa-a hrüyu maitao jünou shipure. Nenou Eye malaiwure ae bashara alia zhurai khesü souloua thotayu vanou avei lekha rarou soupa peiwure.

¹⁰Südonou Enou nevei kihikhamai hisü hakayu hai pove peilai, ae nevei tyaosholea hrülai, tsümai nahmai sümoa poutumai hrülaiye sü southakhai toulai. Enou nevei kihikha maiye sü choba velaiyu büa souhakhai toulai.

¹¹Nevei kikhamai taralinoua nuhdu hinou thai louzü puhye sü sei nou touloulai, ae vakou nou thai louzü puhye sü rashopeiki nou touloulai. Haisü MAPAO Enou paowe.’”

¹²Ae Ahijah nou Jeroboam chapfü hisü haibüa paopue, “Chuo ki hi dakhai tawo. Nenou nuhdu hi talouyu phaki ne nahpoutu sü thai-a bailai.

¹³Israel mai hrülai nou puh donou dopfüa puhye sü daovu peilai. Jeroboam vei kihikha maitao sü puhye likhei kaozü hinou daovu peia bailai, daiolouzü Israel maivei Ramai MAPAO nou puhye likhei jüpa-a baie.

¹⁴Süpei hinou MAPAO nou Israel mai hi vemai kukhe ali dopaloua puhye panou Jeroboam vei kihikhamaiye sü souhakhai toulai.

¹⁵MAPAO nou Israel maiye sü tudee peilai, ae puhye sü rei hi poube buyu ali büa pfüa nghoupeilai. Puhnou Israel maiye puletao vei puopao maitao hi peikhai touyu teidei aveih hinou souhawulai, ae Euphratis Rei jünou la-a sourarou laiwulai, daiolouzü puletao nou Asherah rahpfüpai zhurai souloua thoyu donou avei lekha soupa peiwure.

¹⁶Jeroboam vei mah donou ae puhnou Israel maiye süthaisa-a mah souyu donou MAPAO nou Israel maiye thaowure.”

¹⁷Süthaisü Jeroboam chapfü nou kushuloua Tirzah hi dakhai tare. Honapai nou puh ki hi talouyu phaki, puh nahpoutu sü thaire.

¹⁸Ae MAPAO nou puhvei kilaio rachipaolawo Ahijah ye panou paopeiyu büa Israel mai hrülai nou puhye donou dopfüa daovu peie.

¹⁹Jeroboam nou soupfüyu vah veishi, puhnou soureih souyu ae nuhteidei khasa-a hrüyu ko khesü Israel Maivei Vemaitao Hrüko hi rüthou peikhai toue.

²⁰Jeroboam nou po kaihai hai veo soue, süthaisü puh sü thaire, ae puh nahpoutu Nadab nou puh thaosou pa vekou loue.

²¹Solomon nahpoutu Rehoboam nou po raidaili payu phaki puhnou Judah hi vekou loue, ae puhnou po kianai hai MAPAO nou Israel maivei teidei veishi hinou puhye panou thore donou dopa khaitouyu Jerusalem nuhdu hinou veo soue. Puh pfü zhih sü Ammon maipfü Naamah tie.

²²Judah hi mainou MAPAO ngheingao hinou mah sü soure, ae puletao nou raichoki puletao vei puopaoh maitao jünou mah sü soupu peia puhvei lekha sü soupa peiwure.

²³Daiolouzü puletao nou cheche moyu rahye thore buh sü souloure, ae deichi alia süübe phi veishi hinou Asherah vei zhurai ae chuh sholoua thotare.

²⁴Hateitei jünou shikayu nasü naotu poutu sümoa cheche moyu rathobu kinou puletao hai khakha tare. Judah hi maitao nou haoshoyu vah haso, raichoki Israel mainou talouyu phaki MAPAO nou teidei sühinou hulai peiyu maitao nou soupfüyu vah khesü soutare.

²⁵Rehoboam nou vekou louyu po angou kousü Ejipt hi Veo Shishak nou Jerusalem hi soureih souloue.

²⁶Puhnou MAPAO vei Rathoki hi buyu ae veo vei ki hi buyu nangi veishi alia Solomon nou sana nou rü soukhai touyu teitei hai pota khaitoure.

²⁷Veo Rehoboam nou sütao thaosü baosahu nou rü souloua veo vei ki khoyu peikho maitao bah hi thoupeie.

²⁸Ae veo nou MAPAO vei Rathoki hi veyu chüsü, reihkhao maitao nou rü sütao pfüwe, ae süthaisü dakhai veyu phaki poloua reihkhao maivei kide hi khaiwe.

²⁹Rehoboam nou soupfüyu vah veishi hai Judah hi Vemaitao vei Hrüko Larübvü hi rüthou peikhai toue.

³⁰Rehoboam ae Jeroboam puhai vei teile teitei hisü soureih soukoute-a baie.

³¹Rehoboam sü thaitare ae puhye vemai vei khüh, David Nuhdu hinou poa daovu peie, ae puh nahpoutu Abijah nou puh thaosou pa vekou loue.