Read Poumei Naga 1 VEMAITO 17 Bible Online

1 VEMAITO 17 - Poumei Naga bible

1 VEMAITO 17

¹Gilead teidei hinou Tishbi puona Elijah nou Veo Ahab hi paoe, “Enou kuvah soua buyu Israel maivei Ramai MAPAO vei zhih hinou ne hi paowe, süolouzü po ahai asü koute hai Enou paopeimo koute teirülai moe moa jidzü koutea koulai moe.”

²Süthaisü MAPAO nou Elijah hi paoe,

³“Buh hai nasü thaokhaiwua teinghei palova tawo, ae Jordan vei teinghei palova buyu Kherith reitou hinou tuchüa bulo.

⁴Reitou süna hinou ne dzü keyu hai ngaoloulai, ae Enou neye panou touso pove peire donou rehoutao hisü kharochi peilai.”

⁵Elijah nou MAPAO vei kharochi züa Kherith reitou buyu hisü taho hrütare.

⁶Puhnou rei hinou dzü sü ke-e ae rehoutao nou sho-kou hai puhye raokhao alia sou sü pove peie.

⁷Teile daotu thaisü teirü moyu donou reitou nasü dzü thetare.

⁸Süthaisü MAPAO nou Elijah hi paoe,

⁹“Chuo taho Sidon maivei teidei, Zarephath nuhdu hinou hrütawo. Sühinou hrüa buyu meamaipfü ali hi neye panou kipeire donou Enou kharochi peikhaitoue.”

¹⁰Südonou puhnou Zarephath nuhdu hisü tare; ae puhnou nuhdu vei rokhubomü hi talouyu phaki, puhnou mimeapfüpai ye sü meideire süü pfüa nou daoloue. Puhnou honapai hisü paoe, “Eye zhuvea nou kere dzü peio.”

¹¹Ae honapai nou dzü popeilai tea tayu phaki, puhnou haibüa paopue, “Zhuvea nou Eye touso daotulia ne bah hinou popa peio.”

¹²Ae honapai nou chila peie, “Hria buyu nevei Ramai MAPAO zhih hinou chaachou soua paowe, süolouzü ahi toure raokhao liro hare. Ahi buyu louzü khaosao hinou sou bahzü ali ae oliv theadzü daotuli hai bvü hinou buyu baie. Chu Enou süü phouyu hai anahpoutu ahai koa nou sütao tounou akhai vei tovai soua khotouloua thai-a bailaire tea bue.”

¹³Elijah nou honapai hi paoe, “Leveaso, taho sütao nou nevei tovai sü souda khaio. Ana rai-a Eye raokhao phe ali souloua popa peiraio, ae süthaisü nou ne nahpoutu nehai vei soulo.

¹⁴Daiolouzü Israel maivei Ramai MAPAO nou haibüa paoe: ‘MAPAO nou teirü seive peimo koute bvü hinou sou ae theadzü sü halai moe.’”

¹⁵Elijah nou honapai hi paopeiyu büa honapai nou soupeie, ae puletao mai hrülai nou teithe taoli hai touso sü ngaotou kouloue.

¹⁶MAPAO nou Elijah hinou paopeiyu chipao thaifüa khaosao hisü sou hai ha moe, ae bvü hisü theadzüa theta moe.

¹⁷Teile daotu thaisü honapai nahpoutu hai souloure; puh sü soushi lailai loua akhai hisü kou thaire.

¹⁸Honapai nou Elijah hi paoe, “Ramai vei mainare, ne daisounou ahi haibüa soupeiwe? Nenou ahi velou avei mah sü panou licho loure donou anahpoutu sü panou thairevu?”

¹⁹“Nahpoutu sü ahi peio” tea Elijah nou paoe. Puhnou honapai bah hinou nahpoutu nasü poloua puhnou buyu kipeide hisü sapa loure, ae puhye züphao hi pokou zükhaire.

²⁰Süthaisü puhnou paichishoa nou veachi paoe, “Oh avei Ramai MAPAO, ne daisounou haibüa ngaopi shoyu vah sü mimeapfü hainapai hisü souwe? Honapai nou Eye zhuvea nou kiko peie, ae chuo nenou honapai nahpoutu sü southawure.”

²¹Süthaisü puhnou nahtou vasü bakha asü tokou voloua haibüa veachi paoe, “Oh avei Ramai MAPAOwo, nahtou hai nasü souhri dakhai peio.”

²²MAPAO nou Elijah vei veachi sü keinou peie; ae nahtou nasü ssü haipare ae tsüshu loure.

²³Elijah nou nahtou sü kipei hinou saloua pfü hi sakou peie ae honapai hi paoe, “Zhukhaio, ne nahpoutu sü hriloure.”

²⁴Honapai nou chila peie, “Chuo ne hai Ramai vei mai-e ae MAPAO nou neye chaku peiwe touyu sü Enou süloure.”