Read Poumei Naga 1 VEMAITO 2 Bible Online

1 VEMAITO 2 - Poumei Naga bible

1 VEMAITO 2

¹Chuo David sü thaire teile hai nghikoure, puhnou puh nahpoutu Solomon ye kuloua haibüa paoe,

²“E thaitare teile sü vere. Khouchilo ae khuveilo,

³alia nevei Ramai MAPAO nou neye soupfülo tea kharochi peiyu teitei sü soulo. Puhvei chikha ae kharochi veishi, Moses vei Chikha hi rüpeikhai touyu teitei sü soutaosoua zütoua bulo, sükulouzü nevei vah veishi hai kaozhou vei-a souloulai.

⁴Nenou puh chi zülouzü, MAPAO nou ahi avei tyaosholea maitaoye panou puletao vei tsüle veishi nou peia puhvei kharochi züa bulouzü panou Israel maiye khasa-a hrüa bukoute peilai tea chaachou soukhai touyu nasü vete loulai.

⁵“Süpei hinou ne-a süwe, süolouzü Joab nou Israel maivei reihmai peicha hai, Ner nahpoutu Abner ae Jether nahpoutu Amasa puhaiye southa pei-a ahi veahoyu hai pove peie. Kaona-a buyu teile hinou puhnou raichoki soureih souyu vei khühngu hai phou-a maiye southayu sü ne licholo. Puhnou mah hayu maiye southa peiwure, ae chuo puhnou souyu vei veahoyu hai Enou pfüa nou bue.

⁶Nenou daie souzüe touyu sü nenou süwe, puhye panou mai kukhe mai ali büa panou thaiso.

⁷“Ana Gilead hinou veyu Barzillai nahmaitaoye leshipeio ae zhutou toupeio, daiolouzü Enou ne thaihou Absalom hinou tutsü tayu phaki, puhnou Eye leshia zhuvea peie.

⁸“Süthai-a Benjamin maivei Bahurim nuhdu hinou veyu maili Gera nahpoutu Shimei tea bue, Enou Mahanaim hi takouyu phaki, puhnou Eye shisho-a chaa peie, ana puhnou Eye Jordan rei hinou daoyuki, Enou puhye southalai moe tea Ramai zhih hinou chaachou soupeiwure.

⁹Ana nenou puhye panou tudee ngaomoa tayu sü souso. Nenou daie souzüe touyu sü süwe, südonou puhye sü southawo.”

¹⁰David sü thaire, ae puhye David vei Nuhdu hinou vuh peie.

¹¹Puhnou Israel mai hi po raidai hai veo soue, Hebron hinou po anai, ae Jerusalem hinou po shi-asü soue.

¹²Solomon nou puh puo David thaosou pa vekou loue, ae puhvei vedei hai soutaosoua souduso paloure.

¹³Chuo Haggith nahpoutu Adonijah nou Solomon vei pfü Bathsheba hi tavere. Bathsheba nou “Ne kaona-a nou velou-a baimoge?” tea noure. “Kaona-a nou veloua baie,” tea puhnou chila peie.

¹⁴Süthaisü puhnou paopue, “E ne hinou hali noulai.” “Sünasü daie paokhaio,” tea honapai nou noue.

¹⁵Puhnou paoe, “Nenou süwe, süolouzü Enou veo soushulai tiyu hai Israel mai hrülai nou vuzhi-a nou bue, ana sübü moa tyaku nou vepa-a baire, alia athaihou nou vekou loure, süsü Ramai vei leli baiphare.

¹⁶Chuo Enou khonüyu ali bue, moe tea laipeiyu soupeiso.” Bathsheba nou puh hi “Sünasü daie?” tea noue.

¹⁷Adonijah nou paoe, “Zhuvea nou Veo Solomon hinou noupeio, puhnou neye malai laimoe touyu Enou süwe. Shunem hinou veyu naotupai Abishag hai panou achapfü soulo.”

¹⁸Bathsheba nou paoe, “Veishore, neye donou veo hisü Enou talou paopeilai.”

¹⁹Adonijah thaosoua Bathsheba nou talou veo hi paopeie. Veo Solomon nou puh pfüye asasho-a tashu laloua khurülou-a panou puhvei buh zholo hinou pa buloure.

²⁰Bathsheba nou paoe, “Enou ne hinou hali khonüwe, Eye moe tiyu soupeiso.” “Süsü daie, apfü? Enou neye malai laimoe, paokhaio,” tea puhnou paoe.

²¹Bathsheba nou chila peie, “Abishag sü panou ne jürai Adonijah ki pa velouo.”

²²Solomon nou chila peie, “Ne daivanou Abishag sü Adonijah ye peio tea nou khowe? Puhye donou vedei hai-a peio tea kholoua bailaidao; daiolouzü puh sü avei jürai baie, alia napao Abiathar ae Joab hai puhye thaiko-a nou bue.”

²³Süthaisü Solomon nou Ramai zhih hinou haibüa chaachou souloure, “Adonijah nou haibüa khoyu donou puhvei hrirai hai Enou polou moyu thaio, Ramai ye panou Eye southawo.

²⁴MAPAO nou apuo David vei vedei hai Eye donou veitou tea soushu khaipeire, alia puhnou chaachou soukhai touyu thaifüa vedei nasü ahi ae avei tyasholea hi peie. Enou hriyu MAPAO vei zhih hinou Adonijah hai zhou teithe hinou southa vuzüwulai tea chaachou souwe!”

²⁵Südonou Veo Solomon nou Jehoiada nahpoutu Benaiah ye seiho Adonijah ye southawure.

²⁶Süthaisü Veo Solomon nou napao Abiathar hi paoe, “Ne lahvei ki-lu buyu Anathoth hisü tawo, ne hai thaire züdou hinou bue, ana Enou neye southa laimoe, daiolouzü ne hai apuo David ye koa veahozho-a puhvei teile hi nenou Ramai vei Vo Sübvü sü zhupeie.”

²⁷Süthaisü Solomon nou Abiathar ye panou Ramai vei napao soua kuvah souyu hinou pophawure, sübüa Shiloh hinou hrüyu napao Eli vei tyaosholea vanou MAPAO nou paopei khaitouyu nasü panou cheche-a vepare.

²⁸Sübüyu ko hai Joab hi-a süvere. (Puhnou Absalom louzü soukha peimoe, ana Adonijah ye soukha peire.) Südonou puhnou MAPAO nou buyu Sahpao hisü tuveloua posheelabu kainghou hinou ve taopoa nou buloure.

²⁹Solomon nou Joab hai Sahpao hi tuve posheelabu hinou bure touyu ko hai süloure. Südonou Solomon nou ko pomaiye seiho daivanou posheelabu hinou buwe tea Joab hi noue. Joab nou Veo Solomon ye ngaopiyu donou MAPAO hi tuvewe tea chila peie. Südonou Veo Solomon nou Joab ye panou southare donou Benaiah sü seitare.

³⁰Benaiah nou MAPAO nou buyu Sahpao hisü talou Joab hi paoe, “Veo nou neye tapalo tea kharochi peiwe.” Joab nou chila peie, “Moe, E hai hinou thai-a bailai.” Benaiah nou veo hisü dakhaive Joab nou paoyu chipao khesü paopeie.

³¹Solomon nou chila peie, “Joab nou paoyu büa sühinou puhye southa-o ae puhye daovu peio. Sükulouzü, E moa David vei tyaosholea mailia Joab nou mah hayu maiye southa khaitouyu vei mah hai pfülai moe.

³²Joab nou maiye southa khaitouyu vanou MAPAO nou puhye tudee peia baie, haisü apuo nou halia sümoe. Puh jünou mai veiyu mai ahai: Israel maivei reihmai peicha Abner alia Judah reihmai peikhowo Amasa ye hai apuo David hi noumoa southare.

³³Maiye southayu vei veahoyu hai nasü teisa nou Joab vei tyaosholea hi bulai, ana David vei tyaosholea hisü teisa MAPAO nou veilouyu sü peilai ae vebuh hisü panou bulai.”

³⁴Sübüa Benaiah nou taho Joab ye MAPAO nou buyu Sahpao hinou southare, ae puhye sü puhvei ki hinou daovu peie.

³⁵Süthaisü Solomon nou Jehoiada nahpoutu Benaiah nou Joab thaosou reihmai peikhoyu buh nasü thoupeiwure, alia Abiathar buh hisü Zadok ye nou napao vahbu nasü thoupeire.

³⁶Süthaisü veo nou seiho Shimei ye kulou-a haibüa paoe, “Ne lah neye donou ki ali Jerusalem nuhdu hai hinou souloua hrüwo. Nuhdu hai hinou bua baio, ae vakou haki lihia taso.

³⁷Nenou Kidron reitou jünou tala palouzü, süzhou teithe hinou ne sü thaivuzüa bailai, ae hai nasü ne lah nou baie tea poa bailai.”

³⁸Shimei nou veo hisü haibüa chila peie, “Puo veo, süsü veishore, ne kilai Enou ne chi sü züa bulai.” Südonou puhnou Jerusalem hinou phateile taoli hai hrüa nou bue.

³⁹Po asü thaisü, Shimei vei qila mai ahai sü Gath teidei hi veo soua buyu Maakah nahpoutu Akhish hi tuvere. Shimei nou puhvei qila mai ahai sü Gath hi bushe touyu ko hai choulou khaie,

⁴⁰puhnou puhvei qila maitaoye sü phoure donou puhvei rheisü pfüloua Veo Akhish hisü tare. Sühinou puhnou puhvei qila ahai sü ngaolou-a ki hi sa-a dakhai vere.

⁴¹Shimei nou soupfüyu khesü Solomon nou choulou khaie,

⁴²puhnou Shimei ye seiho kuloua haibüa paoe, “Enou neye panou MAPAO zhih hinou Jerusalem nuhdu nasü thaowua talai moe tea chaachou soukhai toue, ae hakinou nenou sübüa soure toulouzü neye southalai tea Enou neye paopi peikhai toue. Nenou süsü soulai tea ae-ao soukhai toumowu alia Enou paoyu achi zülai timowu?

⁴³Sükulouzü ne daisounou chaachou soukhai touyu nasü souphewe ae avei kharochi zümoa tawe?

⁴⁴Nenou kazhou koute apuo David hi soumah khaitoue tiyu sü nenou veisho-a nou süwe. Süvanou MAPAO nou neye sü veahoyu hai peilai.

⁴⁵Ana puhnou Eye ha peilai alia David vei vedei sü teisa donou soushu khaipeilai.”

⁴⁶Süthaisü veo nou Benaiah hi kharochi peiwua puhnou taho Shimei ye sü southare. Chuo Solomon nou vedei sü soutaosoua tukha khailoure.