Read Poumei Naga 1 VEMAITO 21 Bible Online

1 VEMAITO 21 - Poumei Naga bible

1 VEMAITO 21

¹Veo Ahab vei ki pehao hinou Jezreel puona Naboth touyu maina vei darkha kipei ali bue.

²Teitheli Ahab nou Naboth hi paoe, “Nevei darkha kipei sü Eye peia panou Eye vupou kipei soulo, daiolouzü sünasü avei ki nghitei-a bubaie. Enou neye veipuyu kipei kukhe ali hinou peilai, moyuma nenou jüpa louzü Enou neye deimuh sü veisho-a peilai.”

³Ana Naboth nou Ahab hi chila peie, “Haisü apuopaoh mai hinou kikaa thaolouyu füdei baie. Enou neye süna peiyu sü MAPAO nou aetoulai moe.”

⁴Naboth nou puh hi soulou shi-e tea paoyu donou Ahab sü leva moa ae rarouloua ki hisü dakhai vere, ae puhnou kivo hilova reiloua züphao hinou dazü loure, ae hatou bare.

⁵Puh chapfü Jezebel nou puh hi kouloua noue, “Ne daisounou leveage? Daisounou ne hatou bawe?”

⁶Puhnou chila peie, “Daiolouzü Enou Naboth hi paoyu nasü puhnou ba-a baire. Puhvei darkha kipei nasü Eye zhopeio, moyuma puhnou jüpa louzü Enou puh hi darkha kipei kukhe ali nou peilai tea kho-e, ana puhnou soulou shi-e tea peibare.”

⁷Puh chapfü Jezebel nou chila peie, “Ne Israel maivei veo movu? Kushulo, ne lesalo ae hatoulo. Enou Naboth vei kipei sü ne hi peilai.”

⁸Süthaisü honapai nou Ahab vei zhih hinou seiko hai rüloure, ae puhvei sheesao nou saoloua Jezreel nuhdu hi hrüyu peikho maitao ae matsüyu maitao hisü seita peiwure.

⁹Honapai nou seiko hisü haibüa rüpeie, “Teithe ali lüa veachi paolai tea maisou ye kupove jülo, ae Naboth sü tsükhouyu buh hi panou bulo.

¹⁰Alia mai ashimai ahai asü hai puhye panou Ramai ae veo ye chaa peiwe tea paodu peikhaio. Süthaisü puhye nuhdu hinou vakou sapaloua chuh nou deithawo.”

¹¹Jezebel nou kharochi peiyu thaifüa Jezreel hi peikho maitao ae süthai-apei maitao nou soupeie.

¹²Puletao nou teitheli hai hatou moa lüa bulai tea paosüpa peia maisou sü kupove jüloure, ae Naboth ye sü tsükhouyu buh hi khaipeire.

¹³Maishiyu mai ahai nou Naboth ye maisou nghoujü hinou Ramai ae veo ye chaa peiwe tea paodu peire, südonou puhye sü nuhdu vei vakou sapaloua chuh nou deithawure.

¹⁴Süthaisü Jezebel hi haibüa seiko hai paota peie, “Naboth ye sü chuh nou deithare.”

¹⁵Jezebel nou ko hai sülou khaie, honapai nou Ahab hi paoe, “Naboth sü thaire. Chuo puhnou ne hi zhopei bayu darkha kipei nasü taho polo.”

¹⁶Naboth sü thaire touyu ko hai Ahab nou choulouyu phaki, puhnou taho Naboth vei darkha kipei sü poloure.

¹⁷Süthaisü MAPAO nou Tishbi puona rachipaolawo Elijah hi paoe,

¹⁸“Samaria hi buyu Israel maivei Veo Ahab ye taho daokhaio. Nenou puhye sü Naboth vei darkha kipei sü puhvei soua poloulai tea bua nou ngaolai.

¹⁹Puh hi MAPAO Enou haibüa paowe tea paopeio, ‘Nenou maiye southayu thai-a puhvei füdei hai poloulai touwu?’ MAPAO Enou haibüa puh hi paowe tea paopeio: ‘Seitao nou Naboth vei zhe laitoua buyu buh touh hisü nou nevei zhe-a panou laitoulai.’ ”

²⁰Ahab nou Elijah ye ngaoloua puh hi haibüa paoe, “Nenou Eye ngaolourevu, Eye hraiyu mai nare?” Elijah nou chila peie, “Enou neye ngaoloure, daiolouzü ne sü MAPAO vei nghingao hinou vah ashi likhei soure donou nevei tsüle sü peiwure.

²¹Südonou MAPAO nou ne hi haibüa paowe, ‘Ne pei hi hashi sü pove peilai, ae Enou nevei kihikhamai hrülai, taidu sümoa poutumai hrülaiye sü souhawulai.

²²Nevei kikhamai hai Nebat nahpoutu Jeroboam kihikhamai, ae Abijah nahpoutu Baasha kihikhamai büa souha khaitou peilai, daiolouzü nenou Israel maiye sü süthaisa-a mah souyu donou avei lekha rarou sü soupa peiwure.’

²³Ae Jezebel donou MAPAO nou haibüa paoe, ‘Jezebel vei thaiphao sü Jezreel nuhdu hinou sei nou toulai.’

²⁴Nevei kityarai mai taralia nuhdu khevai nou thai louzü puhye sü sei nou toulai, ae vakou nou thai louzü rehou khenou touloulai.”

²⁵(Ahab büa maipfü nou süpeia MAPAO vei nghingao hinou vah ashi souyu hai mailia hahie.

²⁶Israel mainou talouyu phaki MAPAO nou hulai peiyu Amor mai büa puhnou ngaora kayu bashara khesü souloua thotare.)

²⁷Elijah nou chi paocheyu thaisü, Ahab nou puhvei sabanü sü paiphawure, ae soukousah nou banou loure, ae puhnou hatou bare, soukousah nou bazüa baire, ae levea nou bure.

²⁸MAPAO nou Tishbi puona Elijah hi paoe,

²⁹“Ahab nou daizhou koute anghoujü nou tainou souloua buyu sü ne ngaoho moe? Puhnou haibüa soulouyu donou, Enou hashi khesü puh hria buki hai seive peilai more; ana puhvei nahmai phao hinou veahoyu sü Ahab vei kihikhamai hisü vepeilai.”