Read Poumei Naga 2 VEMAITO 10 Bible Online

2 VEMAITO 10 - Poumei Naga bible

2 VEMAITO 10

¹Veo Ahab vei tounah hai Samaria hinou mai rainai hrüa nou bue. Südonou Jehu nou Samaria nuhdu hinou peikho maitao, tsümaitao, ae Ahab vei nahmaitaoye khoyu maitao hi haibüa seiko ali hai rüloua seipeie,

²“Neletao hai veo vei nahmaitaoye kikopeia zhupeiyu maitao-e ae rheiluki, rhei, reihbasei alia veishoa kaopo pokhai touyu nuhdu khesü neletao vei bah hi bue. Südonou neletao nou seiko haina hai ngaoloure toulouzü,

³veo vei nahmaitao hinou veikayu mainaye sü panou veo soure donou dolo ae puhye donou neletao nou soureih soupeio.”

⁴Samaria nuh teidei kho-a buyu maitao nou seiko nasü ngaolou khaie, ngaopi shore, ae haibüa nou paoe, “Veo Joram moyuma veo Ahaziah nou dulouhoa buyu Jehu ye sü Etao nou kabüa dulou khailaige?”

⁵Südonou nuh teidei kho-a buyu maitao ae veo vei kihikha maiye zhua buyu maitao nou Jehu hi haibüa chi paota-e: “Etao hai nevei kilai mai baie, ae nenou vah taralia souwo tea paopeiyu nasü Etao nou soupeilai. Ana Etao louzü mai talia panou veo soure donou dolai moe, nenou daisouyu-a veikalai touyu nasü souloua baio.”

⁶Jehu nou puletao hi seiko ali hai haibüa nou rüloua peipue: “Neletao nou avei me hi loulai toulouzü ae Enou paoyu avei kharochi zülai toulouzü, Jezreal hinou buyu veo Ahab vei nahmaitao mai hrülai pei sü deloua dosho chupha teile hi ahi pove peio.” Veo Ahab vei nahmai mai rainai hai Samaria vei nuh teidei khoyu maitao bah hi bue ae puletao nou Ahab vei nahmaitaoye kikopa peie.

⁷Jehu vei seiko nahai puletao nou ngaolouyu phaki, puletao nou Ahab vei nahmai mai rainai sü southaloua puletao vei pei sü sülai hi thouloua Jehu nou buyu Jezreal hisü seive peie.

⁸Ahab nahmaitao vei pei hai pove peire tea Jehu hi paopeiyu phaki, Jehu nou haibüa kharochi peie, “Pei sütao hai nuhdu vei robomü hi lu ahai soua kholoua nou dosho shona koute sü sühi khaio.”

⁹Süthaisü thainesho shona sü puhnou tapaloua maisou hi paoe, “Enou veo Joram sü southa-a baie, süsü neletao vei mah ha-e. Ana mai haitao hai thaonou southa-e?

¹⁰Haisü sülo, süolouzü Ahab vei kihikhamai donou MAPAO nou puhvei kilai Elijah vanou paopei khaitouyu chipao veishi sü cheche-a vepalai. MAPAO nou rachipaolawo Elijah hinou paopeiyu thaifüa süsü soua baie.”

¹¹Süthaisü Jehu nou Ahab vei kityarai maitao, puhvei peikho maitao, puhvei samai khamaitao ae puhvei napao maitao, Jezreel hinou hrüa buyu mai hrülai hai southakhai toure, mailia shokhai peimoe.

¹²Jehu nou Jezreel thaokhaiwua Samaria hisü tare. Puhnou tayu ludu hinou “Zhaokho maivei fühao” tea kuyu buh hinou

¹³Judah hi veo Ahaziah vei kityarai maitaoye puhnou daoloue, ae puhnou puletao hi “Neletao thao-e” tea noue. Puletao nou chila peie, “Etao hai veo Ahaziah vei kityarai maitao-e, Etao nou Jezreel hi taho veo vei nahmaitao alia veopfüpai Jezebel vei nahmaitaoye chalai tea tawe.”

¹⁴Jehu nou puhvei maitao hi kharochi peie, “Mai haitao hai hria nou nülo.” Puletao nou puletaoye sü nüloure ae süpehao hinou buyu deiqulu hi pokou puletaoye sü southawure. Puletao mai veishi hai mai raidai ahai-e, ae mailia shopei moa southakhai toure.

¹⁵Jehu nou sühinou tayu phaki ludu hinou Rekhab nahpoutu Jonadab ye daoloue. Jehu nou puhye süloua nou paoe, “Ahai tsü zhowe. Ne Eye soukha peilai homoe?” “Enou neye soukha peilai,” tea Jonadab nou chila peie. “Sükulouzü ahi ne bah thaipa peio,” tea Jehu nou paoe. Puhai nou bah süloure ae Jehu nou puhye puhvei rheiluki hisü paipa thouloure,

¹⁶ae Jehu nou puh hi paoe, “Eye koa talai she, ae Enou MAPAO ye kazhou koute louchewe touyu sü ne lah taho zhukhaio.” Puhai nou koa Samaria hisü tare.

¹⁷Puhai nou Samaria hi velouyu phaki, Jehu nou Ahab vei kityarai mai hrülai hai southakhai toure. Haisü MAPAO nou Elijah hi haibüa vepalai tea paopei khaitoue.

¹⁸Jehu nou Samaria hi maitaoye kujüloua nou paoe, “Veo Ahab louzü Baal rahye titea tho-a nou baie, ana Ewo louzü puh jünou veipua nou tholai.

¹⁹Südonou Baal vei rachipaola peiyu mai hrülai ae puhye thoyu mai hrülai alia napao mai hrülaiye kuve jükhai toulo. Mai ali koute-a panou vemoyu sü soulai moe, posheela peiyu sü soulai, Baal rahye thoyu maitao hai vemoyu mai hrülaiye sü southalai.” (Haibüa Jehu nou Baal rahye thoyu mai hrülaiye southare donou shodo souloure.)

²⁰Süthaisü Jehu nou haibüa kharochi hai peire, “Baal rahye tsükhoua puhye thore teithe nasü shapaopa peio.” Baal rahye thore teithe nasü shapaopa peire,

²¹ae Jehu nou Israel maivei teidei teitei hisü ko hai paota peiwure. Baal rahye thoyu mai hrülai nou haizhou sü veimosoua nou veloukhai toulai. Puletao nou Baal rathoki hisü velou phoutao loure.

²²Süthaisü Jehu nou Baal rathoki hinou napao souyu na hisü ratho mai hrülai hisü naazao chekhei hai peio tea kharochi peie.

²³Süthai hai Jehu nou Rekhab nahpoutu Jonadabye saloua rathoki hisü taloure ae puhnou maikhe mai hi paoe, “MAPAO ye thoyu mai ali-a panou loulai moe, Baal rahye thoyu mai likhei loua bailai.”

²⁴Süthaisü Jonadab puhai nou Baal rahye posheela hai meidei-a posheela peie. Puhnou mai raicha hai vakou kheikheisoua haibüa puletao hisü paopeie, “Neletao nou Baal rahye thoyu mai haitao hrülaiye sü southakhai toulai; mailia panou tupa loure toulouzü puhvei hrirai thaosü panou tupa louyu maina vei hrirai nou polai.”

²⁵Jehu nou posheela peiyu thaibü, puhnou reihkhao maitao ae peikho maitao hi paoe, “Talou mai haitao hrülaiye sü southakhai tou-o; mailia panou tupalouso!” Puletao nou khoche paipaloua talou mai teitei sü southakhai toure, ae thaiphao sü vakou paipa khaipeie. Süthaisü puletao nou rathoki khevai talouloua

²⁶Baal rathoki hinou buyu sheeyu dekatao sü phaloua meidei laiwure.

²⁷Sübüa puletao nou rathoki ae sühinou buyu natao veishi hai soushiwure ae rathoki nasü maisou nou teibu soua zhou koute hai bue.

²⁸Sübüa Jehu nou Israel maivei teidei hinou Baal rathoyu maitaoye sü souha peie.

²⁹Ana puh-a veo Jeroboam nou Bethel hinou ae Dan hinou sana nou chode toutu zhurai souloua thotayu vei mah nasü büa soutare.

³⁰MAPAO nou Jehu hi paoe, “Nenou Ahab vei kihikha maitao hi Enou neye panou soupei nüyu veishi hai soupeiwure. Südonou nevei tyaosholea maiphao adai koute hai Israel mai hi panou veo sü soukou peilai.”

³¹Ana Jehu nou Israel maivei Ramai MAPAO vei chikha khesü puhvei tsüle veishi nou peia chi zülou more; puhnou Jeroboam zhaibüa Israel maiye sü süthaisa-a mah soutare.

³²Teile süphaki MAPAO nou Israel maivei teidei hai soutai lailai tare ae Sairia hi veo Hazeal nou Israel maivei teidei teitei hai reih soua poloure,

³³süolouzü Jordan rei teinghei palova buyu teideitao— süsü Armon reipe hinou buyu Aroer vei nuhdu hi koute hai poloure. Teidei sütao hai Gad, Reuben ae Teinghi palova buyu Manasseh maitao nou hrüyu Gilead ae Bashan teidei-a loua nou poloure.

³⁴Jehu nou soupfüyu vah veishi, ae puhnou khuveishoa soukhai touyu vahtao hai Israel maivei Veo maitao vei Hrüko rükhai touyu Larübvü hi rüthou peikhai toue.

³⁵Puh sü thaitare ae puhye Samaria hinou daovu peie, alia puh nahpoutu Jehoahaz nou puh thaosou pa veo souloue.

³⁶Jehu nou Samaria hinou Israel maivei veo soua po kaicha hai khasa-a nou hrüe.