Read Poumei Naga 2 VEMAITO 12 Bible Online

2 VEMAITO 12 - Poumei Naga bible

2 VEMAITO 12

¹Jehu nou Israel mai hi veo souyu po anai kousü Judah hi hai Joash nou pa veo souloue ae puhnou Jerusalem hinou po raidai hai veo soua nuh teidei sü khasa-a nou hrüe. Puh pfü zhih nou Zibiah toue ae honapai hai Beershaba nuhdu hi maipfüe.

²Puhvei hrümai teitei hinou MAPAO nou jüpayu vah haso khesü puhnou soupeie, daiolouzü puhye sü napao Jehoiada nou paodou peie.

³Anou rah kukheye thoyu buh khesü puhnou souhalou more, südonou maikhe mainou deichi kuyu hinou posheela peia poukai nüvei khesü meideia posheela peia bubaie.

⁴Joash nou napao maitao hi pove posheela peiyu pousha, mai alili nou peire pousha ae peinüa pove sheela peiyu pousha khesü pojü khailo tea kharochi peie.

⁵Napao mai alili nou ngaolouyu pousha sü polo ae pousha sütao hai poloua Rathoki shitayu khesü souveipuyu hi poa nou vah soulai.

⁶Ana Joash nou veo soulouyu po kaisü koute hai napao maitao nou rathoki shiyu khesü souta more.

⁷Südonou puhnou Jehoiada ae napao kukhe maitao hai kuloua nou paoe, “Neletao daisounou Rathoki shiyu khesü souta moe? Chuthai nou neletao pousha ngaolouyu khesü pa neletao hi khaipulai more; neletao nou pousha sütao hai Rathoki shitayu khesü soupure donou peia baio.”

⁸Napao maitao nou süsü aetoure ae puletao nou Rathoki nasü soupuyu hai-a soulai more tea ae-ao souloure.

⁹Süthaisü napao Jehoiada nou sübvü ali souloua sübvü peiho hisü voucha loure ae maikhe mainou MAPAO vei Rathoki hi tave ratholai tea talouyu bahkha zhoulova posheelabu hisü khaipeiwure, ae MAPAO vei ki hi rathoyu maitao nou pove peiyu teitei hai sühinou kho-a buyu napao nanou sübvü hisü pothou khaipeie.

¹⁰Sübvü hisü pousha taoli pove thouyu phaki, veo vei larü rü-apeio ae Napao Peichana nou tave pousha sü phouloua lekhabvü hi thouloue.

¹¹Puletao nou pousha sü kazhou bue touyu sü phouloua Rathoki hinou vah souyu maitao ae kho-apeio maitao hisü peiwe alia pousha sütao nou poa süüvah souyu maitao, ki souyu maitao,

¹²chuh daoyu maitao hi peiwe, alia poa rathoki shiyu khesü soure donou süü ae chuh khesü hülouwe alia molouzü shiyu vah khesü poa souwe.

¹³Rathoki hi pove peiyu pousha khesü poa shahu nou paikhao, khaosao, shabe, moa meivabvü moyuma shahu ae sana nou souyu natao donou souha moe,

¹⁴daiolouzü pousha sütao hai Rathoki shiyu khesü soure donou vah souyu maitao hi peia baiwe.

¹⁵Puletao nou khosa-a vah souyu maitao hi peikhai touyu pousha khesü kazhou souhawure moa thaobah hi thoupeie touyu khesü phoutu moe, daiolouzü puletao nou tsüle sheesha tea nou vah hai soupeia baiwe.

¹⁶Soumah khaitouyu ae mahmo khailoure donou posheela peiyu pousha khesü sübvü hi thoumoe; daiolouzü sütao hai napao maitao vei zha baie.

¹⁷Teile süphaki Saria hi veo Hazael nou Gath nuhdu hai reih hulou poloure; süthaisü puhnou Jerusalem hi reih huloulai tea lela loure.

¹⁸Ana Judah hi veo Joash nou Judah hi veo maitao, puhvei puopaoh maitao Jehoshaphat, Jehoram ae Ahaziah nou MAPAO hi peithou khaitouyu kinitao ae süpei hinou puhnou peithou khaitouyu kinitao alia rathoki hinou buyu kini veishi hai poloua veo Hazael hisü sapeina soua peiwure. Süthaisü veo Hazael nou puhvei reihmaitao hai Jerusalem hi saloumoa dakhai tare.

¹⁹Veo Joash nou soupfüyu vah veishi hai Judah hi Vemaitao vei Hrümaiko Larübvü hi rüthou peikhai toue.

²⁰Veo Joash vei khe hinou peikhoyu mai ahai Shimaeth nahpoutu Jozakar ae Shomer nahpoutu Jehozabad nou shodo ashi souloua Silla hi louyu ludu, Jerusalem vei teinghei palova nou soukhai touyu puhvei ki hinou veo Joashye sü southawure. Puhye sü David vei Nuhdu vemaitao vei khüh hinou poa daovu peie ae puh nahpoutu Amaziah nou puh thaosü pa vekouloue.