Read Poumei Naga 2 VEMAITO 13 Bible Online

2 VEMAITO 13 - Poumei Naga bible

2 VEMAITO 13

¹Judah hi veo Ahaziah nahpoutu Joash nou veo souyu po kaisü kousü Jehu nahpoutu Jehoahaz nou Samaria hinou Israel maivei veo souloue, ae puhnou po kianai hai veo soukouloue.

²Puh jünou raia veo souyu Jeroboam büa puhnou MAPAO vei nghingao hinou mah sü soure ae puhnou Israel maiye sü mah hi süthai thoupeie; puhnou vah ashi souyu sü thaokhai timoe.

³Südonou MAPAO nou Israel mai pei hisü rarou loure, ae puhnou Sairia maivei veo Hazael alia puh nahpoutu Banhadad panou puletao jünou reih koloure.

⁴Süthaisü Jehoahaz nou MAPAO hi veachi paoe ae Sairia hi veo nou Israel maiye souvea shopeiyu sü ngaoloua puhvei veachi sü noupeie.

⁵Südonou MAPAO nou Israel maiye panou Sairia mai hinou lahdo soua hrüloure donou süthai-apei mai ali seive peie, sübüa Israel mai hai raichoki büa kaona-a nou hrüpuloue.

⁶Ana Israel maitao hai Veo Jereboam nou soumah peikhai touyu vah haso khesü thaokhai timoa soua bubaie, ae Asherah rahpfüpai zhurai khesü Samaria hinou bua baie.

⁷Jehoahaz vei reihmaime hai rhei pfüyu mai raingao ae rheiluki kirou ae phi nou tayu reihmai hai thekirou likhei bua baire, daiolouzü Sairia hi veo nou puletaoye sü thaibuh hi naihü büa deisasa khaiwure.

⁸Jehoahaz nou soupfüyu vah haso veishi ae puhnou khuveisho-a soukhai touyu vahtao hai Israel maivei Vemaitao vei Hrümaiko Larübvü hi rüthou peikhai toue.

⁹Puh hai thaitare ae puhye sü Samaria hinou poa daovu peie, ae puh nahpoutu Jehoash nou puh thaosou pa vekouloue.

¹⁰Judah hi veo Joash nou veo soulouyu po shianai kousü Jehoahaz nahpoutu Jehoash nou Israel mai hi vekouloue ae puhnou po kiarou hai Samaria hinou veo soua bue.

¹¹Puh-a MAPAO vei nghingao hinou mah khesü soure ae veo Jeroboam büa puhnou Israel maiye sü mah hi süthaithou peie.

¹²Jehoash nou soupfüyu vah veishi ae puhnou khuvei sho-a Judah hi Veo Amaziah ye soureih souyu ko teitei hai Israel hi Vemaitao vei Hrümaiko Larübvü hi rüthou khaitoue.

¹³Jehoash thaitare, ae puhye veo maitao vei khüh Samaria hinou poa daovu peie ae puh nahpoutu Jeroboam II nou puh thaosou pa veo souloue.

¹⁴Chuo Elisha hai thailou veiyu sou ashi souloure, ae puhnou züphao hinou züa buyu teile hinou veo Jehoash nou puhye tave cha-e, ae haibüa kraloua paoe, “Oh apuo, apuo! Nenou Israel maiye sü kiko peia vupapeie!”

¹⁵“Voulou ae voulouthou sü polo,” tea Elisha nou Jehoash hi kharochi peie. Südonou puhnou voulou ae voulouthou sü poloure,

¹⁶ae Elisha nou puhye kare donou soudalo tea paopeie. Veo nou süsü soudaloure, alia Elisha nou veo bah sü deiloure.

¹⁷Süthaisü Elisha nou paopeiyu thaifüa veo nou Sairia hilova reiyu vabomü nasü houloure. Elisha nou puh hi kharochi peie, “Voulou sü kakhaio.” Veo nou voulouthou nasü kalaiyu thai, Elisha nou paoe, “Ne hai MAPAO vei voulouthou-e, sünanou Sairia mai hi reih soua veiloulai. Nenou Sairia maiye sü Aphek hinou soureih soua puletao jünou koloulai.”

¹⁸Süthaisü Elisha nou veo hi voulouthou kukhetao hai poloua dei hi kavu khaio tea paopeie. Veo nou voulouthou sü poloua dei hi bakha asü kavu-a nou chaore.

¹⁹Elisha nou süvanou rarouloua veo hi paoe, “Nenou bakha angou moa bakha arou koute hai kavuyu pha-e, sükulouzü nenou Sairia maiye sü teisa nou veiloua bailai, ana chuo nenou puletaoye sü bakha asü likhei hai veiloua bailai.”

²⁰Elisha sü thaitare ae puhye sü daovu peiwure. Po patsü hai Moab mainou Israel maivei teidei hisü reih huloua baiwe.

²¹Vuli Israel maitao nou maiye poa daovulai tea buyu teile hinou sübüyu maime ali hai lai-a nou zhingao loukhaie, puletao nou thaiphao nasü Elisha vei khüh hi laikhaiwua tutare. Thaiphao nanou Elisha vei raotao hi kou deilou khaie, mai süna hai hridakhai loua nou kushu laloure.

²²Jehoahaz nou Israel mai hi veo soua buyu teile hi Sairia hi Veo Hazael nou Israel maiye souvea souchoro peie,

²³ana MAPAO nou puletaoye sü zhuvea leshi peie, ae Sairia maiye panou puletaoye sü souha soushi peimoe, daiolouzü puhnou Abraham, Isaak ae Jakob ye koa vo soukhai toue, südonou puhnou puhvei maitaoye sü ngaikhai toupei moe.

²⁴Sairia hi veo Hazael thaiyu thai, puh nahpoutu Benhadad nou puh thaosou veo sü souloure.

²⁵Süthaisü Jehoahaz nahpoutu Jehoash nou Hazael nahpoutu Benhadad hinou raichoki puh puo Jehoahaz hinou reih soua polouyu teideitao sü podakhai loue. Bakha asü koute Joash nou Sairia mai hinou reih veiloua Israel maivei teidei khesü podakhai loue.