Read Poumei Naga 2 VEMAITO 14 Bible Online

2 VEMAITO 14 - Poumei Naga bible

2 VEMAITO 14

¹Israel hi veo Jehoahaz nahpoutu Jehoash nou vekou louyu po ahai kousü Joash nahpoutu Amaziah nou Judah hi vekou loue.

²Puhnou veo soulouyu phaki puh hai po kaingou pare, ae puhnou po kaikü koute hai Jerusalem hinou veo soue. Puh pfü zhih nou Jehoaddin toue, ae puh hai Jerusalem hi maipfüe.

³Puhnou MAPAO vei jüpa vah khesü soupeie, ana puh paoh David veo büa soumoe; puhnou puh puo Joash büa baie.

⁴Puhnou rah kukheye thoyu buh khesü soushi moe, ae maikhe maiye panou buh sütao hinou posheela peia ae poukai nüvei khesü meideia bubaie.

⁵Amaziah nou veo vei khouko hai soutaosoua potou toulouyu thai, puhnou puh puo veoye southayu maitao hai southawure.

⁶Anou puhnou puletao vei nahmaitao hai southa moe, daiolouzü MAPAO nou Moses hi haibüa chikha hai peikhai toue: “Nahmai nou mah souyu donou pfüpuo maiye koa southalai moe, moyuma pfüpuo mainou mah soukhai touyu donou nahmaitaoye koa nou southalai moe; lah lah nou soumah khaitouyu thaifüa puhye southa-a bailai.”

⁷Amaziah nou Edom reihmai thekirou hai Tai Deikho touyu buh hinou southa peie, ae puhnou Sela nuhdu nahai soureih soua poloure, alia sünasü Joktheel tea zhih sapeie, zhih sünasü chukoute bue.

⁸Süthaisü Amaziah nou Israel mai hi veo Jehoash ye sü soureih soulai tea kopomaiye seiho paore.

⁹Ana veo Jehoash nou chila sü haibüa nou seidakhai vepeie, “Vuli Lebanon deichitao hinou shube ali nou sedar süübe hi haibüa paoe, ‘Ne nah naotupai hai anahpoutu ki khaipeio,’ tea nou khowe. Süteile hinou rekhaona nou tave shube nasü taisasare.

¹⁰Chu nenou Edom mai jünou reih veiloure tea khaophu soua bure. Ne zhih aveih sünanou poloua ki hinou vaphi tea bua baio, daisounou veahoyu ae hakatayu sü ne hi ae nevei maitao hi pove peilai touwe?”

¹¹Ana Amaziah nou paoyu chi sü keipei bare, südonou veo Jehoash nou puhvei reihmai sü saloua Judah maivei teidei Beth Shemesh hinou puhye soureih soulai tea tare.

¹²Amaziah vei reihmaitao hai hraongu ngao-a baire, ae puhvei reihmai hrülai hai lahkuku vei ki hi tutakhaire.

¹³Israel mai hi veo Jehoash nou Judah hi veo Amaziahye sü hukhamai soua nüloure, ae Jerusalem hisü velou Ephraim Rokhubomü hinou poa Kainghou Rokhubomü hi koute, süsü mitar kaih ahai phasü dakho laire.

¹⁴Puhnou shahu ae sana teitei, Rathoki hinou buyu paikhao veishi ae veo vei ki hinou buyu kini veishi hai poloua Samaria hisü tare. Puhnou hukhamai soua mai-a nüpoa tare.

¹⁵Jehoash nou souyu vah veishi ae puhnou khuvei sho-a veo Amaziah ye soureih souyu hai-a Israel maivei Vemaitao Hrümaiko Larübvü hi rüthou peikhai toue.

¹⁶Jehoash sü thaitare ae puhye veo maivei khüh, Samaria hinou poa daovu peie ae puh nahpoutu Jeroboam II nou puh thaosou pa veo souloue.

¹⁷Israel mai hi veo Jehoash thaiyu thai, Judah hi veo Amaziah hai po kiangou maikou hie.

¹⁸Amaziah nou soupfüyu vah veishi hai Judah maivei Vemaitao vei Hrüko Larübvü hi rüthou peikhai toue.

¹⁹Jerusalem hinou Amaziah ye southalai tea shodo ashi souyu sü puhnou süloua puh hai Lakhish hi tuho butare, ana puhye ngaobayu maitao nou buh sühi-a thaifüho puhye sü southawure.

²⁰Puhvei thaiphao sü rheiphao hinou pfüa Jerusalem hi dakhai ve David vei Nuhdu, veo maivei khüh hinou daovu peie.

²¹Süthaisü po kiarou payu puhvei nahpoutu Uzziah ye panou Judah hi veo soulai tea maikhe mainou doloua veo peirü sü rüpeire.

²²Uzziah nou puh puo thaiyu thainou Elath hai reih veiloua podakhai loua soushupu loue.

²³Judah hi veo Joash nahpoutu Amaziah nou veo souyu po kiangou kousü Jehoash nahpoutu Jeroboam nou Israel mai hi vekou loue, ae puhnou po raidaili hai Samaria hinou veo soua bue.

²⁴Puh jünou rai-a veo souyu Nebat nahpoutu veo Jeroboam bütoua puhnou MAPAO vei nghingao hinou mah khesü soure ae puhnou Israel maiye mah hi süthaisa-a loupeie.

²⁵Puhnou Israel maivei teidei reilova buyu Hamath hi louyu ludu hinou poa khelova buyu Athai Zai hi koute hai reih soua podakhai loue. Haisü Israel maivei Ramai MAPAO nou puhvei kilaio Amittai nahpoutu rachipaolawo Jonah, Gath Hepher puona hinou paopa peiyu thaifüa souvete peie.

²⁶Israel mainou veaho shoa buyu ae mai linoua puletaoye soukha peire mai hayu sü MAPAO nou ngaoloure.

²⁷Ana MAPAO vei leli haiolouzü teisa donou Israel maiye souhare donou moe, südonou puhnou veo Jeroboam II sü panou Israel maiye vupa loure donou seive peie.

²⁸Jereboam II nou soupfüyu vah teitei, puhnou khuvei shoa soureih souyu ae kabüa Damaskas ae Hamath hai Israel maivei soua podakhai louyu veishi hai Israel maivei Vemaitao vei Hrüko Larübvü hisü rüthou khaitoue.

²⁹Jeroboam sü thaitare ae puhye veo maivei khüh hinou poa daovu peie, ae puh nahpoutu Zekhariah nou puh thaosou pa vekou loue.