Read Poumei Naga 2 VEMAITO 17 Bible Online

2 VEMAITO 17 - Poumei Naga bible

2 VEMAITO 17

¹Veo Ahaz nou Judah hi veo soulouyu po kiahai kousü Israel mai hi Elah nahpoutu Hoshea nou vekouloue, ae puhnou Samaria hinou po akü hai veo soue.

²Puh-a MAPAO vei nghoujü hinou mah sü soue, ana puh jünou rai-a Israel mai hi veo souyu maitao nou mah souyu koute hai puhnou soumoe.

³Assaria hi veo Shalmaneser nou puh pei hi reih sou-e, ae Hoshea nou puhvei khakhe hinou bua bailaire tea peithouwua po patsü hai puhye kikha sü peie.

⁴Ana po ali hai Hoshea nou Ejipt hi veo So hisü kopomaiye seiho puhye soukha peio tea khore, ae Assaria mai hi kikha peiyu nahai peimore. Veo Shalmaneser nou hai khesü sülou khaie, puhnou Hoshea sü nüloua hukhaki hi thoukhaiwure.

⁵Süthaisü Shalmaneser nou Israel maivei teidei hisü reih huloure ae Samaria hai poloure. Puletao nou Israel maivei teidei polouyu po asü,

⁶Hoshea nou vekou louyu po akü kousü, Assaria hi veo nou Samaria hai poloure ae Israel maiye sü hukhamai soua nüpoa Assaria hi satare ae puletaoye panou Halah nuhdu hi ae kamai-a Gozan teidei hi Habor rei pehaotao hinou pa bue, ae kamai-a Media maivei nuhdutao hinou pa hrüe.

⁷Samaria hai kaodu tare, daiolouzü Israel mainou puletao vei Ramai MAPAO, puletaoye Ejipt vei veo bah hinou vupa peia Ejipt teidei hinou sapa peiyu puhvei nghingao hinou mah khesü souwure. Puletao nou rah kukheye thotare,

⁸ae Ramai nou puhvei maitao nou talouyu phaki hulai peiyu maitao vei zhaidou ashi khesü thaifü tare ae puletao nou hrü ashi, Israel maivei vemaitao nou soupfüyu khesü soutare.

⁹Israel maitao nou puletao vei Ramai MAPAO nou aetou moyu vah haso khesü soupfütare. Puletao nou cheche moyu rahye thoyu buh hai puletao vei nuh teidei veishi hinou soukhai loure.

¹⁰Deichi teitei hinou ae süübe buyu phi veishi hisü puletao nou chuh shukhai loure ae Asherah rahpfüpai vei zhurai hai daokhai loure,

¹¹ae MAPAO nou hulai peiyu maitao nou soupfüyu zhai büa puletao nou cheche moyu rahye posheela peiyu buhtao hinou poukai nüvei hai meidei peire. Puletao nou zhaidou ashi ae vah ashi khesü soupeia MAPAO vei lekha sü soupa peiwure,

¹²ae basharatao thoso tea MAPAO nou chikha peiyu nasü zümoa soutare.

¹³MAPAO nou Israel mai ae Judah mai hi puhvei kopaomai ae rachipaola peiyu maiye seive haibüa paopi peie: “Enou avei kilai rachipaola peiyu maitao hinou ae neletao vei puopaoh maitao hinou peikhai touyu chikha khesü zülo ae vah ashi souyu khesü bailo.”

¹⁴Ana puletao hai puletao vei puopaoh maitao büa rochi loure ae puletao vei Ramai MAPAO ye sü louche bare.

¹⁵Puletao hai puhnou paodou peiyu khesü zübare, puhnou puletao vei puopaoh maitaoye koa vo soukhai touyu nasü pfüthowure ae puhnou puletao hi paopi peiyu khesü ngaophou more. Puletao nou haliro soulou hoyu bashara khesü tho tare ae puletao hai muhlia hayu mai soutare. MAPAO nou puletao hi puletao vei pehao hinou hrüyu maivei zhaidou hai douso tea kharochi peiyu sü züba-a sükhesü soupfü tare.

¹⁶Puletao vei Ramai MAPAO nou puletao hi peikhai touyu chikha teitei sü puletao nou pfüthore, ae puletao hai hu nou chode zhurai souloua sünaye tho tare; puletao nou Asherah rahpfüpai zhurai-a souloure, teivuh hai-a tho tare, ae Baal rahye tho tare.

¹⁷Puletao nou cheche moyu rahtao hi puletao vei nahpoutu ae nah naotumai khesü meidei-a posheela peie; puletao nou keingumai ae vepare paoyu mai hi kabülai tea chaku tare, ae MAPAO nou jüpa moyu vahtao hai puletao vei tsüle ae khouko veishi nou pei-a soupfü tare, ae MAPAO vei lekha rarou sü sübüa puletao nou soupa peie.

¹⁸Südonou MAPAO nou Israel mai pei hi rarou loure ae puhnou puletaoye sü puhvei nghingao hinou souhawure, sübüa Judah vei vedei likhei shokhai peia baire.

¹⁹Ana Judah hi maitao-a puletao vei Ramai MAPAO nou peikhai touyu chikha khesü zübare; puletao-a Israel mainou ta-a buyu zhaihrü nasü douloure.

²⁰MAPAO nou Israel maivei tyaosholea hrülaiye sü malaiwure, puhvei nghingao hinou Israel mai veishi hai hatakhai mokoute, puhnou zhaipou shishoyu puletao vei ngaoba maitao bah hisü puhnou puletaoye sü thaothou peiwure.

²¹MAPAO nou Israel maiye Judah maitao hinou soukho laiyu thai, puletao nou Nebat ae Jeroboam nou Israel maiye panou MAPAO ye thaifü moa süthaisa-a mahmo soutare.

²²Jeroboam nou vah ashi souyu ae mahmo souyu khesü thaifüa nou Israel maitao nou soupfü tare.

²³Südonou MAPAO nou puhvei kilai rachipaola peiyu maitao hinou paopi peiyu bütoua Israel mai hrülaiye sü puh vei nghingao hinou souha laikhai touwure. Israel mai hai Assaria maivei teidei hi hukhamai soua nüpoa tare, ae chukoute hai puletao nou sühinou hrüa bue.

²⁴Israel maiye nüpoa tayu thai, Samaria nuhdutao hi panou maiye hrüre donou Assaria hi veo nou Babilon, Kuth, Ivvah, Hamath, ae Sepharvaim nuhdutao hinou maiye sapove thoupeie. Puletao nou Israel maivei nuhdu khesü poloua nou sühinou ve hrüe.

²⁵Puletao nou teidei sühi tave füsho arai hi hai, puletao nou MAPAO ye sü tholou more, südonou puhnou souveo sü seive kamai-a panou southawure.

²⁶Assaria hi veo nou Samaria nuhdutao hi seive hrüyu maitao hai teidei sühi Ramai vei chikha khesü sülou more, südonou Ramai nou souveo khesü seive puletaoye sü southare touyu ko hai süloure.

²⁷Südonou veo nou haibüa kharochi peie, “Teidei sühi Ramai vei chikha khesü panou maikhe mai hi paodou peire donou Etao nou nüpoa veyu napao maitao kamai-a seidakhaiho peio.”

²⁸Südonou Israel maivei napao maitao hai Samaria hi seidakhai ve panou Bethel hinou hrüe, ae puletao nou buh sühinou maikhe mai hi kabüa MAPAO ye tholai touyu khesü doupeie.

²⁹Ana Samaria hinou hrüyu maitao hai lahkuku vei bashara khesü souloua Israel mainou soukhai touyu rathokitao hisü pokhai loure. Lahkuku vei nuhdu hinou hrüyu maimetao hai kukua nou lahvei bashara khesü souloure:

³⁰Babilon hinou hrüyu maitao nou Sukhoth Benoth vei rah zhurai souloure; Kuth maitao nou Nergal bashara sü souloure; Hamath maitao nou Ashima vei bashara nou souloure;

³¹Ivvah maitao nou Nibhaz ae Tartak bashara souloure; ae Sepharvaim maitao nou puletao vei nahmai hai puletao vei Adrammelekh ae Anammelech rah hi dathaloua poa meidei-a sheela peie.

³²Mai haitao nou MAPAO-a tho-e, ae puletao hrohinou tarasoua napao maiye sü doloua nou cheche moyu rathokitao hinou naanou soua panou posheela hai peiwe.

³³Südonou puletao nou MAPAO ye sü thowe, ana lah puletao vei teidei hinou thoyu ratao vei zhai thaifüa tho-e.

³⁴Zhou koute hai puletao nou raichoki tayu zhaihrü thaifüa ta-e. Puletao nou MAPAO sü cheche-a thomoe, moyuma puhvei chikha ae kharochi khesü puhnou Jakob vei tyaosholea hi peikhai touyutao hai zümoe.

³⁵MAPAO nou puletaoye koa haibüa vo soukhai toue, ae haibüa kharochi peikhai toue: “Rah kukheye thoso, puletaoye khurüso moa puletao vei kuvah sü souso; moyuma puletao hi posheela hai peiso.

³⁶Neletaoye Ejipt teidei hinou khupasoua sapa peiyu MAPAO avei chi sü neletao nou zülai, neletao nou Eye likhei tho-a bailai ae Eye posheela peia bailai.

³⁷Enou neletao hi peikhai touyu chikha ae kharochi khesü neletao nou teisa nou züa hrülai. Neletao nou rah kukhe livei chi hai zülai moe,

³⁸ae Enou neletaoye koa nou vo soukhai touyu nasü ngaikhai touso.

³⁹Neletao vei Ramai MAPAO chi sü zülo, sükulouzü Enou neletaoye ngaobayu maitao hinou vupa peilai.”

⁴⁰Ana mai haitao nou sükhesü keipei bare, ae puletao nou hrü ashi ae hrü akuna sü ta-a nou bubaie.

⁴¹Südonou mai haitao hai MAPAO ye tho-e, ana puletao nou basharatao koa nou thowe; ae zhou koute hai puletao vei tyaosholea maitao nou sübüa hrüa bue.