Read Poumei Naga 2 VEMAITO 18 Bible Online

2 VEMAITO 18 - Poumei Naga bible

2 VEMAITO 18

¹Israel mai hi Elah nahpoutu Hoshea nou veo souyu po asü kousü Judah teidei hi Ahaz nahpoutu Hezekiah nou vekouloue.

²Puhnou vekou louyu phaki, puh hai po kaingou pare, ae puhnou Jerusalem hinou po kaikü hai veo soue. Puh pfü hai Zekhariah nah naotupai Abijah toue.

³Puh paoh David veo büa puhnou MAPAO vei nghingao hinou vah haso aveih khesü soupeie.

⁴Puhnou cheche moyu rathobuh khesü soushi souha peie, ae Asherah rahpfüpai zhurai soukhai touyu khesü dakholai peie. Moses nou baosahu nou soukhai touyu heung, süsü Nehushtan tea kuwe, süna-a puhnou dakhosasa peie. Teile sühi koute hai maikhe mainou sünaye sü tsükhoua poukai nüvei hai meidei peia nou bue.

⁵Hezekiah nou Israel maivei Ramai MAPAO hai lülouche teih teanou hrüe; Judah teidei hi puh büa veiyu veo mai hai puh jünou rai-a veo souyu maitao-a ae puh jünou nayu mai-a aliro ha-e.

⁶Puhnou MAPAO hi chilee chechetou teanou bue, ae puh chi hai zümoyu sü soukhai timoe, ana MAPAO vei chikhatao puhnou Moses hi peikhai touyu teitei hai soutaosoua nou rei-a hrüe.

⁷Südonou MAPAO nou puhye kozho peie, ae puhnou soupfüyu vah veishi hai panou veilouyu sü soupeie. Puhnou Assaria maivei veo sü du-e ae puhvei khakhe hisü puhnou bubare.

⁸Puhnou Philistin maivei nuh teidei teitei, Gaza hi koute hai reih soua veiloue.

⁹Hezekiah nou veo soulouyu po adai nava, süsü veo Hoshea nou Israel mai hi veo souyu po anai kousü Assaria hi veo Shalmaneser nou Israel maivei teidei hisü soureih hulou Samaria hai poloure.

¹⁰Puhnou Samaria polouyu po asü kousü Israel maivei vedei hai kaodutare; süsü Hezekiah nou vekou louyu po arou ae Hoshea nou vekou louyu po akü nava hinoue.

¹¹Assaria hi veo nou Israel maiye sü hukhamai soua nüpoa tare, ae puhnou Israel mai kamai-a panou Halah nuhdu hi bue, kamai-a panou Habor reipe Gozan maivei teidei hinou hrüe ae kamai-a panou Media maivei nuhdu hinou hrüe.

¹²Samaria hai daivanou kaodu tare toulouzü, Israel mainou puletao vei Ramai MAPAO chi sü zübare, ana puletaoye koa nou vo soukhai touyu nasü pfüthowure, ae puhvei kilai Moses hinou peikhai touyu chikha teitei nou zübare. Puletao hai paochi zübare ae kei-a keipei bare.

¹³Veo Hezekiah nou vekou louyu po kiadai kou hai Assaria hi veo Sennakherib nou veishoa nou kaopo poa soukhai touyu Judah vei nuhdutao hai reih hulou poloure.

¹⁴Veo Hezekiah nou Lakhish hi velou buyu Assaria hi veo Sennakherib hi haibüa seiko hai seita-e: “Enou soumahwure, zhuvea nou reih hulou peiso baio, nenou jüpayu na veishi hai Enou peilai.” Assaria hi veo nou Hezekiah hinou shahu sühcho thekirou ae sana sühcho theli hai peio tea kholoure.

¹⁵Hezekiah nou rathoki hinou buyu ae veo vei kini pojüyu ki hinou buyu shahutao poloua nou seita peiwure;

¹⁶ae puhnou Rathoki vei kikhu hi thoukhai touyu sanatao ae puhnou lah thoukhai touyu kikhubomü vei dekatao hinou buyu sanatao hai poloua nou veo Sennakherib hisü seita peiwure.

¹⁷Assari hi veo nou Jerusalem hinou buyu veo Hezekiah ye reih panou soure donou Lakhish hinou puhvei reihmai taoli hai seitare. Reihmai sütao hai puhvei dukayu peikho mai asü vei khakhe hinou seita-e. Puletao nou Jerusalem hisü velou reilova nou buyu dzükhao hinou dzü pokou sabanü dzüshaoyu mai vei dzükhao hinou buloure.

¹⁸Süthaisü puletao nou veo Hezekiah sü seiho kue ae veo Hezekiah vei peikho asü: veo vei ki hi peikhowo Helkiah nahpoutu Eliakim; chiku ki hi rü-apeio Shebna; ae Asaph nahpoutu Joah, puhnou veo vei larü veishi hai rüpeiwe; puletao mai asü nou puletaoye sü tapa dao-e.

¹⁹Assaria maivei peikho mai ali nou puletao hisü daisounou veo Hezekiah hai tsüle dushoa nou bue touyu hai puletao vei veo nou sülou nüa buwe tea paoe.

²⁰Puhnou haibüa nou paopue, “Neletao nou chipao lako nou poa reihmai vei dokai ae khouko sü poa lealou süe tea tsüchowu? Neletao nou Assaria maiye dulouzü thaonou neletaoye tave soukha peilou süe tea tsücho-e?

²¹Ejipt mainou neletaoye tave soukha peishulai tea neletao nou tsüchowe, ana sünasü neletao nou vato nou poa süüpo souyu raibüa bailai, süna sü chata-a neletao vei bah khepeia bailai. Ejipt maivei veoye louche-a puhvei soukha khoyu maisü sübütoua bailai.”

²²Assaria maivei peikho maitao nou haibüa paopue, “Molouzü neletao nou neletao vei Ramai MAPAO ye louche-a nou bue tea Etao hi paolaivu? Hezekiah nou MAPAO vei rathoki ae posheelabu kukhe veishi hai souhawua Judah mai hi Jerusalem hinou buyu Rathoki ae posheelabu süna likhei hinou ratho-a bailai tea paoe.

²³Assaria hi veo vei zhih hinou E neletatoye vavawe, süolouzü neletao vei rheipfüyu mai thehai bulouzü Enou neletaoye rhei thehai peilai.

²⁴Neletao hai Assaria maivei peikhomai taikayu nakoutea valou hoe, sübüa bulikhu Ejipt mainou neletaoye rheiluki ae rhei pfüyu maiye seive peishulai tea vuzhia nou bue.

²⁵MAPAO vei soukha loumoa Etao nou neletao vei teidei sü tave reih soua souha-a baie tea neletao tsüchowu? MAPAO vuzünou naletaoye tave souhawo tea ahi paoe.”

²⁶Süthaisü Eliakim, Shabna, ae Joah nou Assaria maivei peikhowo hisü paoe, “Apaopuwo, Aram maivei la nou paopei-a baio, Etao nou süsü chouwe, zhuvea nou Hebrew mai la paopeiso, daiolouzü kivo hinou buyu mai hrülai-a kei-a nou bue.”

²⁷Puhnou chila peie, “Assaria hi veo nou Eye seive chipao haitao paoyu hai ne alia veo likhei donou baie tea ne tsüchowu? Moe, Enou paoyu chipao haisü kivo hinou kei-a buyu mai hrülai, lah vei batoua ae züdzü kere maitao, süsü ne-a loua nou mai hrülaiye donoue.”

²⁸Süthaisü Assaria maivei peikhowo nou lashu loua nou Hebrew maila hinou paichisho-a nou haibüa share, “Assaria hi veo nou chi paoveyu sü neletao-a kei khaio!

²⁹Hezekiah panou neletaoye lalu louso tea veo nou neletao hi paowe. Hezekiah nou neletaoye vupa peilou hoe.

³⁰Puhye panou neletaoye MAPAO nou khailu papeia bailai tea züh louso. MAPAO nou neletaoye khaipei shulai tea tsüchoso, ae puhnou neletao vei teidei hai Assaria maivei reihmaitao hinou vupa peishulai tea tsüchoso.

³¹Hezekiah nou paoyu chi sü kei peiso. Assaria hi veo nou neletaoye nuhdu hinou tapaloua puhvei khakhe hi peithou-o tea kharochi peia nou bue. Sükulouzü neletaoye panou lahvei darkha shithou ae doushi sü toua nou bulai, ae lah neletao vei dzükhao hinou dzü sü ke-a bua bailai;

³²neletao vei teidei rai-a buyu hi, darkha kipei bua nou darkhadzü peiyu ae thoudzü veishoa nou raokhao peiyu; oliv ae oliv theadzü ae laivoudzü buyu teidei hisü veo nou neletaoye save panou hrüloulai. Neletao nou puhvei kharochi zü louzü neletao hai thaimoa hriloulai. Südonou Hezekiahye panou neletaoye souvo peia neletaoye panou MAPAO nou vupa peishulai tea tsücho-a buso.

³³Tyahrü kukhe maitao vei rah kana nou puletao vei maiye Assaria maivei veo bah hinou vupa louyu bue?

³⁴Hamath ae Arpad maitao vei rah sü chuo daiki bue? Sepharvaim, Hena ae Ivvah maitao vei rah khesü deiki vetare? Thaonou Samariaye sü vupa peie?

³⁵Tyahrü haitao vei rah kananou puletao vei maitaoye Etao vei veo bah hinou vupa peige? Neletao daivanou MAPAO nou Jerusalem sü vupa peishulai tea tsücho-a nou bue?”

³⁶Maikhe mai hai veo Hezekiah nou puletao hi paoyu thaifüa raokhai timoa nou zei tea bure, puletao hai chileea raomoe.

³⁷Süthaisü Eliakim, Shebna ae Joah nou puletao vei sabanü hai leveayu donou paiphawure ae Assaria maivei peikho maitao nou paoyu chipao khesü tave veo hisü paopeie.