Read Poumei Naga 2 VEMAITO 19 Bible Online

2 VEMAITO 19 - Poumei Naga bible

2 VEMAITO 19

¹Veo Hezekiah nou ko sükhesü choulou khaie, levea loua nou puhvei sabanü hai paiphawure, ae soukousah nou banou loure ae MAPAO vei Rathoki hisü tare.

²Puhnou veo vei ki hi peikhowo Eliakim, rü-apei maitao hi peikhowo Shebna, ae tsüsoua buyu napao maitaoye panou soukousah banao loua Amoz nahpoutu rachipaolawo Isaiah hisü seitawure.

³Puhnou Isaiah hi chipao hai khesü paopeio tea puletao hi paopeie, “Zhou teithe hai veahoyu teithe ali-e; Etaoye mainou jünüa souvea nou taidei-a nou bure. Etao hai naotumai ali nou nah nare donou souda khaitoua khouko hayu donou nakoulou hoyu büa bure.

⁴Assaria hi veo nou puhvei peikho maiye seive hriyu Ramai ye sü paoshi-a nou bure. Nevei Ramai MAPAO ye sü panou puletao nou paoshi-a buyu khesü chouloua puletaoye tudee peiyu sü soupeio. Sübüa hria buyu Etao vei maitaoye donou Ramai hi veachi paokha peio.”

⁵Isaiah nou Veo Hezekiah vei chipao hai choulouyu phaki,

⁶puhnou chila haibüa nou seidakhaiho peie, “Assaria mainou MAPAO ye paoshi-a puhnou neletaoye vupa peilou hoe tea paopiyu khesü chouloua ngaopiso tea MAPAO nou ne hi paopeio tea paowe.

⁷MAPAO nou Assaria hi veoye sü panou cheche moyu ko ali chouloua lah puhvei teidei hi seidakhai hopeilai, ae puhye sü lahvei teidei hinou maiye panou southawulai.”

⁸Assaria maivei peikho maitao nou veo hai Lakhish thaowua tare touyu ko hai süloure; südonou puletao nou puhye daolai tea dakhai tare, ae veo nou Libnah nuhdu pe hinou reih soua ve ngaoloue.

⁹Sudan hinou buyu Ejipt maivei veo Tirhakah nou puhvei reihmai saloua Assaria maiye soureih soulai tea laire touyu ko hai Assaria mainou choulou khaie, veo nou Judah hi veo Hezekiah hisü haibüa seiko hai seive peie,

¹⁰“Nenou louche-a buyu ne vei Ramai naye panou neletao hai abah hi thaothou peilai moe tea panou neye laluso.

¹¹Assaria vei veo nou tyahrü kukhe maiye souhakhai touyu sü nenou süwe, ae puhnou soulai tea tsüchoda khaitouyu veishi hai souve teloua baiwe. Neletao hai tupa lousüe tea tsüchovu?

¹²Avei puopaoh maitao nou Gozan nuhdu, Haran ae Rezeph nuhdu khesü souhawua sühi hrüyu maitao alia Telasser hinou hrüyu Betheden maitaoye sü southa peie, ana puletao vei rahtao nou puletaoye sü vupa peimoe.

¹³Hamath, Arpad, Sepharvaim, Hena ae Ivvah hi veo maitao sü daiki vetare?”

¹⁴Süthaisü veo Hezekiah nou seiko sünasü kopomaitao hinou poloua phoue. Puhnou seiko nasü poloua MAPAO nou buyu Rathoki hisü pove khaipeire,

¹⁵ae haibüa puhnou veachi paoe, “Oh Israel maivei Ramai MAPAOwo, shouh pfüyu khaonatao pei hinou vebuh soua buyupu, ne likhei nou deiphao hi buyu vedei teitei hai khosa-a nou bubaie. Nenou ratei ae deiphao sü soupeie.

¹⁶Chuo MAPAOwo, Sennakherib nou hriyu Ramai ye paoshi-a buyu khesü keipei khaio.

¹⁷Oh MAPAOwo, Assaria hi veo nou tyahrü alao hai souhawua puletao vei teidei hisü panou mai hrümoa bure touyu ko khesü Etao nou süwe,

¹⁸ae puhnou puletao vei rahtao hai meideilai peiwure— rah sütao hai checheyu rah moe, daiolouzü deiphao mai bah nou süsü süü ae chuh nou poa soukhai toua baie.

¹⁹Südonou Etao Ramai MAPAOwo, Etaoye Assaria mai bah hinou vupa peio, sükulouzü deiphao mai hrülai nou ne likhei Ramai MAPAO sü baie touyu hai süloulai.”

²⁰Süthaisü Isaiah nou Hezekiah hi haibüa chipao hai paove-e, “Israel maivei Ramai MAPAO nou haibüa paoe: Nenou Assaria hi veo Sennakherib donou veachi paoyu sü Enou chouloure.”

²¹MAPAO nou puhye donou haibüa paoe, “Jerusalem nuhdu nanou Sennakherib, neye ngaora-e ae neye konüa bure.

²²Nenou paoshi-a ae konüa buyu nasü thaoge tea ne tsücho-e? Sheeyu Israel maivei Ramai Eye sü nenou tsükhou peimore.

²³Nevei kopomaiye seive ahi khaophu souyu chipao hai paore ae nevei rheilukitao alia nevei reihmaitao nou Lebanon hi kukayu deichi khesü veiloue. Nenou khaophu soua kukayu sedar süübe ae veikayu Cypress süübe khesü vikhao loure ae thoukayu vaohro hisü louloure tea nou paolure.

²⁴Nenou khaophu soua vakou maivei teidei hinou dzükhao heloua dzü sü keloue ae nevei reihmaitao nou Nail reidzü hai taithe loure tea paore.

²⁵“Enou hai khesü raichoki nou tsücho dakhai toue touyu sü ne sümovu? Hai khesü Enou chu panou vepa-a bubaie. Neye panou nuhdutao soushi souha louyu khouko sü Enou ne hi peia baie.

²⁶Nuhdu sütao hinou hrüa buyu maitao hai khouko ha-e, puletao panou ngaopia khupasoua nou bupeie. Puletao hai dou hinou paopayu pounghoudai ae kiphao hinou paopayu poudai ali hai teikhai teiru ashi veyu phaki hatayu büa baie.

²⁷“Ana nenou buzüyu ae tapa talouyu veishi hai Enou sükhai touwe alia nenou Eye hraiyu teitei-a Enou süwe.

²⁸Nenou Eye paoshiyu ae nevei khaophu teitei hai Enou chouwe, südonou chuo Enou neye sü nghouvou loulai ae ne mü phuloua nou nenou veyu ludu hinou neye sü sa-a dakhai tawulai.”

²⁹Süthaisü Isaiah nou veo Hezekiah hi paoe, “Nenou haibüa shee soupeiyu khesü ngaolai. Khaipo ae daokou po nasü lah paopayu shinamara sünou toua bulai; süthaisü po asü kousü neletao nou taimou hai daothouloua nou chachilai, ae darkhabe hai shothouloua nou rashi khesü haitoulai.

³⁰Judah teidei hinou hrüa buyu maitao hai rashibe ali nou dei aveih hi maa tsülouloua rashithou shipeiyu büa hrülai.

³¹Jerusalem ae Zion deichi vanou shokhaitoua buyu maitao hinou maihrü hai kaapalai, daiolouzü MAPAO nou sübüa soupeilai tea lela loure.

³²“MAPAO nou Assaria hi veo donou haibüa paoe, ‘Puhnou nuhdu haina hisü loulai moe, moa voulouthou ali koute-a kavulai moe. Reihmaitao hai mai ali koute-a rüh pfüa nou nuhdu hai navei nghiki hai koulai moe, moyuma nuhdu hai naye soureih soure donou chaobu hai soulai moe.

³³Puhnou nuhdu hisü loumoa nou puhnou veyu ludu hinou puh hai dakhai ta-a bailai. MAPAO Enou haisü paowe.

³⁴Enou nuhdu hai nasü lah avei kathe donou ae Enou avei kilai David hi chaachou soukhai touyu donou vupeilai ae khopeilai.’ ”

³⁵Süzhou khei hai MAPAO vei rakivamai nou Assaria maivei fühao hinou buyu reihmai 185,000 hai southawure. Teithepayu phaki buh sühisü thaiphao khaikho baire.

³⁶Süthaisü Assaria hi veo Sennakherib hai lah vei ki hilo dakhaiho Nineveh hi bure.

³⁷Teithe ali rathoki hinou puhnou puhvei Nisroch rahye tho-a buyu hinou, puh nahpoutu ahai, Adrammelekh ae Sharezer nou khoche poloua puhye sü daothawure, sübüa puhai nou Ararat maivei teidei hi tuho butare. Puh nahpoutu ali Esarhaddon nou puh thaosou pa vekou loue.