Read Poumei Naga 2 VEMAITO 20 Bible Online

2 VEMAITO 20 - Poumei Naga bible

2 VEMAITO 20

¹Teile süphaki veo Hezekiah hai sou loure ae thainore, Amoz nahpoutu rachipaolawo Isaiah nou puh hi paoe, “Nevei kihi kaomoyu teitei sü souzü khailo tea MAPAO nou paoe, daiolouzü ne hai thai-a bailaire.”

²Hezekiah nou kivo hilova reiloua nou haibüa veachi paoe,

³“Oh MAPAOwo, Enou chilee cheche-a nevei kuvah hai avei hrümamai veishi nou peia soupeiyu khesü licho peio, ae nenou jüpayu vah khesü soupeire donou Enou teisa nou te-a soua buyu khesü süpeio.” Sübüa puhnou veachi paowua puh hai levea shopoa nou krare.

⁴Isaiah nou veo ye thaowua tare, ana puhnou veo vei ki fühao nasü tala loumo jünou MAPAO nou puh hi paoe,

⁵“MAPAO vei maikhe maiye khopei-a buyu veo Hezekiah hisü dakhailou haibüa paopeio; ‘Nevei puopaoh David vei Ramai MAPAO Enou nevei veachi sü chouloure, ae nevei ngheidzü kouyu sü Enou ngaoloure. Enou neye sü souvei peilai, ae teithe asü lüvai hinou nenou Rathoki hisü veloulai.

⁶Enou neye po kiangou hai panou hrüre donou thoupu peire. Enou neye alia Jerusalem nuhdu hai nasü Assaria maivei veo hinou vupa peilai. Enou nuhdu hai nasü avei zhih donou ae Enou avei kilai David hi chaachou soukhai touyu donou vupa peilai.’ ”

⁷Süthaisü Isaiah nou veo vei kuvah soua buyu maitao hi doushi nou soukhai touyu pou nanou cho payu zhimü hisü pokou napeio, sükulouzü puh sü veiloua bailai.

⁸Veo Hezekiah nou paoe, “MAPAO nou Eye souvei peilai touyu alia teithe asü shosü Enou Rathoki hi veloulai touyu shee daige?”

⁹Isaiah nou haibüa chila peie, “MAPAO nou paokhai touyu nasü panou vete loure donou neye sü shee hai peilai. Phiheadou hi khungu phukouyu nasü panou phika kirou hai pahlova kouyu nanou ne jüpaho thailova thaikhai tayu nanou ne jüpage?”

¹⁰Hezekiah nou chila peie, “Khungu hai pahlova phika kirou kouyu hai-a tala hie, südonou khungu nasü panou thailova dakhai takhaio.”

¹¹Isaiah nou MAPAO hi veachi paopeie, ae MAPAO nou khungu nasü veo Hezekiah nou phiheadou soukhai touyu hinou phika kirou hai panou thaikhai tapeie.

¹²Teile süphaki Babilon hi veo Baladan nahpoutu Merodakh Baladan nou veo Hezekiah hai souloure she touyu ko hai chouloure, südonou puhnou seiko ae sapeina noupu puh hi seive peie.

¹³Kopoyu maitaoye sü Hezekiah nou süloue, ae puletao hi puhvei kini khesü pongao-e— Puhvei shahu ae sana, puhvei poukai nüvei, ae theadzü poa va nayu alia puhvei reih basei teitei hai pongao-e. Vedei hinou buyu na veishi hai puhnou pongao moyu aliro hazei toure.

¹⁴Süthaisü rachipaolawo Isaiah nou veo Hezekiah hi tave haibüa noue, “Mai haitao hai buh daiki nou vewe ae puletao nou daichi paowe?” “Puletao hai buh doushoyu Babilon teidei hinou vewe,” tea Hezekiah nou chila peie.

¹⁵“Puletao nou vedei hai hinou dai-e ngaoloue?” “Puletao nou ha veishi hai ngaokhai touloure. Puletao hi Enou ngaomoyu halia hazei toure,” tea Hezekiah nou chila peie.

¹⁶Süthaisü Isaiah nou veo hi paoe, “Khoukhoulai MAPAO nou haibüa paoe,

¹⁷‘Nevei puopaoh maitao nou daoh nou zhou koute pojükhai touyu nangi teitei hai Babilon hi potuyu teile ali velai. Haliro shokhai peilai moe.

¹⁸Nevei nahmai kamai-a Babilon hi nüpove dzülawua panou veo vei ki hinou vah soulai.’”

¹⁹Veo Hezekiah nou puhvei hrümamai hiolouzü kaonayu sü bulai hie touyu hai süloua puhnou haibüa chila peie, “MAPAO vei chipao nenou ahi paopeiyu sü vei-a baie.”

²⁰Veo Hezekiah nou soupfüyu vah teitei, ae puhnou khuvei sho-a souyu vahtao ae puhnou dzükhao souloua nuhdu hi lao valoua dzü poveyu teitei hai Judah maivei Vemaitao vei Hrüko Larübvü hi rüthou peikhai toue.

²¹Hezekiah sü thaitare ae puh nahpoutu Manasseh nou puh thaosou pa vekou loue.