Read Poumei Naga 2 VEMAITO 22 Bible Online

2 VEMAITO 22 - Poumei Naga bible

2 VEMAITO 22

¹Josiah nou po acha payu phaki, puhnou Judah hi vekou loue ae puhnou Jerusalem hinou po shiali hai veo soue. Puh pfü hai Adaiah nah naotupai Jedidah toue ae puhsü Bozkath maipfüe.

²Josiah nou MAPAO nou jüpayu vah haso khesü soupeie; puhnou puh paoh David veo nou tayu zhaibüa hrüe ae Ramai vei chikha veishi hai züre donou soue.

³Puhnou veo soulouyu po kiacha kousü veo Josiah nou rü-apeio hi peikhowo Meshallam tyao, Azaliah nahpoutu Shephan hi haibüa kharochi peia Rathoki hi seita-e:

⁴“Napao Peichana Hilkiah hi taho maikhe mainou Rathoki soupure donou pousha sü kabüa napao maitao hi peikhai toue touyu khesü polo.

⁵Pousha taosü poloua Rathoki soupuyu maitao hi peio tea puh hi paopeio. Puletao nou pousha sütao hai poloua

⁶süüvah souyu maitao, ki souyu maitao, chuhvah souyu maitao, ae süü alia chuh hüloua Rathoki soupure donou peilai.

⁷Rathoki soupuyu hi khopeia buyu maitao hai tsüle sheesha touwe, südonou pousha khesü kabüa souhawure tea palouyu zhure hai komoe.”

⁸Shaphan nou veo vei kharochi hai Hilkiah hi paopeie, ae Hilkiah nou puh hi Chikha Larübvü nasü Rathoki hinou ngaoloure tea paopeie. Hilkiah nou larübvü nasü puh hi peie, ae Shaphan nou sünasü phou-e.

⁹Süthaisü puhnou veo hi dakhaiho ko khesü paopeie: “Nevei kilai Enou rathoki hinou buyu pousha sü poloua rathoki soupuyu hi kho-apei maitao bah hisü thoure.”

¹⁰Puhnou süthai-a haibüa paopue, “Hilkiah nou Eye peikhai touyu larübvü nasü hai hi bue.” Puhnou larübvü nasü veo hi paichi sho-a phoungao peie.

¹¹Veo nou süsü choulou khaie, levea loua nou puhvei sabanü hai paiphare,

¹²Ae haibüa puhnou napao Hilkiah, Shaphan nahpoutu Ahikam, Mikaiah nahpoutu Akhor, Shaphan, ae veo vei kuvah souyu Asaiah hisü haibüa kharochi peie:

¹³“Taho Eye donou ae Judah hinou hrüa buyu maitao donou larübvü hinou paodoupei khaitouyu khesü kabüa soulai tea MAPAO hinou noupei khaio. MAPAO nou Etao pei hi raroua bulaire, daiolouzü Etao vei puopaoh maitao nou larübvü hinou soulo tea paokhai touyu khesü soupfü peilou more.”

¹⁴Hilkiah, Ahikam. Akhor, Shaphan, ae Asaiah puletao nou Jerusalem hi fü ashu soukhai touyu hinou hrüa buyu rachipaola pfüpai Huldah hisü taho kabülai tea noutare. (Honapai vei kipuo hai Harhas tyao, Tikvah nahpoutu Shallum toue, ae puhnou rathoki vei naazao khesü kho-e.) Puletao nou honapai hisü kabüa vepare touyu khesü paongao peie,

¹⁵ae honapai nou puletao hisü veo hi dakhaiho haibüa MAPAO nou paoe tea nou paopeio, “Enou Jerusalem ae sühinou hrüa buyu mai hrülaiye sü larübvü hi rüthoukhai touyu, veo nou chouyu büa tudee peilai tea bure.

¹⁷Puletao nou Eye sü malaiwure, ae rah kukhe hi posheela hai posheela peire, sübüa puletao nou avei lekhasü soupa peire. Südonou avei lekha rarou sü Jerusalem pei hi bure, ae sünasü khaitalai moe.

¹⁸Ana veoye donou louzü, Israel maivei Ramai MAPAO Enou paoe: Puhnou larübvü hinou rüpeikhai touyu khesü choulouyu phaki,

¹⁹puhnou ledaloua anghoujü nou nakou loure, ae Enou Jerusalem ae sühinou hrüyu maitaoye paopi pei-a tudee peilai touyu khesü süloukhai, puhnou kra-a puhvei sabanü hai paipha loure. Enou buh hai nasü ngaopi shoyu buh ali soupeilai, ae maikhe maiye panou zhih hai nasü chaa ali soua polai. Ana puhnou veachi paoyu sü Enou choure,

²⁰ae Enou Jerusalem ye tudee peilaiyu hai puh thaiyu thainou soua bailaire. Enou puhye sü panou kaona-a thai loulai.” Puletao nou veo Josiah hisü chipao haitao koa nou dakhai ve-e.