Read Poumei Naga 2 VEMAITO 24 Bible Online

2 VEMAITO 24 - Poumei Naga bible

2 VEMAITO 24

¹Jehoiakim nou veo soua buyu teile hinou, Babilon hi veo Nebukhadnezzar nou Judah teidei hisü reih huloure, ae po asü koute Jehoiakim ye panou puhvei khakhe hinou hrüe; süthaisü Jehoiakim nou puhye khaitya pare.

²MAPAO nou Babilon, Sairia, Moab ae Ammon maitao vei reihmaime hai puhnou puhvei kilai rachipaola peiyu maitao nou paopeiyu büa panou Jehoiakim ye soureih soua Judah teidei hai souhare donou seive peie.

³MAPAO vei kharochi thaipfüa Judah hi maitao hai puhvei nghingao hinou souha laiwure donou hai khesü vepare, daiolouzü veo Manasseh nou mahmo soukhai touyu donou,

⁴ae matsü tsülai soua puhnou mah ali-a hayu maitaoye southayu donou hai khesü panou vepare. Manasseh nou soukhai touyu mah haisü MAPAO nou khaipeilou hore.

⁵Jehoiakim nou soupfüyu vah veishi hai Judah maivei Vemaitao vei Hrüko Larübvü hi rüthou peikhai toue.

⁶Jehoiakim hai thaire ae puh nahpoutu Jehoiakin pa puh thaosou vekou loue.

⁷Ejipt hi veo ae puhvei reihmaitao hai Ejipt teidei hinou vakou tapa more, daiolouzü chuo Babilon veo nou Ejipt mainou khasa-a hrüyu teidei teitei, Euphratis rei hinou poa Ejipt maivei deirai reilova khete hai khasa-a buloure.

⁸Jehoiakin nou Judah hi pa veo soulouyu phaki, puh hai po kiacha pare, ae puhnou Jerusalem hinou khouh asü hai veo soua nou bue. Puh pfü hai Jerusalem hinou buyu Elnathan vei nahnaotu Nehushta toue.

⁹Puh puo nou tayu zhaihrü bütoua Jehoiakin nou MAPAO vei nghingao hinou mahmo khesü soure.

¹⁰Puhnou veo soua buyu teile hi Babilon maivei reihmaime, Veo Nebukhadnezzar vei reihmai peikhoyu maitao nou süthaisa-a Jerusalem hisü reih huloure, ae nuhdu sünasü poloure.

¹¹Puletao nou nuhdu nasü polouyu phaki, Nebukhadnezzar-a Jerusalem hisü ve-e,

¹²ae veo Jehoiakin nou puh pfü, puhvei nahmaitao, peikhomaitao, ae veo vei ki hinou peikho soua buyu maitao hai saloua nou Babilon mai bah hi peithouwure. Nebukhadnezzar nou veo soulouyu po acha kousü, puhnou Jehoiakin hai hukhamai soua nüloure.

¹³ae Rathoki hinou buyu ae veo vei ki hinou buyu kini teitei hai Babilon maivei teidei hi potare. MAPAO nou rai-a paopeikhai touyu büa Nebukhadnezzar nou Veo Solomon nou Rathoki hi poa vah soure donou sana nou soukhai touyu paikhao khesü daphe daphowure.

¹⁴Nebukhadnezzar nou Jerusalem hi maitao, veo vei nahmaitao ae süthai-apei mai hrülai hai hukhamai soua nüpoa tare, puletao hai mai thekirou-e. Süpei hinou puhnou vah soulou süyu mai ae hu kuyu mai hrülai-a nüpoa takhai toure. Judah teidei hisü lülou hoyu maitao ae touhayu maitao daotu likhei hai shokhai peia baie.

¹⁵Nebukhadnezzar nou Jehoiakin ye sü koa puh pfü, puh chapfü maitao ae Judah teidei hinou süthai-apei maitao koa hukhamai soua Babilon hi nüpoa ve khaiwure.

¹⁶Nebukhadnezzar nou matsüyu mai hrülai hai Babilon hi nüpoa ve khaire, puletao hai mai thenai-e, ae vah soulou süyu mai theli, sühisü hu kuyu maitao ae pfüphao veisho-a soureih soulouyu maitao-a loua nou nüpoa ve khaire.

¹⁷Nebukhadnezzar nou Jehoiakin puo thaihou Mattaniah ye panou Judah hi veo soure donou doloure, ae puh zhih hai Zedekiah tea sadapeie.

¹⁸Zedekiah nou Judah hi veo soulouyu phaki, puh hai po kaili pare, ae puhnou Jerusalem hinou po kiali hai veo soue. Puh pfü hai Libnah nuhdu hinou hrüyu Jeremiah nah naotupai Hamutal toue.

¹⁹Veo Zedekiah nou veo Jehoiakim bütoua MAPAO vei nghingao hinou mahmo khesü soure.

²⁰MAPAO nou Jerusalem ae Judah teidei hinou hrüyu maitao hi rarou leloua puletaoye sü puhvei nghingao hinou souhawure.