Read Poumei Naga 2 VEMAITO 5 Bible Online

2 VEMAITO 5 - Poumei Naga bible

2 VEMAITO 5

¹Sairia maivei reihmai peikhowo Naaman hai Sairia hi veo nou tsükhou sho-a nou matsü shoa poyu mai ali soue, daiolouzü puh vanou MAPAO nou Sairia maiye sü veilouyu hai peie. Puh hai soureih veishoyu reihmai ali-e ana puh sü loukhaora souloure.

²Sairia mainou raichoki vuli Israel maiye soureih sou-a naotumai taitou liye sapoa nou tare ae honapai nou Naaman vei maipfü kilai soue.

³Teithe ali honapai nou puhvei paopai hisü paoe, “Avei paopuye panou Samaria hinou buyu rachipaola-apei na hisü Ewo panou tanüwe. Puhnou puhvei sou sü souvei peilou süe.”

⁴Naaman nou ko haisü choulou khaie, puhnou nahnaotupai nou paoyu chipao sü taho veo hi paoe.

⁵Veo nou puh hi paoe, “Seiko hai nasü poloua nou Israel maivei veo hisü ta-o.” Südonou Naaman nou shahu theshirou, sanake therou ae veikayu sabanü lea-a nou naolou veiyu kirou hai poloua nou tare.

⁶Puhnou poa tayu seiko nasü haibüwe: “Seiko hai nanou avei peikhowo Naaman hai thao-e touyu sü paopeilai. Enou neye puhvei sou nasü panou souvei peiyu hai jüpawe.”

⁷Israel hi veo nou seiko sünasü phou louyu phaki, puhnou levea lou-a puhvei sabanü hai paiphawure ae haibüa paoe, “Sairia hi veo nou kabüa Eye mai haina vei sou sü souvei peio tea paosa? E hai Ramai-e, maiye souhrilou süyu ae southalou süyu khouko sü ahi bue tea puhnou tsüchoho? Moe, puhnou Eye vamoa züveire donou do ashi hai nasü soua nou baie!”

⁸Rachipaolawo Elisha nou ko hai khesü choulou khaie, puhnou veo hisü haibüa chi paota-e: “Ne daisounou leveawe? Puhye sü ahi seive khaio ae Enou puh hi Israel maivei teidei hi rachipaola peiyu mai bue touyu sü soungao peilai!”

⁹Südonou Naaman nou puhvei rheitao ae rheiluki khesü pfüloua tare ae tave Elisha vei kikhubomü hinou chaore.

¹⁰Elisha nou puhvei kilai aliye seipa puhye taho Jordan Rei hinou bakha anai hai dzü khüsheelo, sükulouzü puhvei sou nasü veiloua bailai tea paopeie.

¹¹Ana Naaman nou sütea paopei khai-e, rarou sholoua haibüa paoe, “Puhnou kijü tapaloua puhvei Ramai MAPAO zhih hinou avei sou nasü zhuloua veachi paopei shulai ae Eye souvei peishulai tea Enou tsücho-e.

¹²Damaskas hinou buyu Abana ae Pharpar reidzü hai Israel maivei reidzü jünou veipu hi mowu? Enou rei sütao hinou dzü sü khüloua veiloua bailai!”

¹³Puhvei kilai mai ali nou puh hisü takouloua nou paoe, “Apaopuwo, rachipaolawo nou neye tatei shoyu vah ali soulo tea paopei louzü, sünasü nenou souloua bailai. Daisounou puhnou neye taho dzü khüloua veilo touyu sü soulou hoyu bue?”

¹⁴Südonou Naaman nou Jordan rei hisü koutare, ae Elisha nou paoyu büa puhnou reidzü hinou bakha anai hai dzü daloure, ae puhvei sou sü veikei touloure. Puhvei souketao hai nahmaitou ali vei vasou büa veishore.

¹⁵Puhnou Elisha hisü puhvei mai hrülaiye saloua nou dakhai ve-e ae puhnou puh hi paoe, “Chuo Enou süloure, rah kukhe ali-a ha-e, ana Israel maivei Ramai likhei bua baie; südonou zhuvea nou Enou sapeina peiyu haitao sü polo.”

¹⁶Elisha nou chila peie, “Hria buyu MAPAO, Enou puhvei kuvah souyu na zhih hinou chaachou sou-a paowe, süolouzü Enou nevei sapeina khesü polai moe.” Naaman nou puhye polou laiwo tea paokhaikhai-e, ana puhnou pobare.

¹⁷Südonou Naaman nou paoe, “Nenou avei sapeina khesü polai moe toulouzü, Eye panou hai hi buyu deinai khesü koupo ahai sü aki hi panou pfütawo, daiolouzü chuo Enou rah kukhe lihi posheela khesü meidei-a peipu khailai more, MAPAO hi likhei posheela hai peia bailaire.

¹⁸Enou Sairia mai vei rah, Rimmon rathoki hinou veoye koa rathoyu sü MAPAO nou Eye panou khaipeio. MAPAO nou Eye khaipei vuzü shulai!”

¹⁹“Kaona-a nou ta-o,” tea Elisha nou paopeie ae Naaman sü tare. Naaman nou daotuli takouyu phaki,

²⁰Elisha vei kilai Gehazi nou lah puh hi haibüa paoe, “Avei paopu Elisha nou Naamanye sü panou halia peimoa tare. Sairia puona nou puhye peiyu na khesü puhnou polouyu kao-e. Hria buyu MAPAO vei zhih hinou, E tuho puh hinou ha daotuli hai poloulai.”

²¹Südonou puhnou Naaman thaihu tare. Naaman nou mai ali hai puletao hi tukouyu sü ngaolou khaie, puhnou puhvei rheiluki sü chaoloua puhye “Vei-a bai homoe, daitouwe?” tea puh hi noue.

²²Gehazi nou chila peie, “Vei-a baie, ana chubü hinou Ephraim maivei deichi hinou rachipaolayu maime ali veloure, südonou avei paopu nou Eye seive ne hi paopeio ae puhye shahu thesü ae sabanü ahai peio tea nou paoe.”

²³“Shahu therou polo,” tea Naaman nou chila peie. Puhnou süsü polo tea lekhabvü ahai hi thou müphu peiwure ae sabanü dayu ahai sü puhvei kilai mai ahaiye panou pfüloua Gehazi jünou rai-a tare.

²⁴Puletao nou Elisha nou buyu deichiva veyu phaki, Gehazi nou shahu vei lekhabvü ahai sü poloua puhvei ki hi polou khailoure. Süthaisü puhnou Naaman vei kilai mai ahai sü seidakhai tawure.

²⁵Gehazi nou puh ki hisü veloure ae Elisha nou puh hi noue, “Ne daikilo vetage?” “E haki lihia tamoe,” tea puhnou chila peie.

²⁶Ana Elisha nou paoe, “Mai ali nou puhvei rheiluki hinou takouloua neye chayu phaki avei rako sü buh sühi bumovu? Chu teile hi hai mai hinou pousha ae sabanü, oliv theadzü ae rashidzü, zhaotu ae kikhaorü moyuma qila maiye mai hinou polouyu teilevu?

²⁷Chu thainou Naaman vei sou nasü ne hi ae nevei tyaosholea maitao hi teisa nou bua bailai.” Gehazi nou tayu thai, puhnou sou nasü souloure, puhvei hee veishi hai vüra bütoua kaapha ture.