Read Poumei Naga 2 VEMAITO 6 Bible Online

2 VEMAITO 6 - Poumei Naga bible

2 VEMAITO 6

¹Teitheli rachipaola peiyu maime ali nou Elisha hi vamoa nou haibüa paoe, “Etao nou buyu buh hai Etaoye donou tailere!

²Etaoye panou Jordan reipe hinou taho ki soure süü khesü phoulo.” “Taho phoulo,” tea Elisha nou chila peie.

³Rachipaola peiyu mai ali nou puhye koa talaishe tea kutei touloure; puh-a aetoure,

⁴ae puletao hai koa nou tare. Puletao nou Jordan reipe hisü veloua nou vah sü soutare.

⁵Mai ali hai süü dao-a buyu hinou puhvei reipha sü dzü hi deloure. “Apaopuwo, E chuo daisoulai?” tea puhnou Elisha hi paoe. “Marei süna hai mai vei baie!”

⁶“Buh daiki deloure?” tea Elisha nou noue. Mai sünanou puhvei mareipha delouyu buh sü Elisha hi ngaopeie, ae Elisha nou süü ali jüdeloua buh sühisü laithou peie, ae marei sü dzü pei hi phaopare.

⁷“Marei nasü polo,” tea Elisha nou paopeie, ae mai nanou nakou marei sü poloure.

⁸Sairia hi veo nou Israel maiye soureih soue. Puhnou puhvei peikho maitao hinou nouloua puletao vei fühao sü souloua nou bue.

⁹Ana Elisha nou Israel maivei veo hisü buh sütao pehao hi veso tea paopi peie, daiolouzü Sairia mainou puletaoye da-a nou bue.

¹⁰Südonou Israel maivei veo nou buh sütao hinou hrüa buyu maitao hisü paopi peie ae puletao nou reihkhao soua buloure. Haibüyu hai vu taoli pare.

¹¹Sairia hi veo sü hai vanou levea sholoure, ae puhnou peikho maitaoye sü kuloua nou puletao hi noure, “Neletao thao mainou Israel maivei veo hisü bue?”

¹²Puletao mai ali nou haibüa chila peie, “Oh puo veo, Etao mailia sübü moe, rachipaolawo Elisha nou Israel maivei veo hisü nenou souyu vah veishi ae kheikhei soua nenou paoyu chi veishi paopeia baiwe.”

¹³“Puhye sü buh daikinou bue touyu sü phoupalo ae puhye sü Enou nüloulai,” tea veo nou kharochi peie. Elisha hai Dothan nuhdu hinou bushe touyu ko hai veo hi paopeikhaie,

¹⁴puhnou reihmai taoli panou rhei ae rheiluki khesü pfüloua panou tare. Puletao nou nuhdu sühisü khei nou velouloua sühao loure.

¹⁵Thainesho shona hai Elisha vei kilai mai ali nou tashuloua kijü payu phaki, puhnou Sairia maivei reihmaitao nou nuhdu sü sühao loua ngaoloure. Puhnou kikha hi dakhailou Elisha hi paoe, “Apaopuwo, Etao sü haka chere! Etao daisoulai?”

¹⁶Elisha nou haibüa chila peie, “Ngaopiso, daiolouzü Etaoye kozho peire mai hai puletao jünou pouhie.”

¹⁷Süthaisü puhnou haibüa veachi paoe, “Oh MAPAOwo, puhvei ngheithou sü souhepa peikhaio, sübüa puhye panou ngaolou khaio!” MAPAO nou puhvei veachi sü keipeia puhvei kilai naye panou deichi veishi hi ae Elisha vei pehao teitei hisü mei vei rheitao ae rheiluki khesü zhingao loure.

¹⁸Sairia maitao nou puhye nülai tea kouyu phaki, Elisha nou veachi paoe, “Oh MAPAOwo, puletao vei ngheithou sü soucha peio.” MAPAO nou puhvei veachi sü keipeie, ae puletao vei nghithou sü soucha peiwure.

¹⁹Süthaisü Elisha nou puletao hi paloua nou paoe, “Neletao vei ludu sü kaomore, neletao nou phouyu nuhdu nasü haimoe. Athai fülo, Enou neletaoye sü neletao nou phoua buyu mai naye save ngaopeilai.” Sübüa puhnou puletaoye sü Samaria hi save peire.

²⁰Puletao nou Samaria nuhdu hi talou louyu phaki, Elisha nou haibüa veachi paoe, “Oh MAPAOwo puletao vei ngheithou sü souhepa peio, ae puletaoye panou hangaolo.” MAPAO nou puhvei veachi keipeie; Puh nou puletao vei ngheithou sü souhepa peie ae puletao nou puletao hai Samaria nuhdu hinou bua nou ngaoloure.

²¹Israel maivei veo nou Sairia maitaoye ngaolouyu phaki, puhnou Elisha hi noue, “Apaopuwo, Enou puletaoye southa laiho? Puletaoye southayu veiho moe?”

²²Elisha nou puh hi haibüa chila peie, “Southaso. Nenou nülouyu reihmai ali koute-a southaso. Puletaoye touso sü peio ae panou lah puletao vei veo hisü dakhai veta-o.”

²³Südonou Israel maivei veo nou puletaoye panou khonüh nüloure; puletao nou touso chelouyu thai, puhnou puletaoye sü Sairia maivei veo hisü seidakhai tapeiwure. Süthai hai Sairia mainou Israel mai hi soureih souvepu more.

²⁴Phateile daotu buyu thaisü, Sairia hi veo Benhadad nou puhvei reihmai hrülai hai saloua nou Israel maiye reih soure ae puletao nou Samaria sü haoloure.

²⁵Südonou nuhdu hisü touso hai chelujü shore, sübüa rheisüh pei ali hai shahu raicha ae vupou mu hai gram kaih ahai hinou shahu angou peie.

²⁶Süteile hi Israel maivei veo nou nuhdu vei kivo hinou sühao tayu phaki naotumai ali nou haibüa kra-a paore, “Apou veo, Eye soukha peio!”

²⁷Puhnou haibüa chila peie, “MAPAO nou neye soukha peimoyu thaisü, Enou neye kabüa soukha peilou khailaige? Ahisü southou moa darkhazhaoh ali-a ha-e!

²⁸Nenou veayu sü daivanoue?” Honapai nou chila peie, “Naotupai hai nenou ahi avei nahtou nasü koa khotou laishe, ae süthai sü puhvei nah hai toulai tea ahi paoe.

²⁹Südonou ahai nou avei nahpoutu nasü khotou loure, süthai thainesho hai puhvei nahpoutu neye koa khotoulai touyu phaki, puhnou puhvei nahpoutu nasü poku loure.”

³⁰Veo nou haisü choulou khaie, puhvei sabanü hai levea loua nou paiphawure, ae süpehao hinou buyu maitao nou veo vei sabanü paiphayu phaki, veo vei sah khenou soukousah nou banao-a nou zhingao-e.

³¹Puhnou haibüa shapaoe, “Zhou teithe hinou Enou Elisha vei pei daode loumoyu thaio MAPAO ye panou Eye southa-o.”

³²Südonou puhnou Elishaye nüloure donou kopomaiye seitawure. Süphaki Elisha hai puhvei ki hinou puhye ve chayu tsümai daotuli hai koa nou bue. Veo vei kopomaitao nou veloumo jünou, Elisha nou tsümaitao hi paoe, “Maiye southayu nanou Eye southare donou maiye sü seivere! Puletao nou hai hi veyu phaki, kikhu sü khulo ae puletaoye panou kihikha talouso, veo-a puletao vei thailova nou koa lai-e.”

³³Puhnou chi sütao hai paoche louyu thaibü, veo nou tave loua haibüa paoe, “MAPAO nou Etao hi haibüa veahoyu teitei sü pove peia baie. Chuo E daisounou puh vei vuh sü khopua nou bukou laige?”