Read Poumei Naga 2 VEMAITO 8 Bible Online

2 VEMAITO 8 - Poumei Naga bible

2 VEMAITO 8

¹Elisha nou nahpoutu souhri peiyu nahpfüpai hisü paoe, “MAPAO nou teidei hai hisü tokaa seive peilaire ae haisü po anai koutelai, südonou nevei kihikha maiye saloua buh kukhe hinou hohrüta-o.”

²Südonou Elisha nou paopeiyu thaifüa honapai nou puhvei kihikha maiye saloua Philistin maivei teidei hinou po anai koute hai hrütare.

³Po anai cheyu thaisü honapai nou lah Israel maivei teidei hisü ve honapai vei ki-lu hai puh hi dakhai peio tea khore.

⁴Veo hai süteile hi Elisha nou khupayu vah soukhai touyu khesü Elisha vei kilaio Gehazi hinou noua nou bue.

⁵Elisha nou thaiyu hinou souhri peiyu ko na hai Gehazi nou veo hi pao-a buyu teile hinou naotupai nou veo hisü puhvei akho nahai paongaolai tea taloure. Gehazi nou veo hisü paoe, “Apuo Veowo, Elisha nou souhri peiyu nahpoutu nasü puh pfüye koa hai hi bure!”

⁶Ae veo nou naotupai hi nouyu chi khesü honapai nou veo hi paokhai toupeie. Südonou veo nou puh khehinou vah souyu mai aliye kuloua paoe, “Honapai vei ki-lu teitei ae honapai nou teidei thaokhaiwua tayu nou zhou koute, süsü po anai hi puhvei dei hinou ngaolouyu thoudzü teitei vei muma noupu honapai hi lukhai peio.”

⁷Elisha nou Damaskas hi veyu phaki, Sairia hi Veo Benhadad hai soua nou bue; ae veo hi rachipaolawo Elisha sü hai hi vewe tea ko hai paopeiyu phaki,

⁸Veo nou puhvei peikhomai ali Hazael touyu na hisü paoe, “Ne sapeina sü poloua rachipaola peiyu mainaye sü taho daopeio, ae puhye nou MAPAO hinou E souyu hinou veilaiho veilou hore touyu sü noupeio tea paopeio.”

⁹Südonou Hazael nou Damaskas hinou payu na veikayutao hai racho raidei vei koupo souloua Elisha sü daolai tea tare. Hazael nou puhye daoloua nou haibüa paoe, “Ne kilai veo Benhadad nou Eye seive ne hinou puh hai veilou süho veilou hore touyu sü noukhaio tea seivewe.”

¹⁰Elisha nou chila peie, “Puh hai thai-a bailai tea MAPAO nou ahi paongaowe, ana puh hi tave puh hai veiloua bailai tea paopeio.”

¹¹Süthaisü puhnou Hazael ye khaoshisho poa nou zhutei touloure, ae Hazael hai pah pfükhaire buh hare, sübüa Elisha nou shusou poa nou kra pare.

¹²“Apaopuwo ne daisounou krawe?” tea Hazael nou nouwe. Elisha nou chila peie, “Daiolouzü nenou ngaopi shoyu vah haso khesü Israel mai pei hi soupei laiyu sü Enou süwe. Nenou puletao vei reihkhaobu khesü meidei peilai, nahlemai hrülai sü southa peilai, nahtou maiye sü soude sousasa peilai alia nahpfüyu maiye sü pou hinou nahtou hai popa peilai.”

¹³Hazael nou haibüa chila peie, “Esü hazho toulia moyu mai ali baie, kabüa vah sübüyu adu khesü soulou khailaige?” “Nenou Sairia hi veo soulai tea MAPAO nou ahi ngaowe,” tea Elisha nou chila peie.

¹⁴Hazael nou Benhadad hi dakhai vere ae puhnou Hazael hi noue, “Elisha nou daitea paowe?” “Puhnou ne hai veiloua bailai tea ahi paowe,” tea Hazeal nou chila peie.

¹⁵Ana thainesho hai Hazael nou sahkamol ali hai dzü pfüloua nou polou veoye sü ssü nohawua southawure. Alia Hazael nou puh thaosü pa veo souloure.

¹⁶Israel mai hi veo Ahab nahpoutu Joram nou veo soulouyu po angou nava Judah hi veo Jehoshaphat nahpoutu Jehoram nou veo souloure.

¹⁷Puhnou pa vekou louyu phaki puh hai po shiahai pare ae puhnou po acha hai Jerusalem hinou veo soua bue.

¹⁸Puhnou Ahab vei kihikhamai büa ae Israel mai hi veo maitao nou vah ashi souyu bütoua vah ashi sü soutare, daiolouzü puhnou Ahab nahnaotupai sü naloure. Ae puhnou MAPAO vei nghingao hinou vah ashi khesü soutare,

¹⁹ana MAPAO nou puhvei kilai David ye donou Judah teidei sü souha nümore, daiolouzü puhnou puhvei kilai David hisü puhvei tyaosholea maitaoye panou teisa nou veo sü soua bukoute peilai tea chaachou soupeiwure.

²⁰Jehoram nou veo soua buyu teile hinou Edom mainou Judah khakhe hi bulai more tea tyapa lahvei teidei hai soushu loure.

²¹Südonou Jehoram nou puhvei rheiluki veishi sü pfüloua Zair hisü ve-e, ae Edom maivei reihmaitao nou puletaoye sü sühaoloure. Khei nou puh ae rheilukitao hi peikhowo puhai hai tupaloua nou lah ki hi dakhai vere, ae puhvei reihmaitao hai tupho raroupoa lahkuku vei ki hi dakhai tare.

²²Süthai hai Edom mainou Judah maivei khakhe hinou hrümoa lahdo souloure. Süpha teile hinou Libnah nuhdu hai-a Judah vei khakhe hi bulai more tea tyapare.

²³Jehoram nou soupfüyu vah haso veishi hai Judah hi Vemaitao vei Hrüko rüyu larübvü hi rüthou khaitoue.

²⁴Jehoram hai thaitare ae puhye sü David vei Nuhdu, veo maitao vei khüh hinou poa daovu peie ae puh nahpoutu Ahaziah nou puh thaosou pa veo souloure.

²⁵Israel mai hi Veo Ahab nahpoutu Joram nou veo koulouyu po kiahai kou hai Judah hi veo Jehoram nahpoutu Ahaziah nou pa vekouloue.

²⁶Ahaziah nou vekou louyu phaki puh hai po kaihai pare ae puhnou Jerusalem hinou po ali hai veo sou-e. Puh pfü zhih hai Athaliah tou-e ae honapai hai Israel hi veo Ahab nah naotupaie ae Veo Omri tyao-e.

²⁷Ahaziah hai Ahab kihikhamai nou MAPAO vei nghingao hinou vah ashi souyu bütou-a soutare, daiolouzü puh hai Ahab vei nah naotupaiye naloure.

²⁸Veo Ahaziah nou veo Joram ye koa Sairia hi veo Hazael pei hi Ramoth Gilead hinou reih soure, ae reihbu sühinou Sairia maivei reihmai nou Joramye sü zhipeiwure.

²⁹Veo Joramye zhipeikhai touyu nasü veiloure donou Jazreel nuhdu hi dakhai tare ae Ahaziah nou buh sühi puhye tave keare donou ve-e.