Read Poumei Naga 2 VEMAITO 9 Bible Online

2 VEMAITO 9 - Poumei Naga bible

2 VEMAITO 9

¹Süthaisü Elisha nou rachipaolayu nahlemai aliye kuloua paoe, “Soudaloua nou Ramoth Gilead hisü tawo. Oliv theadzü thouyu bvü ali polo,

²ae nenou buh sühi velouyu phaki, Nimshi nahpoutu Jehoshaphat nahpoutu Jehu ye sü phoulo ae puhye samaitao hrohinou tyakuyu kide ali hi saloulo.

³Süthaisü puhye oliv theadzü nou puh pei hi lazü peio ae haibüa paopeio, ‘MAPAO nou neye panou Israel mai hi veo soure donou theadzü hai napeiwe!’ Süthaisü buh sühinou thashoa nou thaokhaiwua tutalo.”

⁴Südonou nahleyu rachipaolawo nou Ramoth Gilead hisü tare,

⁵ae puhnou velouyu phaki, reihmai peikhoyu maitao hai meime soua nou chipha-a bue, ae puhnou paoe, “Apaopuwo, neye donou chipao ali Enou povewe.” Jehu nou noue, “Etao hrohi thao-e nenou chanüwe?” Puhnou chila peie, “Neye paowe.”

⁶Süthaisü puhai nou kihikha talou loure ae nahle-a buyu rachipaolawo nou Jehu pei hisü theadzü lanou peie ae puh hi haibüa paoe, “Israel maivei Ramai MAPAO nou haibüa paoe, ‘Enou neye panou avei maitao Israel mai pei hi veo soure donou theadzü napeiwure.

⁷Neye panou nevei paopu Ahab veo vei kihikha mai hrülaiye southalai, sübüa Jezebel nou avei rachipaola peiyu maitao ae avei kilai maitaoye southayu donou khüngu sü phouloulai.

⁸Ahab vei kihikha mai hrülai ae puhvei tyaosholea mai hrülai hai thaikhai toulai, Enou puhvei kihikha buyu poutumai hrülai- tsümai, nahmai soumoa mai hrülaiye southakhai toulai.

⁹Enou Ahab vei kihikha hai Israel mai hi veo Jeroboam ae veo Baasha vei kihikha maitao büa soupeilai.

¹⁰Ae Jezebel vei thaiphao hai Jezreal teidei hinou sei khenou touloulai, ae mailia puhye sü daovu peilai moe.’” Süthaisü nahle-a buyu rachipaolawo nou kikhu sü houpaloua tutare.

¹¹Jehu nou puhvei samai khamaitao hisü dakhai loure ae puletao nou puh hi noue, “Ha teitei nou vei-a baiho moe? Voyu maina nou ne hi dai-e jüpa-a nou paowe?” “Puhnou dai jüpawe touyu sü neletao nou süwe,” tea Jehu nou chila peie.

¹²“Etao sümoe! Puhnou paoyu sü Etao hi-a paongao peio,” tea puletao nou pao-e. “MAPAO nou Eye panou Israel mai hi veo soure donou theadzü napeiwure tea puhnou paowe.”

¹³Süthaisü puletao mai hrülai nou lahkuku vei sahba sü khuloure, ae süphao hisü Jehu ye panou pa laloure, shabe sü nghoupare alia haibüa share, “Jehu nou veo sü souloure.”

¹⁴Süthaisü Jehu nou veo Joram ye kheikhei soua soushire donou shodo souloure. Süphaki veo Joram hai Sairia hi veo Hazael ye Ramoth hinou soureih soua zhipeiwua veiloure donou puhsü Jezreal hinou bue. Südonou Jehu nou puhvei samaitao hi paoe, “Neletao nou Eye koa zholouzü, mailia panou nuhdu hinou deraipa ko hai nasü Jezreal maitao hi paopeiso.”

¹⁶Süthaisü puhnou rheiluki pfüloua Jezreal nuhdu hisü tare. Joram hai veiloumoa buhie, alia Judah hi veo Ahaziah-a Joram ye kealai tea nuhdu sühinou bue.

¹⁷Jezreal nuhdu hinou reikhao soua buyu maina nou Jehu alia puhvei maitao nou takouyu sü ngaoloua haibüa shapaore, “Enou maime ali hai hilao tapoa kouyu sü zhingaowe.” Joram nou chila peie, “Rhei pfüyu mai ali seiho puletao hai samai khamai ho ngaobayu maisa panou taho zhukhaio.”

¹⁸Kopomai nanou rheipfü kou Jehu hi paoe, “Nenou veyu hai samai khamai soua kaonayu hinou veho, daivanou vewe touyu hai veo nou sülou nüwe.” Jehu nou chilapeie, “Süsü ne vah moe, athai fülo.” Kopomai nanou puletao vei me hisü kouloure, ana dakhaikou more tea reihkhaoyu puona nou paopeire.

¹⁹Kopomai kukhe ali-a seiho Jehu hi raibütoua chinoure, ae Jehu nou haibüa chila peie, “Süsü nevei vah ha-e! Athai fülo.”

²⁰Süthai-a reihkhaoyu puona nou kopomai nahai puletao vei me hisü koulou loure ana puh-a dakhai koumore tea paore, ae puhnou haibüa paopue, “Puletao vei me hi süthaisa-a laiyu mai nanou rheiluki pfüyu hai Jehu nou pfüyu büwe, daiolouzü puh hai voyu mai ali büa pfütawe.”

²¹“Avei rheiluki sü soudakhaio,” tea veo Joram nou kharochi peie. Rheiluki sü puh alia veo Ahaziah nou pfüloua Jehu ye daore donou tare. Puletao nou Naboth vei dou hinou ve daoloure.

²²Joram nou puh hi chinoue, “Ne kaonayu hinou ve-a baiho moe?” Jehu nou chila peie, “Ne pfü Jezebel nou khaitouyu khakhapfü ae keingumai taoli bulukhu kabüa kaonayu sü bulaige?”

²³“Haisü soureih soure donou shodo ashi soure, Ahaziah!” tea Joram nou shapaowua puhvei rheiluki sü pfüdaloua nou tutare.

²⁴Ae Jehu nou puhvei khouko buyu veishi nou poa voulou sü paipaloua Joramye sü phao hinou kapeiwure, sübüa voulouthou sü lüthou hi loure. Joram sü sübüa puhvei rheiluki hinou thaire,

²⁵ae Jehu nou puhye soukhayu Bidkar hi paoe, “Puhvei thaiphao sü poloua Naboth vei dou hi polai thouwuo. Ahai nou veo Joram puo Ahab thailo vanou rheiluki pfüa tayu phaki, MAPAO nou Ahab pei hi vamoa haibüa paoyu nasü licholo:

²⁶‘Naboth ae puhvei nahpoutu maitaoye southayu sü Enou do ngao-e, ae dou hai hinou puh-a Enou tudee peilai tea chaachou souwure. Südonou Joram vei thaiphao sü polo,’ tea Jehu nou puhye soukha peiyuna hisü kharochi peie, ae süsü Naboth vei dou hi MAPAO nou chaachou soukhai touyu thaifüa laithou khaio.”

²⁷Judah hi veo Ahaziah nou hai khesü ngaoloua puhnou Beth Haggar hi tutare. Jehu nou puhye thaihuloua nou paoe, “Puh-a southawo!” Jehu nou puhvei maitao hi kharochi peia puletao nou puhye thaihu poa kou Ibleam nghia buyu Gur hi tapare hinou puhye sü zhipeiwure. Puhnou Megiddo hi tuvere ae sühinou puh sü thaire.

²⁸Puhvei khehinou buyu peikho maitao nou puh thaiphao sü rheiluki hinou Jerusalem hi pfüa dakhai ve David vei nuhdu hi vemaitao vei khüh hinou daovu peie.

²⁹Ahab nahpoutu Joram nou Israel hi veo souyu po kiali kounou Ahaziah nou Judah hi veo souloue.

³⁰Jehu nou Jezreal hi veloure ae Jezebel nou vepayu ko khesü chouloua honapai nou nghiteipou thouloua ae peishu khuloua maimou soutou touloua kipei vabomü hinou duva hisü zhipoa nou bue.

³¹Ae Jehu nou robomü hi talouyu phaki, honapai nou puh hi paoe, “Zimri puona! Maiye southawo! Ne daisou nou buh hai hi vewe?”

³²Jehu nou zhuloua haibüa shapaoe, “Thaothao mainou Eye kolaige?” Süphaki veo vei ki hinou vah soumai ahai asü hai vabomü hinou puhye zhua nou bue,

³³ae Jehu nou puletao hi paoe, “Honapaiye deiphi hi shilai koupeio!” Puletao nou honapaiye sü deiphi hi shilai kouwure ae honapai vei zhe sü kivo vahi ae rhei vasü pa taore ae Jehu nou puhvei rheiluki sü pfüloua honapai phao hinou pfüa tapeie.

³⁴Süthaisü puhnou veo vei kihikha talou ha touloure ae puhnou paoe, “Chaa ngaoyu naotupai sü poloua daovu peio, daiolouzü honapai hai veo vei nahnaotu pai-e.”

³⁵Ana honapaiye poa daovulai tea tayu maitao nou honapai vei pfüphao sü halia ngaolou more, peirao ae bahpha alia phi likhei bua nou ngaoloua baire.

³⁶Puletao nou ko haisü Jehu hi paongao peie, ae puhnou haibüa paoe, “MAPAO nou puhvei kilai Elijah hi haibüa vepalai tea paopei khaitoue: ‘Sei nou Jezebel vei pfüphao hai Jezreal teidei hinou touloulai.

³⁷Puhvei vasou hai choba büa raroupoa ta-a bailai, südonou puhye sü mai linoua shiloulai moe.’ ”