Read Poumei Naga 1 PUOPAOKO 12 Bible Online

1 PUOPAOKO 12 - Poumei Naga bible

1 PUOPAOKO 12

¹David nou Saul veoye ngaopia Ziklag hinou tutsüa buyu phaki, soureih veishoyu ae louchelou veiyu reihmai taoli puhvei pame hi veloue.

²Puletao hai Saul vei puonahmai Benjamin khü hinoue. Puletao hai voulou poveih shoyu ae chuhlou hai bah zhoulo ae nalo-a raibütoua polou süyu maitao-e.

³Puletao hai Gebeah hinou veyu Shemaah nahpoutu Ahiezer ae Joash vei kharokhe hinou bue. Reihmaitao sü mai haitao-e: Azmaveth nahpoutu ahai Jeziel ae Pelet; Anathoth hinou Berakah, ae Jehu; Gibeon puona Ishmaiah, puh hai soureih veishoyu reihmai shirou hi süthai-apei mai ali-e; Gederah hinou Jeremiah, Jahaziel, Johannan, ae Jozabad; Hariph hinou Eluzai, Jerimoth, Bealiah, Shemariah, ae Shephatiah; Korah khü hinou Elkanah; Isshiah, Azarel, Joezer, ae Jashobeam; Gedar hinou Jeroham nahpoutu Joelah ae Zebadiah hai maitao-e.

⁸Khouko veishoyu mai, soureih soukhoyu mai, rüh ae heung poveiyu mai, souveo pah büa zhupiyu mai ae deichi hi shuh büa tuveiyu Gad maitaoli hai David nou radeiki hinou fühao soua buki puhvei reihmai soulai tea nou tave loue.

⁹Puletao hai vahbu dukayu nahinou poa shoshonou taikouyu sü mai haitao-e: Ezer, Obadiah, Eliab, Mishmannah, Jeremiah, Attai, Eliel, Johanan, Elzabad, Jeremiah, ae Makbannai.

¹⁴Gad mai haitao hrohinou kamai-a reihmai theli peicho-e, ae kamai-a nou reihmai kaihli peikho-e.

¹⁵Mai haitao nou po hi khouh ngaorai khoukha ali zhou Jordan rei sü tachopa loue, ae süphaki dzüdusho-a reipe teitei sü dzünou küphou-a nou bue. Puletao nou süpehao deikho hi hrüyu mai hrülaiye sü teinghi palova ae loulova hulaiwure.

¹⁶Benjamin ae Judah hi kamai-a nou David nou buyu fühao hi veloue.

¹⁷David nou puletaoye tapa süloua haibüa paoe, “Neletao nou samai soua Eye soukhare donou velouzü, E-a sünasü jüpa-a bue, ana neletao nou shodo ashi soua Eye ngaobamai bah hi thoupeire donou velouzü, Enou neletao hi vah ashi soumoyu thaifüa Etao puopaoh Ramai nou süwe alia Puhnou neletaoye tudee-a bailai.”

¹⁸Ramai vei rako nou kou puletao mai ali hi, Amasai tea kuyu nahisü louloure, puh hai haithai naki kou “Mai Shirou” vei peikhowo sü souwe, puhnou haibüa shaloua paoe, “David, Jesse nahpoutu, Etao hai nevei baie, Neye panou veilouyu sü southeo, ae neye soukha peiyu mai-a panou kolouyu sü souloutheo! Ramai nou neye koa salai peiwe.” Süthaisü David nou puletaoye sü saloure, alia puletaoye panou puhvei reihmai tao hi peichayu mai souloure.

¹⁹Manasseh khü hinou kamai-a nou David nou Philistin maiye koa Saul veo pei hi reih soulai tea tayu phaki puh hi velou loue. Ana David nou Philistin maiye soukha more, daiolouzü Philistin hi peikho maitao nou David hai raichoki puhvei paopu Saul ye soukha talouzü puletao hai kaoshia bailai-e tea tsücholoua puhye sü Ziklag hi seidakhai vewure.

²⁰David nou Ziklag hi dakhai tayu phaki Manasseh mainou puh hi velouyu maitao sü haitao-e: Adah, Jozabad, Jediel, Maikhel, Jozabad, Elihu, ae Zillethai. Puletao hai Manasseh khü hi mai theli pei khoyu maitao-e.

²¹Puletao nou David vei reihmaime hi peikhomai soua puhye soukha peie, daiolouzü puletao hai soureih souyu hai souveih shoyu maitao-e, alia haithai naki hai puletao nou Israel maivei reihmai peicho sou-e.

²²Teithetsü hai maikhe mainou David ye soukha peire donou puhvei reihmaime hisü velou-e, sübüa puhvei reihmai hai pousho paloure.

²³MAPAO nou paopeiyu thaifüa David nou Hebron hi buyu phaki soureih veishoyu maitaoli puhvei reihme hi louloua panou Saul thaosü veo soure donou soukha peilai tea taveloue. Puletao vei reihme tao sü haitaoe: Judah khü hinou reih basei tutoupoa veyu hai mai 6,800; Simeon khü hinou soureih souyu dokai süvei shoyu mai 7,100; Levi khü hinou reihmai 4,600; Jehoiada vei thaifü maitao ae Aaron vei tyaosholea hinou mai 3,700; Zadok vei kityarai hinou soureih souveih shoyu nahlemai 22; Benjamin (Saul vei khü) hinou mai 3,000 (Benjamin khü hai mai poulo nou Saul hi bubaie); Ephraim khü hinou zhih tashoyu mai 20,800; Teinghi loulo buyu Manasseh khü hinou mai 18,000 hai dopaloua panou David ye veo soure donou veloue; Issakar khü hinou süthai-apei mai 200, ae puletao nou süthaiyu maitao noupu koa veloue (Süthai-apei mai haitao Israel mainou daivah souzüe ae kabüyu teile hinou souzüe touyu süwe); Zabulun khü hinou louche louveiyu ae reihbasei tyatyali poa soureih soulou (...)

³⁸Reihmai haitao hrülai nou David ye panou Israel mai pei hi veo soure donou soureih soulai tea tudapoa Hebron hi veloue. Haibüa Israel mai kukhe hrülai-a David ye panou veo soulai touyu hisü tsüle ali souloure.

³⁹Puletao mai hrülai nou buh sühi sünou David ye koa teithe asü hai puletao thaihou jürai-soua buyu Israel maitao nou touso soudakhai peiyu sünou khonüh nüa bue.

⁴⁰Puletao nou buyu buh hisü nou doushoa buyu Issakhar, Zebulun, ae Naphtali maitao koute-a racho, rheihsüh, rhei ae chode phao hinou touso khesü pfüve peie. Puletao nou kikhaorü ae nghitu zhaotu khesü panou datoure donou pove peie. Haikhe teitei sü tyadei veishi hinou maikhe maivei asah nasü soungaoe.