Read Poumei Naga 1 PUOPAOKO 15 Bible Online

1 PUOPAOKO 15 - Poumei Naga bible

1 PUOPAOKO 15

¹David nou lah puhye donou David vei Nuhdu hinou ki taoli hai souloue. Puhnou Ramai vei Vo Sübvü nasü khaire donou sahpao ali soukhai peie.

²Süthaisü David nou paoe, “Levi maitya likhei nou Ramai vei Vo Sübvü nasü kaopoa bailai, daiolouzü MAPAO vei Vo Sübvü kaopore donou ae teisa nou puh vei kuvah soure donou MAPAO nou Levi maitaoye dopaloure.”

³MAPAO vei Vo Sübvü nasü puhnou soudakhai touyu buh hi pove khailoure donou puhnou Israel mai hrülaiye sü Jerusalem hi kuve jüloure.

⁴Süthaisü puhnou Aaron ae Levi tyaosholea maitao sü kupoa ve jüloure.

⁵Kohath vei pfümou nahtao hi Uriel nou mai 120 peicho-a saveloue;

⁶Merari puonah hinou Asai nou peicha-a mai 220 save-e;

⁷Gershon maityatao hinou Joel nou peikhowo soua mai 130 ve-e;

⁸Elizaphan khü hisü Shemaiah nou peikho-a mai 200 veloue;

⁹Hebron maitao hinou Eliel nou khopoa mai 80;

¹⁰Uzziel maitao hi Aminadab nou mai 112 peikhowo soua save-e.

¹¹Süthaisü David nou napao Zadok ae Abiathar alia Levi mai arou- Uriel, Asaiah, Joel, Shemaiah, Eliel ae Amminadab haimaitao kuveloua,

¹²puletao hisü paoe, “Neletao hai Levi maitao vei peikho maitaore, südonou MAPAO vei Vo Sübvü nasü Enou soudakhai touyu buh hi pove thoukhai loure donou neletao ae neletao vei thaihou-jürai Levi mai hrülai soushee-a bulo.

¹³Neletao raichoki kaopoa tayu hi loumoyu donou, Etao Ramai MAPAO nou Etao pei hi rarou loure, daiolouzü Etao nou souzü na thaifüa soulou more.”

¹⁴Süthaisü napao maitao ae Levi maitao nou Israel maivei Ramai MAPAO vei Vo Sübvü nasü pore donou soushee loure.

¹⁵MAPAO vei kharochi thaifüa Moses nou puletao hi paodaikhai peiyu büa Levi maitao nou Vo Sübvü nasü süüpo ahai thaithouloua puletao vei phao hinou kaoposha-a ta-e.

¹⁶David nou Levi maitaoye süthaiyu mai hisü lou souyu mai, poa lou soure bahsei, khubvü, ae beibei poa shusoua lou soure maikhesü dopalo tea kharochi peie.

¹⁷Lou souyu maitya hinou beibei pore donou mai haitao hai dopaloue: Joel nahpoutu Heman, puhvei kityarai soua buyu Berekhiah nahpoutu Asaph, Merari maikhü hinou Kushaiah nahpoutu Ethan. Puletaoye soukhare donou shapoulei kho kushoa nghoure Levi maitao sü haitao-e: Zekhariah, Jaaziel, Shemiramoth, Jehiel, Unni, Eliab, Maaseiah, ae Benaiah. Shapoulei kho na-a nou nghoure Levi maitao sü haitao-e: Mathithiah, Eliphelehu, Mikneiah, Azaziah, ae rathoki khoyu Obed Edom ae Jeiel hai maitaoye dopaloue.

²²Lou souyu hi süveih shoyu donou Khenaniah-ye panou Levi maitao vei lou soume süthai peire donou doloue.

²³Berekhiah, Elkanah, Obed Edom ae Jehiah hai maitao hai panou Vo Sübvü khore donou dopaloue. Napao Shenaniah, Joshaphat, Nethanel, Amasai, Zekhariah, Benaiah ae Eliazer hai maitao sü panou Vo Sübvü pah hinou shabe nghoure donou doloure.

²⁵Südonou David veo, Israel mai hi süthai-apei maitao ae reihmaitao hi peikhoyu maikhesü sashopoa MAPAO vei Vo Sübvü nasü Obed Edom ki hinou polai tea tare.

²⁶MAPAO vei Vo Sübvü kaopore Levi maitaoye Ramai panou soukha peire donou puletao nou chode anai ae zhaotu anai dathaloua posheela peie.

²⁷David hai veishoa nou züzüyu sah nou rükhai touyu naazao naowe, alia Vo Sübvü kaopoa tare Levi maitao, lou souyu maitao, ae lou souyu hi süthai-apeio Khenaniah hai maitao-a züzüyu sah nou rükhai touyu naazao sü banouwe. David hai züzüyu sah nou soukhai touyu nahra (Ephod) thouwe.

²⁸Sübüa Israel mai hrülai nou MAPAO vei Vo Sübvü nasü asah soupoa shabe nghoua, toubvü da-a, shapoulei nghoua ae lou soupoa Jerusalem hisü koa ve-e.

²⁹MAPAO vei Vo Sübvü nasü nuhdu hi pove louyu phaki, Saul nahnaotupai Mikhal nou vabomü hinou zhupa David veo nou asah soua chopoa tayu sü ngaoloukhaie, honapai nou puh hisü vamore.