Read Poumei Naga 1 PUOPAOKO 16 Bible Online

1 PUOPAOKO 16 - Poumei Naga bible

1 PUOPAOKO 16

¹Puletao nou Ramai vei Vo Sübvü nasü pove David nou sahpao haokhai touyu hisü khaiwure. Süthaisü puletao Ramai nghoujünou meidei-a posheelayu ae maisou kaozhou vei-a hrüloure vei sheela khesü posheela peie.

²David nou meidei-a posheela peiyu thaisü, puhnou MAPAO zhih hinou maikhe maiye shiha peie,

³ae Israel mai hrülaiye raokhao, sou, ae darkhashiki sü zhipeie.

⁴David nou Levi mai kamai-a panou Ramai vei Vo Sübvü khore donou ae kamai-a panou kalo pao-a ae Israel maivei Ramai MAPAO ye paoshore donou dopa khailoure.

⁵Asaph-ye panou peichore donou doloue, ae puh thaisü panou Zekharia, Jeiel, Shemiramoth, Jehiel, Mattithiah, Eliab, Benaiah, Obededom, ae Jeiel-ye panou gaigou kare donou doloue; Asaph-ye panou khubvü dare donou doloue,

⁶alia napao Benaiah ae Jahaziel puhaiye panou Vo Sübvü nghoujünou shabe nghou koutere donou dothou loure.

⁷Süzhou teithe Asaph ae puhvei thaihou-jürai maitaoye panou MAPAO hi kalo paoyu lou soure donou David nou raikhai-a doloue.

⁸MAPAO hi kalo paolo, puh zhih sü kulo; tyahrü hrülai hi puhnou soupeikhai touyu vah haso khesü paopeio.

⁹MAPAO ye lou nou sousho peikhaio, khupayu puh vei vah khesü paopei khaio.

¹⁰Etao hai puhvei mai souyu donou lesalo; MAPAO ye thoyu mai hrülai sü asalo.

¹¹MAPAO ae puhvei khouko nasü phoulo, tobai soumoa puhye koa bulo.

¹²Ramai kilai Jakob vei tyaosholea maitao, Ramai nou dopa louyu Israel maivei tyaosholea taore, Ramai nou khupayu vah soukhai touyutao ae puhnou tudeeyu khesü licholo.

¹⁴MAPAO hai Etao vei Ramai nasüe; puhvei chikha sü deiphao mai hrülai donoue.

¹⁵Ramai koa nou vo soukhai touyu nasü ngaikhai touso; sünasü puhnou teisa vei panou soure donou soukhaitoue,

¹⁶Abraham-ye koa vo soukhai touyu ae Isaak hi paohpei khaitouyu nasü.

¹⁷MAPAO nou Jakob ye koa vo soukhai touyu nasü teisa vei soure donou soukhai toue.

¹⁸Puhnou paoe, “Enou Kanaan teidei sü ne hi kikaa phasoua peilai.”

¹⁹MAPAO vei maitao hai poumoa buyu phaki, ae maivei teidei hinou shetumai soua laiyu phaki,

²⁰nuh ali hinou ali hi, vedei ali hinou ali hi sühao-a tayu phaki,

²¹Ramai nou puletaoye panou mai ali noua souvea souho pei moe, puhnou puletaoye vupeire donou veo maitaoye haibüa paopi peie,

²²“Enou dolouyu avei kilai maitaoye souveasho; avei rachipaola-apei maitaoye deisho.”

²³Deiphao mai hrülai, MAPAO ye lou sousholo! Puhnou Etaoye khailupa peiyu ko aveih nasü teisa shapaokhaio.

²⁴Puhvei kathe nasü tyahrütao hi paopeio, Puhvei khupayu vah khesü mai hrülai hi shapaopeio!

²⁵MAPAO hai due, puhye soutaosou paosho züe, puhye rah kukhe jünou tsükhoupu züe.

²⁶Tyahrü kukhe vei rah khesü bashara bai-e, ana MAPAO nou teideiphao sü soupeie.

²⁷Tsükhouyu ae kathe sü puh hi bue, khouko ae asayu sü puhnou buyu buh hi bue.

²⁸Deiphao hi hrüa buyu mai hrülai, MAPAO ye paosholo, Puhvei khouko ae kathe sü paoshokhaio!

²⁹MAPAO vei zhih aveih nasü paosholo, Puhvei rathoki hisü posheela na khesü pove peio! MAPAO ye sü sheesho-a tholo.

³⁰Deiphao mai hrülai puh nghoujü hinou ngaopi-a ngua bulo, Deiphao sü veihshoa soukhai peiwure, hainasü soulelou hore.

³¹Raki ae deiphao sü panou asalo, puletao ye panou “MAPAO nou veo soure” tea maikhe mai hi paopeio.

³²Zai, ae zai hi buyu na teitei rakhaio; Dou, ae sühinou buyu veishi panou asalo!

³³MAPAO nou deiphao ve khasa-a hrülaiyu phaki, vaohro hi buyu süübe khenou asah soua shalai.

³⁴Oh MAPAO hi kalo paokaio, daiolouzü puh hai vei-e; tobai soumoa puhvei leshi sü bue.

³⁵Puh hi haibüa paolo: “Etaoye khailu-apeio Oh Ramai, Etaoye Khailu papeio; tyahrütao hrohinou Etaoye pove jüpeio alia vupa peio, sübüa Etaoye panou nevei sheeyu zhih sü paoshoa ne kalo paolo.”

³⁶Israel maivei Ramai MAPAO ye paosholo! Puhye teisa nou paosho-a bulo! Süthaisü mai hrülai nou “Amen” tea paoe, ae MAPAO ye paosho-e.

³⁷David veo nou Asaph ae puhvei thaihou-jürai Levi maitaoye Vo Sübvü nghoujü nou teisa panou rathore vei vah khesü soure donou dothou khaipeie.

³⁸Jeduthun nahpoutu Obed Edom ae puh thaihou-jürai mai rairouacha hai puletaoye panou soukhare donou dopeie. Hosah ae Obed Edom puhaiye panou rokhubomü khore donou lühpeie.

³⁹David nou napao Zadok ae puhvei thaihou-jürai maitaoye Gibeon hinou buyu MAPAO vei rathoki hisü panou zhure donou vahbu thoupeie.

⁴⁰MAPAO nou Israel mai hi peikhai touyu chikha rükhai touyu thaifüa puletao nou shona ae koukhe tsüsü sheela khesü posheelabu hinou meideia posheela peie.

⁴¹Puletaoye koa Heman ae Jeduthun, alia MAPAO ye lou soushore donou dopa louyu kukhe maitao noupu MAPAO ye puhvei tobai soumoa leshi peiyu nasü paoshore donou dopei khaitoue.

⁴²Paoshoyu lou soure donou Heman ae Jeduthun alia mai kukhe maitao hai shabe nghoure donou, beibei dare donou alia poa lou souyu bahsei kukhe zhure vahbu hisü dothoupeie. Jeduthun pounah maitaoye panou rokhubomü khore donou vahbu thoupeie.

⁴³Süthaisü mai hrülai hai lahkuku ki hi dakhai tare, alia David Veo-a lah puh kihikha maiye koa bure donou tare.