Read Poumei Naga 1 PUOPAOKO 21 Bible Online

1 PUOPAOKO 21 - Poumei Naga bible

1 PUOPAOKO 21

¹Saitan nou Israel mai hi veahoyu povepei nüloure, südonou puhnou David veo panou Israel maipei phoure donou lela loure.

²David nou Joab alia puhvei peikho maitao hi haibüa kharochi peie, “Israel maivei teidei teitei hi taho mai kazhou busa touyu pei phoukhaio, maipei kazhou busa touyu E sünüwe.”

³Ana Joab nou haibüa chila peie, “MAPAO panou Israel maiye sü chu buyu jünou zha kaihli pua soupeiyu sü soulou theo! Oh apaopuwo, puletao mai hrülai sü nevei kilai baie, ne daisounou haibüa sounüwe? Daisouyu donou Israel mai pei hi mahmo soupeilai tiwe?”

⁴Ana veo vei kharochi nasü Joab nou zümolou hore. Südonou Joab nou Israel maivei teidei sü sühao taloua Jerusalem hi dakhai vere.

⁵Ae Joab nou maipei phouyu taosü David hi paopeie. Israel maitao hinou soureih soulou süyu poutu maitao hai 1,100,000 bue, ae Judah hinou soureih soulou süyu maitao hai 470,000 bue.

⁶Anou Joab nou Levi ae Benjamin maitao hisü maipei phou more, daiolouzü puhnou veo vei kharochi nasü zünü more.

⁷Ramai nou haibüa souyu vah khesü ngaoloua vamore, südonou puhnou Israel maiye sü tudee peie.

⁸David nou Ramai hi paoe, “Enou haibüa souyu donou mah souwure, zhuvea nou amah sü khaipeio, daiolouzü Enou kaomoa vosho-a souwure.”

⁹Süthaisü MAPAO nou David vei rachipaolawo Gad hi paoe,

¹⁰“David hi taho haibüa MAPAO nou paoe tea paopeio, ‘Enou neye ha asü peilai, sütao hinou nenou jüpa ali dolo, Enou sünasü neye donou soupeilai.’ ”

¹¹Südonou Gad nou taho David hi MAPAO nou paopeio touyu sü paopeie, ae puhnou noue, “Nenou jüpa nasü dolo:

¹²Po asü tokaayu nou laiho, khouh asü hai neye ngaobayu mai nghoujünou tuchüa talaiho, molouzü teithe asü hai MAPAO vei khoche nou poa dalai ae puhvei rakivamaiye panou Israel maivei teidei teitei hi rahta rahvu seive-a panou thaisou soulai? Nenou jüpa nasü dolo, Enou MAPAO hisü chila peilai.”

¹³David nou Gad hi chila peie, “Ewo chohare! Ana maiye panou Eye tudeere nasü E jüpa more, MAPAO panou Eye tudeeyu sü soupeio, daiolouzü puh hai maiye zhuvea peiyu Ramai-e.”

¹⁴Südonou MAPAO nou Israel mai hi rahta rahvu seive peie, ae sühinou Israel mai hai therainai thaire.

¹⁵Süthaisü puhnou Jerusalem nuhdu nasü souhare donou rakivamaiye seive-e, ana puh le sü daloua rakivamai nahi paoe, “Tesüre, ne chao-a baio.” Ae rakivamai nasü Jebus puona Araunah vei thaibuh hinou la-a bue.

¹⁶Raki vanou rakivamai nasü khoche poa Jerusalem souhare donou la-a buyu sü David nou ngaolou khaie, puhnou puhvei peicho maitaoye saloua lousah banao loure ae puletao pei hisü vonai na loure,

¹⁷ae puhnou Ramai hi veachi paoe, “Oh Ramai, mah souyu nasü E baie, Enou maipei panou phoure donou kharochi peia baie. Ana maisou haitao nou dai sou-e? Oh MAPAO, avei Ramai, E alia avei kihikhamai nou tudee-a baio, nevei maitaoye sü veahoyu peiso.”

¹⁸Süthaisü rakivamai nanou Gad hi taho David ye panou Araunah vei thaibu hinou MAPAO ye donou posheelabu ali soupeio tea paopeio tea kharochi peie.

¹⁹Gad nou puh hi paoyu thaifüa David nou MAPAO vei kharochi züa tare.

²⁰Thaibu hisü Araunah ae puhvei nahpoutu mai adai hai southou da-a nou bue, ae puletao nou rakivamai naye ngaolouyu phaki, nahpoutu adai taosü tutare.

²¹David veo nou Araunah hilo takouyu puhnou ngaolouyu phaki, puhnou thaibu sü thaokhaiwua puhnou puh pahsü nakou deiphi deiloua puhye khurüe.

²²David nou puh hi paoe, “Nevei thaibu nasü Eye zhopeio, Enou nevei dei muh khasoua peilai, sübüa maikhe mainou rahta-a souyu nasü polai loure donou MAPAO hi posheelabu ali buh hai hinou soushulai.”

²³Araunah nou David hi paoe, “Polo apaopuwo, alia nenou jüpayu nasü poa soulo. Meidei-a posheelare donou chode-a hai hi bue, ae meideiyu süü-a thaibu hi buyu süütao nou poa deilo, ae thoudzü vei sheelare donou southou-a haihi buyutao-a polo. Haihi buyu veishi sü Enou ne hi peikhai touwe.”

²⁴Ana David veo nou chila peie, “Moe, Enou neye sü muhma veishi nou peichelai. MAPAO hi posheela peiyu, moa meidei-a sheelare khesü muh peimoa sa-a nou polai moe.”

²⁵Südonou David nou Araunah vei thaibu muh sü sana pousha kaihrou peie.

²⁶Puhnou buh sühisü MAPAO donou posheelabu ali soushu loure alia meidei-a posheelayu ae kaozhou vei-a hrüre donou posheelayu sü posheela peie. Puhnou veachi paoe, ae puhvei veachi sü MAPAO nou kei peia raki vanou mei seikou posheelabu hi buyu posheelana khesü meidei peie.

²⁷Süthaisü MAPAO nou rakivamai nahi puhvei khoche nasü pokhaio tea kharochi peie, ae rakivamai nanou puhvei khoche nasü pokhaiwure.

²⁸David nou puhvei veachi paoyu hai MAPAO nou noupeiwure touyu süloukhaie, puhnou Araunah vei thaibu hinou posheela sü posheela peie.

²⁹Teile hai phaki, Moses nou rekou nou soukhai touyu MAPAO vei Sahpao ae meidei-a posheelayu posheelabu nasü Gibeon hinou rathoyu ki hi buhie.

³⁰Ana David nou buh sühisü tave Ramai ye tholou hore, daiolouzü puhnou MAPAO vei rakivamai navei khoche sü ngaopi loure.