Read Poumei Naga 1 PUOPAOKO 22 Bible Online

1 PUOPAOKO 22 - Poumei Naga bible

1 PUOPAOKO 22

¹Süthaisü David nou paoe, “Buh hai hinou Ramai MAPAO vei rathoki nasü soulai, ae posheelabu hai hinou Israel mai nou meidei-a posheelayu sü soulai.”

²Israel maivei teidei hinou hrüyu shetumai hrülaiye David nou kuve jüloua puhnou puletao kamai-a panou Rathoki souyu hi chuh dakhore donou doloue.

³Puhnou kikhu poa soure donou ae rokhu bomü poa soure donou hushu ae paimure hu taoli soudakhai peie alia baosahu hai süh douhaolou ho-a souda khaipeie.

⁴Puhnou Tair ae Sidon mai hinou sedar süü taoli hai souda khaipeie.

⁵Daiolouzü David nou haibüa tsü choe, “Anahpoutu Solomon nou Rathoki soure nasü panou veisholai alia deiphao hi zhih takayu nasü pa soulai. Ana puh sü nahlemai lie ae vah-a soukhomo hie. Südonou Enou na khesü souda peimo louzü shi-e.” Südonou David nou Rathoki soure natao sü puh thaitamo jünou soudakhai peie.

⁶Süthaisü puhnou puh nahpoutu Solomon ye kuve loua Israel maivei Ramai MAPAO donou Rathoki ali soupeio tea kharochi peie.

⁷David nou puh hi haibüa paoe, “Anahna, Enou avei Ramai MAPAO ye tsükhouyu hinou rathoki nasü soupei nüe.

⁸Ana Enou soureih soua mai alao southayu donou Ramai nou Eye sü panou puhvei rathoki nasü souso tea paore.

⁹Anou puhnou ahi haibüa apaopeikhai touyu bue, ‘Nevei nahpoutu ali nou teidei sü kaona-a khasa-a hrülai, daiolouzü Enou puhvei teile hisü ngaobayu maitao hrülai hi-a kaonayu sü peilai, puh zhih sü Solomon tea kulai, daiolouzü puhnou khasa-a hrüyu teile hisü Enou Israel maiye kaonayu ae kaozhou veia hrüyu sü peilai.

¹⁰Puhnou Eye donou Rathoki nasü soupeilai. Puh hai anahpoutu soulai, ae Enou puhvei puo sü soulai. Puhvei tyaosholea nou Israel maiye teisa nou khasa-a hrülai.’ ”

¹¹David nou haibüa paopue, “Anahna, chuo Ramai MAPAO panou neye salai peiyu sü soulou theo, ae puhnou apaopeikhai touyu thaifüa Rathoki nasü souche peiyusü soulou theo.

¹²Alia neye sü Ramai MAPAO panou tsüdo aveih ae rahtsü sü peia puhvei chikha thaifüa Israel maiye khasa-a hrülouyu sü soulou theo.

¹³MAPAO nou Israel maiye donou Moses hi peikhai touyu chikhatao sü nenou zütoua hrülouzü ne kaozhou vei-a ae dusho palai, südonou leikheilo ae khuveilo, hataralia neye panou soupiso.

¹⁴Enou MAPAO vei Rathoki poa soure donou sana hai matric ton 3,400 ae shahu nou matric ton 34,000 souda peikhai toue. Süpeinou baosahu ae hu khesü phou haolou hoa souda peikhai toue. Enou süü ae chuh khe-a souda peikhai toue, ana süpei hinou ne-a phoupu thoulo.

¹⁵Ne hi vah souyu mai alao bue: chuh dakhoyu mai, chuh vah soulousü mai, süüvah soulousü mai, shamara soulousü maityatyali bue,

¹⁶sana, shahu, baosahu ae huh khuyu mai-a bue. Südonou chuo vah sü soutarao. MAPAO panou neye kozho peiyu sü soulou theo.”

¹⁷David nou Israel maiye süthai-apei mai hrülai hi Solomon ye soukha peio tea kharochi peie.

¹⁸Puhnou paoe, “Neletao Ramai MAPAO nou neletaoye kozho-a salai peie, ae hateitei hinou kaonayu sü peie. Puhnou Eye teidei hai hinou hrüyu mai hrülai jünou kolouyu sü peie, ae puletao sü chuo neletao vei khakhe ae MAPAO vei khakhe hinou bure.

¹⁹Südonou chuo neletao Ramai MAPAO ye neletao vei hrümai, tsüle ae rako teitei nou peia puhvei kuvah sü soulo. Rathoki nasü souta khaio, sübüa MAPAO vei Vo Sübvü ae puhye thoyu hi poa vah soure sheeyu nataosü sühi pothou khailo.”