Read Poumei Naga 1 PUOPAOKO 26 Bible Online

1 PUOPAOKO 26 - Poumei Naga bible

1 PUOPAOKO 26

¹Rathoki hi reihkhaoyu Levi maitao sü haibüa vah zhipei khaitoue: Korah khü hinou Kore nahpoutu Meshelemiah ye doloue, puh hai Asaph vei tyaonah mai-e.

²Puh hai nahpoutu anai bue, tsükana hinou poa shoshonou kouyu sü haitao-e: Zekhariah, Jedinel, Zebadiah, Jathniel,

³Elam, Jehohanan, ae Eliehoenai.

⁴Obed Edom hai Ramai nou shiha peia nahpoutu acha bue: Shemaiah, Jehozabad, Joah, Sachar, Nethanel,

⁵Ammiel, Issakar, ae Peullethai.

⁶Obed Edom vei nahpoutu tsükana Shemaiah-a nahpoutu arou bue: Othni, Rephael, Obed, Elzabad, Elihu, ae Shemachiah. Puletao hai lahvei khü hi matsü shoyu maitao-e, daiolouzü puletao hi soulou süyu dokai alao bue; ae nahpoutu maitao hi nahkhana ahai hai-a lamoka-e.

⁸Obed Edom vei kihikhamai hinou vah haina souyu hi lamo shoyu mai rairouhai bue.

⁹Meshelemiah vei kihikhamai hinou vah souveih shoyu mai kiacha hai bue.

¹⁰Merari vei tyaosholea hinou Hosah hai nahpoutu adai bue: Shimri (Puh hai nahpoutu tsükayu namoe, ana puh puo nou puhye panou peikhowo sü soue),

¹¹Hilkiah, Tebaliah, ae Zekhariah. Hosah vei kihikha hinou rathoki vei reihkhaomai hai kiasü bue.

¹²Puletao vei thaihou-jürai Levi mai kukhe büa MAPAO vei Rathoki khoyu vah hisü puletao vei pfümounah thaifüa meme soua vah zhipeie.

¹³Taidu soukumoa puletao vei kihikhamai thaifüa rokhubomü kana hi reihkhao soulai touyu sü rako nou zhua baie.

¹⁴Teinghi palo buyu robomü nasü Shelemiah vei zhih nou paloue, ae puh nahpoutu, maiye peipha peiveih shoyu Zekhariah nou reilova robomü hi paloue.

¹⁵Obed Edom vei zhih sü khelo buyu rokhubomü na panou reihkhao khore hisü pare, ae puhvei nahpoutu maitao sü thoudzü ae kini khaiyu buh khore hisü thoupeie.

¹⁶Shuppim ae Hosah puhaiye teinghi loulova rokhubomü ae ludu reilova buyu Shallecheth Rokhubomü nahai khore donou thoupeie. Reihkhao maitao hai teile dadeloua reirei reihkhao sü soue.

¹⁷Teinghi palova buyu rokhubomü nahisü reihkhaomai arou nou teithetsü reihkhao soue, reilova hai mai adai ae khelova buyu rokhubomü hia mai adai nou khoe. Kini pojüyu ki hisü reihkhaomai adai nou kho-e, süsü kide ali hi mai ahai-hai nou teithetsü kho-e.

¹⁸Sahpao haokhai touyu teinghi loulova ludu hinou mai adai panou kho-e ae Sahpao hinou mai ahai nou reihkhao soue.

¹⁹Korah ae Merari khü hinou mai haitao hai panou reihkhao soure donou vahbu thoupeie.

²⁰Levi maitao hrohinou Ahijah nou Ramai vei ki hi nangi pojüyu buh ae posheela nakhe khaiyu buh nasü khore donou dothou peie.

²¹Ladan hai Gershon vei nahpoutu ali-e, puh hai tyaosholea taoli vei puopao-e, ae puhvei tyaosholea maitao hi Jehieli nou matsü kana-e.

²²Ladan vei nahpoutu ahai, Zetham ae Joel puhai nou rathoki vei kini khaiyu buh ae nakhe khaiyu buh reihkhao soue.

²³Amram, Izhar, Hebron, ae Uzziel puletao vei tyaomai nahmaitao hi reihkhao vah sü thoupeie.

²⁴Moses vei tyao Gershom nahpoutu Shebuel nou peikhowo nasü soua rathoki hi kini khoyu hisü bue.

²⁵Gershom thaihou Eliezer vanou puhsü Shelomith ye kityarai-e. Eliezer hai Rehabiah puo-e, puhnou Jeshiah puo-e, puhnou Joram puo-e, puhnou Zikhri puo-e, puhnou Shelomith puo-e.

²⁶Shelomith ae puh thaihou-jürai maitao nou Ramai hi David veo, pfümounah hi peikho maitao, süthai-apei maitao ae reihmai peicho maitao nou pove sheela peiyu kini khesü zhupeiwe.

²⁷Soureih souyu hinou ngaolouyu kini khesü puletao nou kamai-a poloua Ramai ki hi posheela peiwe.

²⁸Rachipaolapu Samuel, Saul veo, Ner nahpoutu Abner, ae Zeruiah nahpoutu Joab nou Rathoki hi pove sheela peikhai touyu teitei sü Shelomith ae puhvei kihikha maitao nou zhupeiwe.

²⁹Izhar vei tyaosholea hinou Khenaniah ae puhvei nahpoutu maitaoye panou vakou nou buyu Israel maiye khasa-a hrüre donou peikhoyu ae chiku peiyu hi vahbu thoupeie.

³⁰Hebron vei tyaosholea hinou Hashabiah ae soupfülou süyu puhvei kityarai mai thelia kaihnai hai Jordan teinghi loulova buyu Israel maitao hi rathoyu hilo ae nuh teidei khasa-a hrüre donou vahbu thoupeie.

³¹Hebron vei puonah maitao hi Jeriah nou peicho nasüe. David nou veo koulouyu po raidai kouhai puletao nou Hebron vei tyaosholea hi soureih souveiyu mai kabüa busa tea phoutayu phaki, soureih souveih shoyu mai hai Gilead vei Jazer nuh hinou bua ngaoloue.

³²David veo nou Jeriah ae puhvei kityarai mai thehai-a kaihnai, soulou süyu mai ae pfümounah hinou peichayu maiye panou Reuben, Gad ae teinghi palova buyu Manasseh khü dali pei panou ratho zhai hilo ae nuh teidei khosa-a hrüre donou Ramai ye thoyu vah ae veo vei vah teitei sü zhupeire donou vahbu thoupeie.