Read Poumei Naga 1 PUOPAOKO 5 Bible Online

1 PUOPAOKO 5 - Poumei Naga bible

1 PUOPAOKO 5

¹Jakob nahpoutu naraio Reuben vei tyaosholea sü haitao-e. (Puh nou nahpoutu tsükayu nasüe, ana naraio na vei kika nasü puh hi peimoa Josef hi peiwure, daiolouzü puhnou puh puo chapfüye sazüyu donou.

²Judah khü nou thaihou-jürai maitao hrohinou khoukayu nasü sou-e, ae nuh teidei khasa-a hrüyu mai-a pa-e, ana tsüzha nasü Josef vei sou-a baie).

³Jakob vei nahpoutu naraio Reuben hai nahpoutu adai bue, Hanok, Pallu, Hezron, ae Karmi.

⁴Joel vei tyaosholea hi maiphao shoshonou kouyu hai haitao-e. Shemaiah, Gog, Shimei, Mikah, Reaiah, Baal, ae Beerah. Assaria maivei veo Tiglath Pileser nou puletao vei tyahrüye süthai peiyu Beerah ye sü nüloua vakou po-a tare.

⁷Reuben mai khü hi pfümounah taoye süthai-apei maitao zhih sü haitao-e: Jeiel, Zekhariah,

⁸Joel pfümounah hi Shema tyao Azaz nahpoutu Bela. Puletao hai Aroer hinou poa Nebo ae Baal Meon koute hi hrüe.

⁹Puletao nou teinghi palova radeiki hinou poa Euphratis rei hi koute hai hrüe, daiolouzü Gilead teidei hinou puletao vei kikhaorü hai alao sou tyakaa peie.

¹⁰Saul veo vei teile hinou Reuben khü nou Hagrit mai pei hi reih soua veiloue, alia puletao vei teidei sü Gilead hinou teinghi palova buyu teitei sü poloure.

¹¹Gad maitao nou Reuben maivei teidei reilova buyu Bashan hinou poa teinghi palova buyu Selekah hi koute hrüe.

¹²Bashan teidei hi hrüa buyu khütao hisü Joel nou matsüka na-e, süna thaisü Shaphan nou-e, süthaisü Janai ae Shaphat puhai noue.

¹³Puletao vei khü hi pfümounah anai bue, sütao vei puo sü haitao-e: Maikhail, Meshullam, Sheba, Jorai, Jakan, Zia, ae Eber.

¹⁴Puletao hai Huri nahpoutu Abihail vei tyaosholea maitao-e. Puletao vei puopaoh sü haitao-e: Abihail, Huri, Jaroah, Gilead, Maikhail, Jeshishai, Jahdo, Buz.

¹⁵Guni tyao ae Abdiel nahpoutu Ahi puhnou puletao vei khü hi peicho nasüe.

¹⁶Puletao nou Bashan ae Gilead teidei, sühi buyu nuhdutao alia Sharon hi kikhaorü khaiyu fühao teitei hinou hrüe.

¹⁷(Puopaoh maitao vei zhih haitao hai Judah teidei hi Jothan nou veo soua buki, ae Israel mai hi Jeroboam nou veo soua buyu teile hinou rükhai toue)

¹⁸Reuben mai, Gad mai ae teinghi palova buyu Manasseh maitao vei reihmai hai 44,760 bue. Puletao mai hrülai nou rüh pfüa khoche poyu ae voulou hai poveih sho-e.

¹⁹Puletao nou Hagrit, Jetur, Naphish ae Nodad maitao pei hi soureih souwe.

²⁰Puletao nou Ramai ye louche-a nou puletaoye soukha peio tea veachi pao-e, ae Ramai nou puletao vei akho sü keipeia panou puletaoye sü Hagrit ae puhye phaobo peiyu maitao jünou reih koloue.

²¹Puletao nou ngaobamai vei racho 50,000, zhaotu 250,000, rheisüh 2,000, alia hukha mai 100,000 hai nüloue.

²²Puletao nou ngaobamai taoli southa loue, daiolouzü puletao nou Ramai vei leli hinou reih soue. Puletao nou teidei sühisü vakou nüpoa tamo koute sühinou hrüe.

²³Teinghi palova Manasseh maitao nou Bashan teidei hinou reilova buyu Baal Harmon, Senir, ae Hermon Deichi hi khete hai bue, alia puletao hai tyakaa sho-a nou mai alao soupa-e.

²⁴Puletao vei pfümounah hi matsü shoyu puo maitao sü haitao-e: Epher, Ishi, Eliel, Azriel, Jeremiah, Hodaviah, ae Johdiel. Puletao mai teitei nou soureih souveih sho-e ae khü hi matsü shoyu maitao-e.

²⁵Ana puletao nou puletao vei puopaoh Ramai MAPAO hinou kaomoyu mahmo sü soutare, ae Ramai nou puletao nghoujünou hulaiyu maityatao vei ramai sü thotare.

²⁶Südonou Israel maivei Ramai MAPAO nou Assaria hi veo Pul (moyuma veo Tiglath Pileser tea süwe) panou puletao vei teidei sü reih hulou poloure, alia puhnou Reuben mai, Gad mai, ae Teinghi palova buyu Manesseh maiye nüpoho Halah, Habor, ae Hara alia Gozan reipe hisü panou zhaodo koute sühinou hrüe.