Read Poumei Naga 2 PUOPAOKO 1 Bible Online

2 PUOPAOKO 1 - Poumei Naga bible

2 PUOPAOKO 1

¹David nahpoutu Solomon veo nou Israel maivei vedei sü soutaosou khasa-a hrüloure, ae puhvei Ramai MAPAO nou puhye shiha peie alia puhye sü alaosou souduso peie.

²Veo Solomon nou Israel mai hrülai hi, mai theli ae mai kaih pei hinou tukhayu maitao, chiku-apei maitao, Israel maiye süthai peiyu maitao, khü khü hinou peikhoyu maitao hrülai hisü,

³puhye koa saho Gibeon hinou ratholai tea kharochi peie. Daiolouzü buh sühi sünou Moses nou radeiki hinou ta-a buki MAPAO nou bure sahpao soukhai touyu nasü bue.

⁴(Ana Vo Sübvü nawolouzü David veo nou Kiriath Jearim hinou pove Jerusalem hi puhnou soudakhai touyu Sahpao hisü khaiwure).

⁵Hur tyao Uri nahpoutu Bezalel nou soupeiyu baosahu vei posheelabu na hai Gibeon hinou MAPAO vei Sahpao pa hisü khaitoua bue. Südonou Solomon veo ae Israel maisou nou buh sühi sünou MAPAO ye tho-e.

⁶Veo Solomon nou Sahpao pa hinou buyu baosahu vei posheelabu na hinou hrikhaona theli dathaloua MAPAO ye meidei-a posheela peie.

⁷Süzhou khei Ramai nou Solomon hi veloua puh hi paoe, “Enou neye dai peiyu ne jüpawe, paokhaio.”

⁸Solomon nou haibüa chila peie, “Nenou apuo David ye dushoa tobai soumoa leshi peie, ae chua Eye panou puh thaosü veo souloue.

⁹Oh Ramai MAPAOwo, nenou chaachou soua paopeikhai touyu khesü souvete peio. Nenou Eye sü phouhao louhoyu maikhe mai pei hisü panou veo souloure,

¹⁰südonou maikhe maiye kaozü hinou khasa-a hrüloure ratsü ae dokai sü E jüpawe. Sükumo louzü Enou kabüa nevei mai haizhou buyu khesü khosa-a hrülou khailai-e?”

¹¹Ramai nou Solomon hi chila peie, “Nenou macha nasü doloure. Nenou kini moyuma zhih tayu moa ngaoba maiye southare moyuma hrüsho-a hrüloure nasü doloure thaosü avei maitaoye kaozü soua khasa-a hrüre donou ratsü ae hasü nasü doloure.

¹²Enou neye ratsü ae hasü sü peilai, süpei hinou, Enou neye kini, zhih tayu ae tsükhouyu sü ne jünou rai-a buyu veo mai moa haithai nou ve veo soure mai hrülai jünou pua peilai.”

¹³Südonou Solomon nou Gibeon hinou MAPAO ye thoyu Sahpao buyu buh nasü thaokhaiwua Jerusalem hi dakhai vere, ae puhnou Israel mai vei veo soua sühinou bue.

¹⁴Puhnou reihmai hai soutaosoua tudakhai loure, rheiluki hai thekiadai ae rheipfüa soureih souyu mainou thekiahai souda khaitoue. Sütaosü puhnou taoli hai Jerusalem hi khaitoue ae kukhe taosü nuhdu buyu teitei hi khaitoue.

¹⁵Puhvei teile hi shahu ae sana khesü Jerusalem hi hai chuh ali büa bue, ae sedar süü hai veimoyu süü kukhe ali büa alao sou bubaie.

¹⁶Veo vei hupomaitao nou rhei khesü Musri (Ejipt) ae Cilicia hinou hüloua poa huposoue,

¹⁷ae rheiluki khesü Ejipt hinou hüpoa vewe. Puletao nou rheiluki ae rhei khesü Hit mai ae Sairia maivei veo hisü zhopeiwe. Rheiluki ali nou shahu kaihrou peia zholoue ae rhei ali hinou shahu kaihlia raingou peiwe.