Read Poumei Naga 2 PUOPAOKO 11 Bible Online

2 PUOPAOKO 11 - Poumei Naga bible

2 PUOPAOKO 11

¹Veo Rehoboam nou Jerusalem hi velou louyu phaki, puhnou Judah ae Benjamin mai hrülaiye sü kuve jüloua reilo buyu Israel maitao pei hi soureih soua puhvei teideitao hai podakhai loure donou reihmai 180,000 hai soudakhai loure.

²Ana MAPAO nou rachipaolawo Shemaiah hisü

³taho veo Rehoboam ae Judah alia Benjamin mai hrülai hisü haibüa paopeio tea paoe:

⁴“MAPAO nou paoe, neletao taho neletao vei thaihou jürai soua buyu Israel maitaoye soureih souso. Neletao mai hrülai lahkuku ki hi dakhai tawo, daiolouzü haibüa vepayu teitei sü Enou soua baie.” MAPAO nou paoyu chi züa puletao hai Jeroboam pei hi soureih soumoa lahla ki hi dakhai tare.

⁵Rehoboam nou Jerusalem hinou hrüe, ae puhnou Judah ae Benjamin maivei teidei hi nuhdu haitao hai panou soureih hulou louhore donou kaopo poa soushu puloue:

⁶Bethlehem, Etam, Tekoa,

⁷Bethzur, Soko, Adullam,

⁸Gath, Mereshah, Ziph,

⁹Adoraim, Lakhish, Azekah,

¹⁰Zorah, Aijalon, ae Hebron.

¹¹Puhnou nuhdu sütao hai panou reih hulou louhore donou veishoa soukhai loue, ae nuhdu alili hi peikhomai chekhei khaipeie, alia touso, theadzü, ae darkhadzü khesü khaipeie,

¹²alia rü ae heung hai-a khaipeie. Haibüa puhnou Judah ae Benjamin maitaoye sü puhvei khakhe hinou sa-a hrüe.

¹³Israel mainou buyu teidei teitei hinou napao maitao ae Levi maitao hai Judah teidei hisü vere.

¹⁴Levi maitao nou puletao vei kilu ae kini koute-a thaokhaiwua Judah ae Jerusalem hisü vere, daiolouzü Israel maivei Veo Jeroboam ae puhvei maitao nou puletaoye sü panou MAPAO vei kuvah sü soubare.

¹⁵Jeroboam nou lah napao maitaoye sü doloua panou rah kukheye thoyu ae chode zhurai soukhai touyu basharatao thoyu hi vahbu thoupeiwure.

¹⁶Israel mainou buyu teidei teitei hinou Israel maivei Ramai MAPAO ye cheche-a tho nüyu maikhe mai hai Levi maitaoye koa Jerusalem hisü vere, sübüa puletao nou puletao vei puopaoh Ramai MAPAO ye posheela na khesü pove sheela peie.

¹⁷Haibüyu donou Judah vei vedei hai soukhoupu peie, ae po asü koute hai puletao nou Solomon nahpoutu Rehoboam ye babou peie. Po asü koute hai puletao nou Veo David ae Solomon nou khasa-a hrüyu büa hrüe.

¹⁸Rehoboam nou David nahpoutu Jerimoth nah naotupai Mahalath ye naloue, ae honapai hai Jesse nahpoutu Eliab nah naotu Abihail nah paie.

¹⁹Honapai nou nahpoutu asü napeie: Jeush, Shemariah ae Zaham.

²⁰Puhnou haithai naki kou Absalom nah naotupai Maakah ye napuloue, ae honapai nou puhye nahpoutu adai napeie: Abijah, Attai, Ziza ae Shelomith.

²¹Rehoboam hai maipfü kiacha bue ae khopfü nou rairou bue, alia puh vei nahpoutu mai kaicha bue ae nahnaotu mainou rairou bue. Puhvei maipfü mai hrülai hrohinou puhnou Maakahye leshipu ka-e.

²²Maakah nou napeiyu nahpoutu Abijah ye puhnou nahmai kukhe jünou jüpapue, südonou puhye panou puh thaosoua ve kouloure donou doloue.

²³Rehoboam nou dokai veishoa puhvei nahpoutu maitao hai vah kukua zhipeie, ae puletaoye sü Judah ae Benjamin maitao vei teidei hinou veishoa soukhai touyu nuhdutao hi khaipeie. Puhnou puh nahpoutu maitaoye sü kaozü soua nou kiko papeie ae maipfü mai-a alao phoupeie.