Read Poumei Naga 2 PUOPAOKO 12 Bible Online

2 PUOPAOKO 12 - Poumei Naga bible

2 PUOPAOKO 12

¹Rehoboam nou veo souloua dusho palouyu phaki, puh ae Israel mai hrülai hai MAPAO vei chikha khesü zümoa thaokhaiwure.

²Rehoboam nou veo soulouyu po angou navasü puletao nou MAPAO hi chilee cheche moyu donou MAPAO nou Ejipt maivei veo Shishak ye Jerusalem hi seive panou reih soure.

³Puhnou puhvei reihme hai rheiluki thelia kaih hai, rhei pfüyu reihmai nou therairou, ae puhye koa reih soutayu Libia mai, Sukkit mai ae Sudan mai hai phouhao louhoa salai-e.

⁴Puhnou Judah maivei reihbuh veishoa soukhai touyu nuhdu teitei sü poloua Jerusalem nuhdu hi koute-a vere.

⁵Süthaisü Rehoboam ae Judah teidei hinou peikho maitao hai Shishak ye ngaopia kabülai tea Jerusalem hinou vejüa buyu hisü rachipaolawo Shemaiah nou tave haibüa paoe, “MAPAO nou haibüa paoe, ‘Neletao nou Eye sü thaowure, südonou chuo Enou neletaoye sü veo Shishak bah hi thaothou peiwure.’ ”

⁶Süthaisü veo ae Israel mai hi süthai-apei maitao hai lah mah khesü süloua haibüa paoe, “MAPAO nou souyu haisü kao-a baie.”

⁷Puletao nou haibüa ledayu sü MAPAO nou ngaolou khaie, puhnou Shemaiah hi haibüa paopue, “Puletao hai lah mah sü sülouyu donou Enou puletaoye sü souha khailai more. Ana Shishak nou reih hulouyu phaki, puletaoye panou hriloulai, avei lekha rarou teitei sü Jerusalem pei hi koupei khailai more,

⁸ana Shishak nou puletao jünou reih koloulai, ae puletaoye sü panou puhvei kilai soutawulai, sübüa puletaoye panou avei kuvah souyu ae deiphao maivei kilai souyu hai daizhou koute tyakuyu sü busa touyu panou süloulai.”

⁹Veo Shishak nou Jerusalem hisü ve Rathoki hi buyu ae veo vei ki hinou buyu kini veishi sü poloure. Veo Solomon nou sana nou rü soukhai touyu teitei-a poloure.

¹⁰Veo Rehoboam nou sana rütao thaosü baosahu nou souloua sütao panou veo vei fühao hi reihkhaoyu peicha maitaoye panou kho-e.

¹¹Veo nou Rathoki hi veyu tsüsü reihkhao maitao nou na sütao sü poa tawe, ae süthaisü puletao nou rü sütaosü reihkhao maitao nou buyu buh hi pove khaiwe.

¹²Veo nou haibüa MAPAO ye pi-a hrülouyu donou MAPAO vei lekha rarou sünou puhye souhamoa khaipeie, ae Judah teidei hai-a kaozhou vei-a hrüloue.

¹³Veo Rehoboam nou Jerusalem hinou souduso paloua veo souloue. Puh hai po raidaili payu phaki veo souloue, ae po kianai hai Jerusalem hinou veo sou-e. MAPAO nou Jerusalem nuhdu haina hai Israel mai hrülaiye donou puhye panou thore donou dopaloue. Rehoboam pfü zhih hai Naamah tou-e, puh hai Ammon maipfü-e.

¹⁴Puh hai vah shili soua baie, daiolouzü puhnou MAPAO vei leli nasü phou moe.

¹⁵Rehoboam nou soupfü khaitouyu vahtao hai rachipaolawo Shemaiah ae Iddo vei puopaoh ko rükhai touyu hisü rüthou peikhaitoue. Rehoboam ae Jeroboam puhai hai soureih soukoute-a bubaie.

¹⁶Rehoboam thaiyu thai, puhye David vei Nuhdu hinou puhvei puopaoh maitao khüh hinou poa vupeie, ae puh nahpoutu Abijah nou puh thaosü pa ve kouloue.