Read Poumei Naga 2 PUOPAOKO 13 Bible Online

2 PUOPAOKO 13 - Poumei Naga bible

2 PUOPAOKO 13

¹Jeroboam nou Israel mai hi veo souyu po kiacha navasü Judah teidei hi Abijah nou ve kouloure,

²ae puhnou Jerusalem hinou po asü hai khasa-a hrüe. Puh pfü hai Gibeah nuhdu hinou hrüyu Uriel nah naotupai Mikaiah tou-e. Abijah ae Jeroboam puhai hai soureih soutare.

³Abijah nou soureih souveih shoyu reihmai 400,000 saloua reihbu hi ve-e, ae Jeroboam nou puletaoye dure donou soureih veishoyu reihmai 800,000 saloua reihbu hi ho-e.

⁴Reihmai taonou Ephraim maivei deichi hinou ve dao-e. Veo Abijah nou Zemaraim Deichi peitao hi panou Jeroboam ae Israel maitao hi haibüa shapaoe, “Oh Jeroboam ae Israel mai hrülai, apai kei peio!

⁵Israel maivei Ramai MAPAO nou David ae puhvei tyaosholea ye panou Israel maiye khasa-a hrülai veobu nasü peilai tea pepolou hoyu vo soukhai touyu nasü neletao sümovu?

⁶Ana David nahpoutu Solomon vei kilai soua buyu Nebat nahpoutu Jeroboam nou puhvei paopu khakhe hi buba-a khaitya pare.

⁷Süthaisü puhnou mai ashimai taoli saloua Solomon nahpoutu Rehoboam nou nahle-a buyu teile hinou, ae puhye dulou hoa buyu teile hinou puhye ngaophou moa puletao vei jüpa nasü soutare.

⁸Chuo neletao nou David vei tyaosholea hi MAPAO nou peikhai touyu vedei na pei hisü reih soulai tea bure, daiolouzü neletao hai mai alao bue, ae Jeroboam nou neletaoye donou sana nou soupei khaitouyu chode zhurai bashara nasü sa-a lai-e.

⁹Neletao nou MAPAO vei napao maitao, Aaron vei tyaosholea maitao, ae Levi maitaoye hutawure. Puletao thaosü neletao nou tyahrü kukhe mai ali büa napao maiye sü doloure. Mai taralia chode ali moa nghitu anai pove soushee louyu maiye sü panou neletao ramai vei napao soure donou doloure.

¹⁰“Ana Etao louzü zhou koute hai Ramai MAPAO ye thaomoa puhvei kuvah sü soua bue. Aaron vei tyaosholea maitao nou napao sü souwe, ae Levi maitao nou puletaoye soukha peiwe.

¹¹Puletao nou shona ae koukhe chüsü MAPAO hi poukai nüvei ae hrikhaona khesü meidei-a posheela peiwe. Puletao nou soushee khaitouyu taibel phao hisü touso na khesü posheela peiwe, ae koukhe chüsü sana nou soukhai touyu meivabvü khaiyu buh hisü meivabvü taoloua khaipeiwe. MAPAO nou soupeio tea kharochi peikhai touyu khesü Etao nou soupeiwe, ana neletao louzü puhye sü thaowure.

¹²Ramai nou Etao vei süthai-apeio sü soua salaie, ae puhvei napao maitao nou shabe sü neletao pei hi soureih souyu phaki nghoure donou poa lai-e. Oh Israel maitaore, neletao vei puopaoh Ramai MAPAO ye reih souso, neletao hai reih veilou laimoe!”

¹³Jeroboam nou puhvei reihmai kamai-a panou Judah maitao thailo nou tutsüa daloure donou seitawure, ae reihmai kukhe teitei sü puletao vei nghoujü nou bue.

¹⁴Judah maitao nou zhuhao veyu phaki puletaoye reihmai nou sühao louyu sü ngaolou khaie, puletao nou MAPAO hi kra-a soukha khore, ae napao maitao nou shabe sü nghoupare.

¹⁵Judah maitao nou shusoua share, ae Abijah nou süthaipoa reih soure; Ramai nou Jeroboam ae Israel maivei reihmaitaoye sü hraongu soupeiwure.

¹⁶Israel maitao hai Judah maitao nghoujü nou tutare, ae Ramai nou Israel maiye sü Judah mai bah hi thoupeiwure.

¹⁷Abijah ae puhvei maitao nou Israel maitaoye sü alaosou southawure, sübüa Israel maivei soureih souveih shoyu mai 500,000 hai southawure.

¹⁸Haibüa Judah mainou Israel mai jünou reih veiloure, daiolouzü puletao nou puletao vei puopaoh Ramai MAPAO ye loucheyu donoue.

¹⁹Abijah nou Jeroboam vei reihmai ye thaihu poa kou nuhdu taoli poloure: Bethel, Jeshanah, ae Ephron, alia süpehao hinou buyu nuh-a taoli poloure.

²⁰Jeroboam nou Abijah hria buki hai puhvei khouko ngaopulou more. Alia akhai hi kou MAPAO nou puhye sü southawure.

²¹Abijah hai dusopu pare. Puh hai maipfü kiadai bue ae nahpoutu mai kaihai bue alia nah naotumai kiarou bue.

²²Abijah vei hrümai ko, puhnou paoyu ae soupfü khaitouyu vah khesü Rachipaolawo Iddo vei Daomaiko hi rüthou pei khaitoue.