Read Poumei Naga 2 PUOPAOKO 14 Bible Online

2 PUOPAOKO 14 - Poumei Naga bible

2 PUOPAOKO 14

¹Veo Abijah hai puh puopaoh maitaoye koa zhitare, ae puhye sü David Nuhdu hinou poa vupeie. Puh nahpoutu Asa nou puh thaosü pa veo kouloure, ae puhvei khakhe hinou Judah teidei sü po kirou hai kaona-a hrüloue.

²Asa nou puhvei Ramai MAPAO vei nghingao hinou kaozü ae acheche nasü soupeie.

³Puhnou vakou maivei posheelabu ae rah cheche moyu tho-a buyu buh khesü soulai peie, ae chuh shula khaitouyutao ae Ashera rapfüpai vei zhurai soukhai touyu khesü soulai peie.

⁴Puhnou Judah mai hisü puletao vei puopaoh Ramai MAPAO vei jüpa nasü soulo ae puhvei chikha khesü zülo tea kharochi peie.

⁵Puhnou Judah teidei hinou buyu vakou maivei rathoyu buh ae kainüvei pou meidei-a posheelabu khesü souha laiyu donou puhvei vedei hisü kaona-a hrüe.

⁶Judah vei nuhdu khesü puhnou puhvei teile hi veishoa reihkhaobu ae nuhdutao vuloure donou kaopo khesü soushupu loue, südonou po taoli hai soureih soumoa MAPAO nou puletao hi kaonayu sü peie.

⁷Puhnou Judah mai hi paoe, “Etao vei nuhdutao sü kaopo, reihkhaobu, ae robomü khesü veishoa soulou laikhe. Etao vei teidei sü chukoute Etao nou hrüa bue, daiolouzü Etao nou Ramai MAPAO vei jüpa soua buyu donou puhnou Etaoye kaozhou ashi vere teitei hinou vupeia panou kaona-a bue.” Südonou puletao nou nuhdu khesü soushupu loue ae sava-a hrüa buloue.

⁸Veo Asa vei reihmai hai Judah teidei hinou mai 300,000 bue, ae Benjamin maitao hinou 280,000 hai bue. Mai haitao hai soureih souveih shoyu mai khaitoue.

⁹Zerah tea kua buyu Sudan maipu nanou Judah mai hi reih soulai tea reihmai bei (million) ali ae rheiluki kaihsü pfüloua Mareshah nuhdu hi koute hai reih huloue.

¹⁰Asa nou puhye reih soure donou tapa loure, ae puhai nou reih soure donou Mereshah nghia buyu Zephathah Deikho hinou souda-a bure.

¹¹Asa nou puhvei Ramai MAPAO hi haibüa veachi paoe, “Oh MAPAOwo, newo louzü lelou hoyu reihme aliye khouko bushoyu reihme aliye duloure donou soukha peilou süe. Etaoye soukha peio, Oh Etao Ramai MAPAO, daiolouzü Etao nou neye louche-a baie, ae nevei zhih hinou Etao hai dushoyu reihme hainasü reih soure donou ve-a baie. MAPAOwo, ne hai Etao vei Ramai-e, maiye panou ne jünou veilouyu sü soupeiso.”

¹²MAPAO nou Sudan maiye sü Asa ae Judah mai nghoujü nou hraongu soupeiwure, ae puletao hai reih dulouhoa tutare.

¹³Asa ae puhvei reihmaitao nou puletaoye sü Gerar hi koute hupoa koupeie, ae mai alao southawure, daiolouzü puletao hai MAPAO ae puhvei reihmaitao nghoujü hinou roh pore. Judah mainou nuhdu sütao hinou kini taoli hai poloue.

¹⁴Ae puletao nou Gerar nuhdu pehao hi buyu nuhdu taoli hai soushiwure, daiolouzü nuhdu sütao hinou hrüa buyu maitao hai MAPAO ye ngaopire. Puletao nou nuhdu sütao hinou nangi taoli hai poloure.

¹⁵Puletao nou kikhaorü kho-a buyu maivei fühao hia reih hulou zhaotu, racho ae kikhaorüa taoli hupoa tare. Süthaisü puletao nou Jerusalem hi dakhai tare.