Read Poumei Naga 2 PUOPAOKO 16 Bible Online

2 PUOPAOKO 16 - Poumei Naga bible

2 PUOPAOKO 16

¹Asa nou ve koulouyu po shiarou kousü Israel hi veo Baasha nou Judah hi reih huloure, ae Judah teidei hi talou tapayu sü nuloure donou Ramah nuhdu nasü kaopo poa soushu tare.

²Südonou veo Asa nou shahu ae sana sü Rathoki ae veo fühao hi kini khaiyu buh hinou poloua Damaskas hinou buyu Sairia vei Veo Benhadad hisü haibüa chi paolo tea seita-e:

³“Ahai puo nou keaveiyu büa ahai-a keavei-a bailaishe. Shahu ae sana haitao hai Enou ne hi sapeina soua peiwe. Nenou Israel mai hi veo Baasha ye keavei-a lathaoyu nasü thaopeio, sükulouzü puhvei reihmaitao nou avei teidei hi buyu khesü sapoa ta-a bailai.”

⁴Veo Asa nou paoyu sü Benhadad nou aetou peiwure, ae puhnou puhvei peikho maitao ae reihmaitaoye seiho Israel maivei nuhdu khesü reih soure donou tare. Puletao nou Israel maivei Ijon, Dan, Abel Beth Maakah, ae hupo nakhe khaiyu Naphtali maivei nuhdu teitei sü reih hulou poloure.

⁵Veo Baasha nou ko hai khesü choulou khaie, puhnou Ramah nuhdu hinou vah soua buyu sü thaokhaiwure.

⁶Süthaisü Veo Asa nou Judah hi mai hrülaiye sü saloua Baasha nou pove khai touyu chuh ae süü khesü Ramah nuhdu hinou poloure, ae sütao nou poa Geba ae Mizpah nuhdu haisü kaopo poa souloure.

⁷Süphaki rachipaolawo Hanani nou veo Asa hi veloua paoe, “Nenou Sairia hi veoye sü loucheloua nevei Ramai MAPAO ye louche moyu donou Israel hi veo vei reihmaitao hai ne hinou tureipa loure.

⁸Sudan mai ae Libia mai hai rheiluki ae rhei pfüyu mai koa reihmai alao movu? Ana nenou MAPAO ye loucheyu donou puhnou neye veilouyu sü peie.

⁹MAPAO nou deiphao teitei sü soutaosoua zhua bue, ae puhye lüloucheyu mai hisü khouko thoupeiwe. Nenou souyu hai vosho-a nou souwure, südonou chuo ne hai thaokhai moa reih soua bulaire.”

¹⁰Haibüa paopei khaie, Veo Asa nou rachipaolawo naye sü rarou sholoure, ae puhye sü hukhaki hi nüthou khaiwure. Teile hai phaki Asa veo nou rarou sholoua kamai-a soushi shopeie.

¹¹Asa veo nou soupfüyu vah haso teitei sü Judah ae Israel maivei Veo maitao Ko rüyu Larübvü hisü rüthou peikhai toue.

¹²Asa nou veo soulouyu po shiakü nava sü puh phi hai souloua puh hai phi shore, ana puhnou MAPAO hi tave soukha khomore, ana pou-apeio mai hinou soukha phoutare.

¹³Po ahai thaisü puh hai thaire,

¹⁴ae puhye sü David Nuhdu hinou puh lah chuhlea hinou soukhai touyu khüh hinou poa vupeie. Maikhe mainou puhvei thaiphao sü poukai nüvei ae theadzü naloua poa vupeie, ae puhye tsükhouyu hinou maikhe mainou mei deitu tuloua dopfü peie.