Read Poumei Naga 2 PUOPAOKO 22 Bible Online

2 PUOPAOKO 22 - Poumei Naga bible

2 PUOPAOKO 22

¹Arab maivei reihmaitao nou reih hulouyu phaki, puletao nou veo Jehoram vei nahpoutu kukhe mai hrülaiye sü southa khaiyu donou Jerusalem mainou puh nahpoutu nakhayu Ahaziah ye panou puh puo thaosou ve kouloue.

²Ahaziah nou po 22 payu phaki veo kouloue, ae puhnou Jerusalem hinou po ali hai veo soue. Ahaziah-a Veo Ahab vei kihikhamai nou soupfüyu zhai na thaifüa tare, daiolouzü puh pfü Athaliah, veo Ahab nahnaotupai ae Israel maivei Veo Omri tyaopai puhai nou puhvei paodou-apeio sü soupeia puhye sü panou vah ashi khesü soupfü tare.

⁴Puhnou MAPAO vei nghingao hinou vah ashi khesü soupfü tare, daiolouzü puh puo thaiyu thaisü Veo Ahab vei kihikhamai nou puhvei paodou-apeio sü soure, südonou puh hai shitare.

⁵Puletao vei chi züloua puhnou Israel mai hi veo Joram ye koa Sairia hi Veo Hazael pei hi soureih soutare. Puletao vei reihmaitao hai Gilead teidei hi buyu Ramoth nuhdu hinou reih sou-e, ae reih souyu sühinou Joram ye sü zhiwure.

⁶Puhye zhikhai touyu nasü veiloure donou puh sü Jazreel hi dakhai tare, ae Judah hi Veo Ahaziah nou puhye ve chalai tea Jezreel hi ve-e.

⁷Ahaziah ye panou kaodu tare hai puhnou Joram ye veive zhuyu hisünou pa vepalai tea Ramai nou soudawure, daiolouzü puhnou sühi veyu phaki, Ahab vei kihikha maiye panou souhare donou MAPAO nou theadzü napei khaitouyu Nimshi nahpoutu Jehu ye ve daore donou Jehuram ye koa tare.

⁸Jehu nou Ramai vei chipao thaifüa Ahab vei kihikha maiye souha veyu phaki, puhnou Judah hi süthai-apei mai ae Ahaziah ye koa laiyu Ahaziah thaihou jürai maivei nahpoutu maitao liye dao-e, ae puhnou puletao-a southawure.

⁹Puhnou Ahaziah ye sü phouta-e, ae puhnou Samaria hinou tutsüa buyu hisü nou ngaoloua nüloure. Puhye sü Jehu hi nüpoa ve southawure. Ana puletao nou puh paoh Jehoshaphat veo nou MAPAO ye donou lenousho-a vah alao soupeiyu donou puhye tsükhouyu hinoun puhvei thaiphao sü daovu peie. Ahaziah kihikhamai ali-a vedei khore donou hare.

¹⁰Ahaziah pfü Athaliah nou puh nahpoutu thaire touyu ko sülou khaie, honapai nou Judah teidei hi veo vei kihikhamai hrülaiye southa khaio tea kharochi peiwure.

¹¹Ana veo nahnaotupai Jehoshaba hai napao Jehoiada ki ve-a nou bue. Honapai nou Ahaziah nahpoutu Joash ye sü kheikhei soua Rathoki hi pove pokukhai loua veo nahpoutu kukhe maiye southayu hisü southalou more. Sübüa Athaliah nou veo nahmaiye southayu hisünou honapai nou Joash ye sü vupaloue.

¹²Veopfüpai Athaliah nou vedei hai po arou khasa-a hrüa buki puhnou Rathoki hinou tutsüa bue.