Read Poumei Naga 2 PUOPAOKO 23 Bible Online

2 PUOPAOKO 23 - Poumei Naga bible

2 PUOPAOKO 23

¹Po arou cheyu phaki, napao Jehoiada nou vah soutare donou le laloure. Puhnou reihmai peikhoyu mai angou: Jeroham nahpoutu Azariah, Jehohanan nahpoutu Ishmael, Obed nahpoutu Azariah, Adaiah nahpoutu Maaseiah, ae Zikhri nahpoutu Elishaphat puletaoye koa chidei souloure.

²Puletao nou Judah teidei hi buyu nuhdu teitei hisü taho Levi mai, ae khü-khü hi peikhoyu mai hrülaiye sü save Jerusalem hinou jüloure.

³Puletao mai hrülai sü Rathoki hinou ve jüloure ae veo nahpoutu Joash ye koa vo souloure. Jehoiada nou puletao hisü haibüa paoe, “Zhukhaio, thaitayu veo vei nahpoutu nasü haihi bure! MAPAO nou David vei tyaosholea ye panou teisa veo soulai tea paokhai touyu thaifüa puhye panou veo soulai.

⁴Etao nou haibüa soulai: Napao maitao ae Levi maitao nou Soteithe zhou vah soure donou hai hi veyu me asü soua dade khaitouyu hinou zha ali hai rathoki vei robomü sü kholai.

⁵Zha/me ali nou veo vei ki hisü kholai, ae me ali nanou Beikhei rokhubomü hinou kholai, ae maisou sünou rathoki vei kijü hinou ve jüa bulai.

⁶Rathoki vei kihikha hisü Levi mai ae napao mai moa mai kukhe hai mai li-a panou loulai moe. Puletao hai soushee khaitouyu thaifüa loua bailai, ana mai kukhe maitao hai MAPAO nou paopeiyu chi züa kijü nou bua bailai.

⁷Levi maitao nou reihna thoupfüa veo ye sü kholai, ae veo nou tayu buh teitei puhye khopoa nou talai. Mai tarali nou Rathoki hi loulai tea tayu maiye sü southawulai.”

⁸Napao Jehoiada nou paodou peikhai touyu teitei sü Levi maitao ae Judah maitao nou soupeie. Puletao nou Soteithe zhou vah soulaiyu maitaoye sü save peie, daiolouzü napao Jehoiada nou vah zhipei khaitouyu khesü panou thaokhai moa souta-e.

⁹Jehoiada nou reihmai peikhoyu maitao hisü Rathoki hi buyu David Veo nou soupeiyu heung ae rü khesü puletao hi peie.

¹⁰Puhnou maikhe maiye panou reih basei poloua Rathoki pehao teitei sü veo ye vuloure donou kholoure.

¹¹Süthaisü Jehoiada nou Joash ye sü kijü sapaloua veo peirü sü puh pei hi rüpeiwure, ae kabüa nuh teidei khasa-a hrülai touyu chikha larübvü ali sü puh bah hi thoupeie, ae sübüa puhye sü veo panou souloure. Jehoiada ae puhvei nahpoutu maitao nou Joash sü theadzü napeie, alia mai hrülai nou “Veo sü hrüsho theo” tea shusoua sha-e.

¹²Maikhe mainou shusoua veo ye paoshoyu paikho sü Athaliah nou chou louyu phaki, honapai nou MAPAO vei rathoki hisü thasho-a vere.

¹³Honapai nou Rathoki hi veyu phaki, veo mainou buyu buh hisü veo ashu ali hai reihmai peikho maitao ae shabe nghouyu maitao nou sühao-a buyu sü ngaoloure. Alia maisou sü sasho-a nou shusoua shabe sü nghoupoa nou bue, alia Rathoki hi lou souyu maitao sü lou soua nou nüh nüa bue. Süthaisü honapai hai sabanü sü paiphawua lekha sho-a “Shodo ashi soure, shodo ashi soure” tea share.

¹⁴Napao Jehoiada nou Athaliah ye panou Rathoki pehao hisü nou southayu sü jüpa more, südonou puhnou reihmai peikhowo sü kuloua “Reihkhaoyu maime ahai kohi sapaloua honapeiye vupalai tea teyu maitao-a koa southawo” tea paopeie.

¹⁵Puletao nou honapaiye sü nüloure, ae veo mai fühao Rhei Rokhobomü hinou puhye sü southawure.

¹⁶Napao Jehioada nou Veo Joash ae mai hrülaiye koa puletao hai MAPAO vei mai soua bailaire tea vo ali soupuloue.

¹⁷Süthaisü puletao mai hrülai nou Baal rathoki nasü taho hakhaore. Puletao nou sühi buyu posheelabu ae bashara khesü daphe dapho laiwure, ae Baal vei napao Mathan ye sü posheelabu nghoujü hinou southawure.

¹⁸Jehoiada nou napao maitao ae Levi maitaoye sü panou rathoki hinou vah soure donou vahbu thoupeie. Puletaoye panou Veo David nou Rathoki hi Moses nou MAPAO ye kabüa meideia posheela-a tholai tea chikha rüpeikhai touyu thaifüa panou soure donou vahbu thoupeie. Puletaoye panou rathoki hi lou souyu ae khonüh nüre hai-a panou zhure donou vahbu thoupeie.

¹⁹Sheemoyu maiye panou rathoki hi talou more donou Rathoki vei kikhubomü khoyu mai-a puhnou khaipeie.

²⁰Reihmai peikho maitao, nuh teidei khasa-a hrüyu maitao, ae mai hrülai nou Jehoiadaye koa nou veo Joash ye sü Rathoki hinou Veo vei ki hi sakou thoupeie. Puletao nou reilova buyu robomü hinou taloue, ae puletao nou veo sü panou vebuh buloure.

²¹Veopfüpai Athaliah ye southayu donou nuh teidei hi hrüa buyu mai hrülai sü asa shore ae kaonaphi toure.