Read Poumei Naga 2 PUOPAOKO 24 Bible Online

2 PUOPAOKO 24 - Poumei Naga bible

2 PUOPAOKO 24

¹Joash nou Judah hi ve koulouyu phaki puh hai po anai baihie, ae puhnou Jerusalem hinou po raidai hai veo soua bue. Puh pfü zhih nou Zibiah toue, ae puh hai Beershaba nuhdu hi maipfüe.

²Napao Jehoiada hria buki sasü puhnou MAPAO vei jüpa vah khesü soue.

³Jehoiada nou puhye maipfü ahai phoupeie, ae puhai nou nahnaotu poutu maitaoli hai hrüpeie.

⁴Phajütou thaisü veo Joash nou Rathoki nasü soulilai tea lela loure.

⁵Puhnou napao maitao ae Levi maitaoye kuve jüloua puletao hi paoe, “Judah teidei hinou hrüa buyu mai hrülai hinou po po vei peie buyu kikha nasü taho khaloua pove Rathoki sü soulilai, hainasü thashoa soumo louzü shire” tea paoe. Ana Levi maitao nou hai nasü thashoa soulou more.

⁶Südonou veo nou napao peichana Jehoiada ye kuloua puh hi haibüa paoe, “Ne daisounou Levi maiye panou Judah teidei hi ae Jerusalem hinou hrüa buyu maitao hinou MAPAO vei kilai Moses nou MAPAO vei ki soure donou kikha pozü nasü panou khalou mowe?”

⁷(Naotu ashi Athalia vei thaifüyu maitao nou Rathoki nasü soushi khaiwure ae sühi sheeyu nataoli hai poloua Baal rathoyu ki hi pove khaiwure.)

⁸Veo nou Levi maitao hi mainou thou sana pove peiyu thoure sübvü ali soulo tea kharochi peie, ae sünasü Rathoki hi taloure kibomü hi khaipeie.

⁹Judah ae Jerusalem veishi hisü Ramai vei kilai Moses nou radeiki hinou Israel mai hi poyu kikha nasü MAPAO donou pove peio tea paosü tapeie.

¹⁰Süthai-apei maitao ae mai hrülai nou haibüa souyu sü asa shore, ae puletao nou kikha khesü sübvü hi pove thoupeie.

¹¹Teithetsü sü Levi maitao nou sübvü nasü hai donou dokhai touyu veo vei peikhomai hi pove peiwe. Sübvü na phouyu phaki veo vei rü-apeio ae napao peichana thaosoua vah souyu maitaoye panou phouloua poloue, ae sübvü nasü khaiyu buh hi podakhai ve khaipeie. Puletao nou haibüa thou sana hai taoli khaloure.

¹²Veo Joash ae Jehoiada nou pousha sana khesü Rathoki soushupuyu mai hi peiwe, ae puletao nou chuh daoyu, süü poa shara souyu ae hu kuyu maiye ngaloua Rathoki sü sou-e.

¹³Vah souyu mai hrülai nou soutaosoua vah sü soupeie, ae puletao nou Rathoki nasü soulihloua raichoki ashu bütoua souveih shopeie.

¹⁴Rathoki nasü puletao nou souche peiyu thai, li-a buyu sana ae shahu khesü Veo ae Jahoiada hi pove dakhai peie, ae sütaosü poa rathoki hi poa vah soure paikhao khesü souloue. Jehoiada hria buki Rathoki hi pou kainüvei meidei-a posheela khesü teithetsü soupeie.

¹⁵Jehoiada hai tsükhao khao-a thaire, ae puh thaiyu phaki puh hai po kaihlia shirou pare.

¹⁶Puhvei thaiphao hai David vei Nuhdu, veo maiye poa vuyu buh hinou daovu peie, daiolouzü puhnou Israel mai hi, Ramai hi, ae Rathoki donou vah aveih taoli soupeie.

¹⁷Anou Jehoiada thaiyu thai, Judah hi süthai-apei maitao nou Joash ye sü panou puletao vei chi zütare.

¹⁸Südonou maikhe mai hai puletao vei puopaoh Ramai MAPAO ye Rathoki hi ve ratho more, ae bashara alia Asherah rahpfüpai zhurai khesü tho tare. Puletao nou haibüa mahmo soutayu donou MAPAO vei lekha-rarou sü Judah ae Jerusalem hisü vere.

¹⁹MAPAO nou rachipaola apei maiye seive puh hi dakhai veloua baio tea paopeie, ana puletao nou dakhai ve bare.

²⁰Süthaisü Ramai vei rako nou Jehoiada nahpoutu Zekhariah hi koulou loure, ae puhnou maikhe mainou zhingao lousüyu buh hinou laloua haibüa paoe, “Ramai MAPAO nou neletao hi daisou nou neletao hai puhvei chikha khesü zü moa lah neletao hi veahoyu sü pove louwe tea noua bure. Neletao nou puhye thaoyu donou, puh-a neletaoye thaowure.”

²¹Maikhe mainou Zekhariah ye southalai tea chi kuyu hisü Joash-a koa louzholoua veo nou puhye chuh nou khyathawo tea kharochi peie puhye sü Rathoki pa hinou maikhe mainou chuh nou deithawure.

²²Zekhariah puo Jehoiada nou puhye leshi shoa kidusopa peiyu nasü Joash nou licholou more, ae puhnou Zekhariah sü southawure. Zekhariah nou thailouyu phaki puhnou paoe, “Nenou soupfüyu khesü MAPAO panou zhuloua neye sü tudee peitheo.”

²³Potei süna akhai hisü Sairia maivei reihmai nou Joash pei hi reih souvere. Puletao nou Jerusalem hisü reih hulou süthai-apei mai hrülaiye sü southawure ae nangi teitei sü Damaskas hi pota khaire.

²⁴Sairia maivei reihmai hai mai pou moe, ana puletao jünou mai pousho-a buyu Judah maiye sü MAPAO nou puletao bah hi thou peie, daiolouzü Judah mai nou puletao vei paipaoh Ramai MAPAO ye malaiwure. Haibüa Ramai nou Veo Joash ye sü tudee peie.

²⁵Puhye sü zhishi shore, ae ngaoba maitao dakhai tayu thai, puh khe hinou peikhoyu mai ahai nou puhye sü Jehoiada nahpoutu Zekhariah ye southayu donou züphao hinou southawure. Puhvei thaiphao hai David vei Nuhdupao hinou poa vupeie, anou veo maitaoye poa vuyu buh hisü vu moe.

²⁶Puhye southayu mai ahai sü Ammon maipfü Shimeath nahpoutu Zabed, ae Moab pfüpai nahpoutu Shimrith.

²⁷Puhvei nahpoutu maitao vanou, ae puh hi rachipaola-apei maitao nou paoyu chitao, ae puhnou rathoki soulih peiyu teitei sü vemaitao vei ko rükhai touyu larübvü hi rüthou peikhai toue. Puh nahpoutu Amaziah nou puh thaosoua ve kouloue.