Read Poumei Naga 2 PUOPAOKO 28 Bible Online

2 PUOPAOKO 28 - Poumei Naga bible

2 PUOPAOKO 28

¹Ahaz nou veo koulouyu phaki puh hai po kai pare, ae puhnou Jerusalem hinou po kiarou hai veo soue. Puhnou puh paoh David Veo büa vah haso aveih sü soumoe, ana MAPAO nou jüpa moyu vah khesü soua baie,

²ae Israel maivei veo maitao nou tayu büa ta-a baire. Puh sü hu nou Baal zhurai sü souloure,

³pou kainüvei sü Hinnom Deikho hinou meidei-a posheela peie, alia puhnou Israel mainou talouyu phaki, MAPAO nou hulai peiyu tyahrü maitao nou soupfüa buyu zhaidou ashi thaifüa puh nahpoututao koute-a bashara hi meidei-a posheela peie.

⁴Cheche moyu rahye thoyu buh, deichi kinou ae süübe phi kinou Ahaz hai pou kainüvei meidei-a bashara khesü posheela peie.

⁵Veo Ahaz nou mahmo souyu donou puhvei Ramai MAPAO nou Sairia maiye panou puhye hraongu soupeie ae puhvei mai taoli hai hukhamai soua Damaskas hi panou nüpoa tare. Süpei hinou MAPAO nou Israel maivei Veo Remaliah nahpoutu Pekah panou Ahaz veoye sü hraongu soupeie ae puhvei veihshoyu reihmai 120,000 hai teithe ali hinou southa peie. Puletao vei puopaoh Ramai MAPAO nou haibüa soupeiyu hai daivanoue toulouzü puletao nou puhye malaiyu donoue.

⁷Israel maivei reihmai ali Zikhri tea kuyu punanou Ahaz nahpoutu Maaseiah, veo vei ki kho-apeio Azrikam ae veo vei kheve hinou peichawo Elkanah puletaoye sü southa peie.

⁸Judah mai hai puletao vei thaihou-jürai mai baiyuma Israel mainou naotumai ae nahmaitu 200,000 hai hukhamai soua Samaria hi nüpoa tare, ae navei-a taoli posa-a tare.

⁹MAPAO vei rachipaolawo mai ali Oded tea nou Samaria nuhdu hinou bue. Puhnou Israel maivei reihmaitao nou Judah maiye hukhamai soua nüpoa laiyu maitao hai nuhdu taloure hinou pa dao-e, ae puletao hi haibüa paoe, “Neletao vei puopaoh Ramai MAPAO nou Judah maiye lekhayu donou neletaoye panou reih veiloue, ana neletao nou puletaoye tarasoua southayu sü raki hi choukhere.

¹⁰Alia chu-a neletao hai Jerusalem ae Judah hinou hrüa buyu maitaoye panou neletao vei qila soulai tea bure. Neletao-a neletao vei Ramai MAPAO hi soumah khaitouyu bue touyu neletao sümovu?

¹¹Enou paoyu sü keilo! Hukhamai haitao sü neletao vei thaihou-jürai ae tupfü mai baie. Puletaoye panou lado soua tawo, molouzü MAPAO vei lekha rarou nou neletaoye sü tudee peilaire.”

¹²Süthaisü Israel maiye süthai-apei mai adai, Jehohanam nahpoutu Azariah, Meshillemoth nahpoutu Berekhiah, Shallum nahpoutu Jehizkiah, ae Hadlai nahpoutu Amasa hai maitao-a reihmaitao nou soupfüyu vah sü kaomore tea paoe.

¹³Puletao nou haibüa paoe, “Hukhamai haitao sü hai hi salouso! Etao hai MAPAO nghoujü nou mah sü soua bubaie, ae puhvei lekha rarou sü soua puhnou Etaoye tudeere sü bue. Süpei hinou chu-a kaomoyu vah khesü southoupu peia panou Etao pei hi veahoyu sü velaiwu?”

¹⁴Südonou reihmaitao nou hukha maitao ae puletao nou shaopoa veyu natao sü puletaoye süthai-apei maitao ae maisou hi peiwure,

¹⁵ae mai adai taonou nüpoa laiyu hukha maitao sü saloure, ae puletao hrohinou sabanü banou moyu maiye sü sabanü banou peie, phikha hayu maiye sü phikha peie, puletaoye touso peie, ae zhizhu khaitouyu maiye sü oliv theadzü noupeie, alia lelouho maiye rheisüh phao hinou pfüloua puletao mai hrülaiye sü habe nuhdu Jeriko hi save thoupeie. Süthaisü puletao hai Samaria hi dakhai tare.

¹⁶Edom mainou Judah teidei hi reih huloupua hukhamai taoli nüpoa tare, südonou Veo Ahaz nou Assaria maivei Veo Tiglath Pilesar hinou soukha khore.

¹⁸Teile süphaki Philistin mainou-a Judah maivei teidei khelo buyu ae teinghi loulo buyu nuhtaoli hi reih huloure. Puletao nou Beth Shemesh, Aijalon, ae Gederoth nuhdutao, alia Soko, Timnah, ae Gimzo nuhdutao ae süpehao hinou buyu nuhtao noupu poloua füsho-a buloure.

¹⁹Judah hi veo Ahaz nou MAPAO vei jüphi ae puhvei maitao hi kaozü moyu vah souyu donou MAPAO nou Judah teidei hisü veahoyu hai pove peie.

²⁰Assaria hi Veo nou Ahaz ye soukha peiyu paomoa nou souveapu peie.

²¹Südonou Ahaz nou Rathoki hinou buyu, veo vei ki hinou buyu ae süthai-apei maitao hinou buyu sana sü poloua Assaria hi Veo ye pove peie, ana sütao vanou-a puhye sü soukha peimore.

²²Ahaz nou veahoyu daopu khaie, MAPAO vei jüphi ae mahmo sü soupua baire.

²³Puhye hraongu soupeiyu Sairia maivei basharatao hi puhnou posheela peie, daiolouzü puhnou haibüa paoe, “Sairia maivei rahtao nou Sairia maivei veo ye soukha peiwe, südonou Enou puletao vei basharatao hi posheela peilouzü, rah sütao nou E-a soukha peishulai.” Ana hai nasü puhye donou ae Israel mai hrülaiye donou veaho puyu ae kayu nasü baire.

²⁴Süpei hinou, Ahaz nou Rathoki hi buyu na khesü poloua dakho sasa khaiwure, ae Rathoki kikhu sü khuwure; alia Jerusalem buliki hinou bashara thoyu buh sü soushu loure.

²⁵Judah teidei hi buyu nuh teitei hisü puhnou cheche moyu bashara thoyu buh ae posheelabu khesü soupeie. Haibüa souyu donou puletao puopaoh Ramai MAPAO vei lekha rarou nasü lah puh hi pove loure.

²⁶Puhnou soupfüyu vah haso teitei sü Judah ae Israel maivei Vemaitao Larübvü hi rüthou peikhaitoue.

²⁷Veo Ahaz thaiyu thai, puhye Jerusalem hinou povu peie, ana veo maitaoye poa daovuyu khüh hi poa vupei moe. Puh nahpoutu Hezekiah nou puh thaosou pa ve kouloue.