Read Poumei Naga 2 PUOPAOKO 4 Bible Online

2 PUOPAOKO 4 - Poumei Naga bible

2 PUOPAOKO 4

¹Veo Solomon nou posheelabu ali hai baosahu nou souloue, sünavei sa-jha hai mitar aküe, ae kuyu nou mitar adai ku-e.

²Süthaisü puhnou dzükhao ali baosahu nou haorüa souloue, süsü thouyu nou mitar 2.2, khupe ali hinou ali hi kouyu hai mitar 4.4, ae dzükhao khupe teitei douhao veyu hai mitar 13.2 bue.

³Dzükhao vei khupe haoyu teitei hisü lu ahai soua zhai veishoa southou khaitoue.

⁴Dzükhao sünasü baosahu nou soukhai touyu chode kiahai phao vasü khaikhaitoue, chode sütaosü chode asü nou teinghi loulova reiwe, chode asü nou reilova rei-e, chode asü nou khelova rei-e, ae chode asü nou teinghi palova rei-a bue.

⁵Dzükhao vei shouyu nou milimitar 75 shou-e, ae khupe hai pai vei mü büa soukhai toue alia poupa payu büa soukhai toue. Dzükhao sühisü dzü hai litar therairou loulou süe.

⁶Puletao nou dzüraikhao-a kirou soukhai toue, raikhao angou hai Rathoki vei reilova khaipei khaitoue ae angou hai khelova khaipei khaitoue. Puletao nou sütao sü poa hrikhaona meidei-a posheelare khesü dzü khüwe. Dzükhao adu hi buyu dzü sü napao maitao nou poa dzü khüwe.

⁷Puletao nou sana nou meivabvü khaiyu buh kirou souloue, ae taibel-a kirou souloue, alia sütaosü poloua Rathoki hi khaiwure; angou taosü reilova ae angou nou khelova hi khaitoue. Puletao nou sana khaosao-a kaihli souloue.

⁹Puletao nou kihikha nou napao maitaoye panou bure donou kide soukhai peie ae maisou panou bure donou kide adu nasüa soupeie. Kide süna vei kikhu hai baosahu dzünou napeie.

¹⁰Dzükhao nasü puletao nou Rathoki vei khelo teinghi palova soukhai toue.

¹¹Huram nou likhao, raikhao ae khaosao khesü soupeie. Puhnou Rathoki hi khaire natao hai Veo Solomon hi soupeilai tea paoyu teitei sü souche peie: Deka ahai; Deka ahai pei hi khaosao zhai büa southou peie. Deka ahai pei hi hurai zhai büa zhai-nga southou khaipeie, Deka ahai pei hi khaosao zhai büa southou khaiyu hi vajüshithou kaihdai hai lu ahai soua southoupei khaitoue, Choluki kirou, Raikhao kirou, Dzükhao ali Chode kiahai (Dzükhao khaire donou chode kiahai) Likhao, alia khaocha. Huram nou MAPAO vei Rathoki hi poa vah soure natao teitei sü veishoyu baosahu nou Veo Solomon nou soupeio tea kharochi peiyu thaifüa soupeie.

¹⁷Veo nou Jordan deikho Sukkoth ae Zeredah kohinou na sütao sü meideia kuloue.

¹⁸Na alao souyu donou baosahu kazhou loudesa touyu hai mailia sümoe.

¹⁹Veo Solomon nou Rathoki na haitao hai veishoyu sana nou poa sou-e. Posheelabuh ae Ramai ye posheelare raokhao khaiyu taibel;

²⁰Sheesheelai buh pah hi mei taore donou meivabvü khaiyu buh ae meivabvütao,

²¹poupa, meivabvü, ae poa na biyutao,

²²meivabvü sounghiyuna, khaosaotao, kainüvei poa mei deire khao, ae mei thouyu bvü haitao teitei hai veishoyu sana nou soukhai toue. Rathoki vei kikhu ae sheesheelai buh hi taloure kikhu hai veikayu sana nou meahao khaitoue.