Read Poumei Naga 2 PUOPAOKO 6 Bible Online

2 PUOPAOKO 6 - Poumei Naga bible

2 PUOPAOKO 6

¹Süthaisü Veo Solomon nou veachi paoe, “MAPAO, ne hai teihao ae teizhi hinou bua bailai tea doloue.

²Chuo Enou neye panou teisa bure donou veishoyu Rathoki ali soupei khaitoue.”

³Süthaisü Veo Solomon nou Israel maisou sühinou vejüa buyu maitao hi pah pfürei loua Ramai hinou shiha khopeie.

⁴Puhnou paoe, “Israel maivei Ramai MAPAO ye sü paosholo! Puhnou apuo David hi haibüa chaachou soukhai touyu nasü soupeie,

⁵‘Enou avei maitaoye Ejipt teidei hinou sapalouyu nou poa zhou koute hai Israel maivei nuhdu ali-a panou Eye thoyu rathoki soure donou dopei moe, ae mai ali koute-a panou avei maitaoye khasa-a hrüre donou dopapei mohie.

⁶Ana chuo Enou Jerusalem hinou pa Eye thore donou, ae David, neye panou avei maitaoye khasa-a hrüre donou dopa khaipeiwure.’ ”

⁷Alia Solomon nou haibüa paopue, “Apuo David-a Israel maivei Ramai MAPAO ye thore donou Rathoki nasü soupeilai tea tsücho-e,

⁸ana MAPAO nou puh hi haibüa paoe, ‘Nenou Eye donou rathoki nasü souyu jüpa züe,

⁹ana nenou sünasü soulai moe. Avei Rathoki nasü panou ne nahpoutuye soulai.’

¹⁰“Chuo MAPAO nou apaopei khaitouyu nasü vete peire: Enou apuo thaosoua Israel maivei veo sü kouloure, ae Enou Israel maivei Ramai MAPAO ye thore donou Rathoki nasü soupeiwure.

¹¹Enou Rathoki hi Vo Sübvü, MAPAO nou Israel maiye koa vo soukhai touyu chikha chuh ahai thoukhai touyu nasü polou khai peiwure.”

¹²Süthaisü maisou vejüa buyu hinou Solomon nou posheelabu nghoujü hisü takou loure ae puh bah sü laloua veachi paoe.

¹³(Solomon nou maisou nghoujü tashu laloua chipaoyu buh ali baosahu nou jha duyu nou mitar 2.2 ae sa so-a mitar 2.2 alia kuyu nou mitar 1.3 nou souloua maisou vejüyu toutsü hisü khaipeie. Puhnou maisou panou zhingao khailou süyu buh sühi sünou khoukhü loure, ae puh bah sü ratei lashu loure).

¹⁴Puhnou haibüa veachi paoe, “Israel maivei Ramai MAPAOwo, raki ae deiphao teitei hi ne büyu rah ali-a ha-e. Nenou nevei maitaoye koa vo soukhai touyu nasü khaipeiwe, ae nevei maitao nou ne chi züa buyu phaki, nevei leshi nasü ngaopeiwe.

¹⁵Nenou apuo David hi chaachou soua paoyu teitei sü soupeie; zhou teithe sütao teitei sü vepa-a bure.

¹⁶Chuo, Israel maivei Ramai MAPAOwo, nenou apuo hi puhvei tyaosholea maitaoye panou nevei chikhatao sü zütoua bure toulouzü, Israel mai pei hi panou teisa vebuh hi bukoute peilai touyu nasü soupeio.

¹⁷Südonou chuo MAPAO Ramai, nenou nevei kilai David hi chaachou soua paopeiyu teitei sü liche-a souvete peio.

¹⁸“Ana Ramai MAPAOwo, nenou kabüa deiphao maiye sa-a bulai touwe? Raki teitei-a neye donou tailero, südonou kabüa Enou souyu Rathoki hisü ne bulou khailaige?

¹⁹Oh avei Ramai MAPAO, E hai nevei kilai baie, südonou Enou ne hi veachi paoyu ae akho souyu khesü keipeio.

²⁰Rathoki hai nasü nenou hea-khei thaomoa zhupeio. Ki haina hinou neye panou tholai tea nenou chaachou soupeiwure, südonou Enou ki haina hinou ne hi veachi paoyu phaki keipeio.

²¹Enou veachi paoyu phaki, ae nevei Israel maitao nou ki haina hinou veachi paoyu phaki keinou peio. Nenou buyu raki hinou Etao vei veachi sü keipeio ae Etaoye khailu peio.

²²“Mai ali nou mai ali hi kaomoyu vah haso souwua panou nevei Rathoki hi posheelabu nghoujü hinou tave chaachou soulai tea velouzü,

²³Oh MAPAOwo, raki hinou keinou loua nevei kilai maitaoye chiku peio. Mahmo souyu mai hisü puletao nou ngaozüna thaifüa soupeio, ae acheche maiye sü checheyu thaifüa soupeio.

²⁴“Nevei Israel maitao nou mahmo souyu donou ngaobamai jünou hraoyu ngao-a buyu phaki, puletao nou ledaloua Rathoki hai hinou tave tainoutou soua ne hinou khailupa peio tea veachi paoyu phaki,

²⁵raki hinou puletao vei veachi sü kei peio. Puletao vei mahmo khesü khaipeio, ae nenou puletao hi ae puletao vei puopaoh maitao hi peikhai touyu teidei hisü sa-a dakhai ve peio.

²⁶“Nevei maitao nou mahmo souyu donou nenou tei panou rümoa buyu phaki, puletao nou ledaloua Rathoki hai hinou tave nakouloua ne hi veachi paoyu phaki,

²⁷Oh MAPAOwo, raki hinou puletao vei veachi sü kei peio ae nevei kilai Israel maitao vei mah khesü khaipeio, ae puletaoye kaozü nasü paodou peio. Süthaisü nenou nevei maitao hi panou teisa vei soure donou peiyu teidei hisü teirü seikou peio.

²⁸“Hakinou teidei hai hi tokaa velouzü, moyuma rahta rahvu velouzü, moyuma shinamara khesü teikhai teirü ashi, moyuma khazü khenou tou louzü, moyuma nevei maitaoye ngaobamai nou reih huve louzü, moyuma sounou ashi velouzü,

²⁹puletao vei veachi keinou peio. Nevei Israel mai taralinoua veaho sho-a Rathoki hai hinou tave bah laloua veachi paoyu phaki,

³⁰puletao vei veachi sü kei peio. Puletao vei veachi sü nenou buyu raki hinou kei peio ae puletao vei mahmo khesü khaipeio. Ne likhei deiphao maivei tsüle sü süa baie, südonou mai alili vei jüpana thaifüa soupeio,

³¹sükure toulouzü nevei maitao nou neye sü tsükhoulai, alia nenou Etao puopaoh mai hi peikhai touyu teidei hinou hrüa buki sasü ne chi züa hrülai.

³²“Teidei kukhe hinou hrüa buyu shetumai nou nevei aduso ae khouko khesü süloua tave Rathoki hai hinou veachi pao louzü,

³³puletao vei veachi sü kei peio. Nenou hrüyu raki hinou puletao vei veachi sü kei peio, ae puletao nou jüpa-a khoyu nasü soupeio, süku louzü deiphao mai hrülai nou neye süloulai ae nevei Israel maitao büa puletao nou ne chi sü züloulai. Süthaisü Enou souyu Rathoki hai hinou neye tholai touyu puletao nou süloulai.

³⁴“Nevei maitao nou ngaoba maiye reih soulai tea tayu phaki, ae puletao nou buh taraki buyuma nenou dopa louyu nuhdu haina hinou Enou Rathoki soupeikhai touyu nahi pah pfürei-a ne hi veachi pao louzü,

³⁵puletao vei veachi sü kei peio. Puletao vei veachi sü raki hinou noupeio ae puletao hi veilouyu nasü peio.

³⁶“Nevei maitao nou ne jüphi soua kaomoyu vah haso soulouzü, ae mahmo soumoyu mai ali-a ha-a nou nevei lekha rarou hinou nevei maitaoye ngaobamai vei bah thoupeiwua puletaoye hukhamai soua teidei kukhe hi nüpoa tayuma,

³⁷nevei maitao vei veachi sü kei peio. Puletao nou teidei sühinou ledaloua ne hi mahmo khesü paopa loua ne hi veachi pao louzü, teidei sünasü kadou sho-a buyuma, puletao vei veachi sü kei peio, Oh MAPAO.

³⁸Puletao nou cheche vujünou ledaloua nenou Etao puopaoh hi peikhai touyu teidei, nenou dopa louyu nuhdu, ae neye thore donou Enou soupeiyu Rathoki haina hilo pah pfürei loua veachi pao louzü,

³⁹puletao vei veachi sü kei peio. Nenou buyu raki hinou puletao vei veachi sü keinou peio, ae puletaoye zhuvea peio alia nevei maitao nou soukhai touyu mahmo veishi sü khaipeio.

⁴⁰“Chuo, Oh avei Ramai, Etaoye zhupeio alia Etao nou buh hai hinou veachi paoyu khesü kei peio.

⁴¹Chuo tashulo, Oh Ramai MAPAO, ae nevei khouko shee soua Vo Sübvü nasü koa Rathoki hi teisa nou bulaire. Nevei napao maitao nou soupfüyu vah haso teitei sü shiha peio, ae nevei maitaoye sü panou nevei aveih vanou teisa sava-a hrülo.

⁴²Oh Ramai MAPAO, nenou dopa louyu veo ye sü malai peiso. Nenou nevei kilai David ye leshi peiyu nasü licho peio.”