Read Poumei Naga 2 PUOPAOKO 9 Bible Online

2 PUOPAOKO 9 - Poumei Naga bible

2 PUOPAOKO 9

¹Veo Solomon hai lamo shoshe touyu ko khesü sülou khaie, Sheba hi veo pfüpai nou tatei shoyu chi khesü taoli tave noulai tea Jerusalem hisü vere. Honapai nou kilai maitaoli ae pou kainüvei, chuh mutei ae sana alao sou pfüa ve-e. Honapai nou Solomon ye daolouyu phaki, puh nou noulai tea soudapoa veyu chinou teitei sü nou-e.

²Solomon nou chinou teitei sü tatei shomoa chila peikhai toupeie.

³Sheba hi veo pfüpai nou Solomon vei ratsü khesü chouloure, ae puhnou soukhai touyu veo fühao khesü ngaoloure.

⁴Honapai nou puhye peiyu touso, puhvei peikho maitao nou buyu kitao, puhvei veo fühao hi vah soua buyu maitao ae puletao nou banouyu sabanü, puhvei kilai maitao nou sabanü tupfüa puhvei tovai buh hinou lapoa buyu, ae puhnou Rathoki hi posheela peiyu teitei sü ngaoloure. Sükhe teitei sü honapai nou ngaoloua ssü hazhi-a khupashoa bure.

⁵Honapai nou veo hi paoe, “Enou avei teidei hinou nevei kotao ae nevei ratsü hai veishoa bue tea chouyu hai chechere.

⁶Maikhe mainou paoyu ko khesü Enou hai hi tave ngaomo koute sü E louche moa bue. Enou chouyu hai nevei ratsü buyu dalia mohie. Maikhe mainou paoyu jünou ne hai tsüveipu hie.

⁷Nevei kuvah soua ne pe hinou teisa buyu maitao nevei chipao khesü chouloua buyu maitao hai daizhou koute rako veisa.

⁸Nevei Ramai MAPAO ye sü paosholo! Neye panou Ramai MAPAO thaosoua veo buh hi bulouyu hai puh-a le vashoa nou bulai, daiolouzü MAPAO hai Israel maiye leshi-e ae puletaoye teisa vei soure donou soushupeie, Puhnou neye panou puletao vei ve kouloue, sübüa neye panou kaozü ae acheche nasü soupeire donou-e.”

⁹Honapai nou Veo Solomonye sapeina alao pove peie: sana sühcho thedai, poukai nüvei ae mutei chuh alao soua pove peie. Sheba hi veo pfüpai nou Veo Solomonye pove peiyu poukai nüvei hai tya jünou veipuyu poukai nüvei ali-a ngaomo hie.

¹⁰(Veo Hiram ae Solomon vei maitao nou Ophir teidei hinou sana pove peiyu maitao nou veishoyu juniper süü ae mutei chuh-a pove peie.

¹¹Solomon nou süü sütaosü poa Rathoki ae puhvei veo ki hi sho taopayu sü poa sou-e, ae lou souyu mainou poa lou souyu basei-a souloue. Sübüa veiyu natao hai raichoki Judah teidei hi ngaokhai toumo hie.)

¹²Veo Solomon nou Sheba hi veo pfüpai nou jüpa-a khoyu teitei peie, süsü honapai nou sapeina pove peiyu jünou pou-a nou peie. Süthaisü honapai hai puhvei kilai maitao koa lavei teidei hisü dakhai tare.

¹³Po pachü Veo Solomon nou sana sühcho thekaisü phali hai ngaolou koutewe,

¹⁴süpei hinou huha souyu maitao nou peiyu-a lou hie. Arabia hinou veo maitao ae puh khenou nuh teidei khoyu maitao-a puhye sü shahu ae sana pove peiwe.

¹⁵Solomon nou pfüa reih souyu rü adutya kaih ahai hai sana nou soukhaitoue, rü ali hinou sana sühcho anai loua sou-e,

¹⁶ae rü taitya hai kaihsü soukhaitoue, rü ali hinou sana sühcho asü loua sou-e. Puhnou sütao hai Lebanon Vaohro vei Ki hi pothou khai khaitoue.

¹⁷Veo nou puhvei vebuh hai praonü nou dusho-a soukhaitoue, ae sünasü veikayu sana nou neahao khaitoue.

¹⁸Vebuh hi taopare phiheadou arou soukhai toue, ae phihea dou ali hai sana nou khukhai toue. Vebuh hisü bah kayu ahai southou khaitoue ae souveo zhurai ahai— holo ali ae hailo ali tea southou khaitoue.

¹⁹Souveo zhurai kiahai hai phiheadou hi southou khaitoue, phiheadou ali hinou hailo ali ae holo ali tea nou soukhai toue. Haibüa vebuh soukhai touyu hai vedei kukhe hi ngaokhai toumo hie.

²⁰Veo Solomon vei paikhao teitei hai sana nou soukhai toukhai toue, ae Lebanon vaohro hinou poa soukhai touyu ki adu na hi buyu likhao veishi hai veishoyu sana nou soukhai toue. Solomon vei teile hi shahu hai hazho lia moa nou poa baie.

²¹Daiolouzü puh vei dzüluki hai Veo Hiram vei kilai maitao koa po asü hi bakha ali hai Tarshish hi tawe, ae khaiveyu phaki sana, shahu, praonü, vaovu ae va khesü pfüve koutewe.

²²Veo Solomon hai deiphao hi buyu veo mai kukhe jünou hangipu hie ae tsüdo-a veipu hie.

²³Ramai nou puh hi ratsü peikhai touyu thaifüa mai hrülai nou puh hinou tave peiphayu sü souwe.

²⁴Mai hrülai nou Solomon ye sapeina— shahu ae sana, sabanü, reih basei, poukai nüvei, rhei ae rheisüh khesü pove peiwe. Haibüa po patsü sü soukoutewe.

²⁵Veo Solomon vei rhei ae rheiluki khaiyu buh hai thedai bue, ae puhvei rhei pfüyu mai hai thekiahai bue. Puhnou sütao hai nuhdu buyu teitei hisü khai-e, ae kamai-a puhnou buyu Jerusalem hi khai-e.

²⁶Puhnou Euphratis rei hinou poa Philistin koute ae Ejipt maivei deirai hi koute hrüyu veo maitao pei hinou veo sü sou-e.

²⁷Puhnou veo soua buyu phaki, Jerusalem hi shahu hai chuh büa mula-e ae sedar süü hai süü kukhe ali büa Judah teidei hisü alao sou bue.

²⁸Solomon nou rhei hai Ejipt teidei hinou ae teidei kukhe hinou hüpoa nou ve-e.

²⁹Solomon vei ko hai arai nou poa akhai koute hai Rachipaolawo Nathan, Shiloh puona Ahijah vei Rachipaolayu hi-e, ae Rachipaolawo Iddo vei zho ngaoyu hinou, puhnou Veo Jeroboam nou Israel mai hi khasa-a hrüyu vanou-a paopeie, haitao hinou rükhaipei khaitoue.

³⁰Solomon nou Jerusalem hinou Israel mai hrülaiye khasa-a po raidai hrüe.

³¹Solomon hai puhvei puopaoh maitao koa zhitare, ae puhye David vei Nuhdu hinou poa vupeie, ae puh nahpoutu Rehoboam nou puh thaosü ve koulou-e.