Read Poumei Naga EZRA 4 Bible Online

EZRA 4 - Poumei Naga bible

EZRA 4

¹Judah alia Benjamin khütaoye ngaoba mainou nüpoa tayu maitao nou khaidave MAPAO vei Rathoki nasü soudakhai tare touyu süloukhaie,

²puletao nou Zerubbabel alia khü-khü hi peikho maitao hisü veloua paoe, “Etao-a Rathoki souyu hi ko-a soulai, daiolouzü Etao-a neletao nou thoyu Rah nasü tho-a baie, Etaoye buh haihi save thoupeiyu Assaria veo Esarhaddon teile hinou neletao Rah nahisü sheela peiwe.”

³Ana Zerubbabel, Joshua ae Israel maitao hi peikho maitao nou haibüa paoe, “Etaonou Rathoki soupare haina hio neletao vei soukhayu hai komoe, Parsia hi veo Sairas nou Eh hi kharochi peiyu thaifüa Etao lah soulou-a bailai.”

⁴Süthaisü teidei sühi buyu khemainou Judah maitaoye panou Rathoki soulou hore donou soupie alia le soucha thaiyu hai soutare.

⁵Süthaisü puletao nou Persia hi teidei kho-a buyu adu maitaoye ngaloua panou vah soulou more donou soure alia Parsia hi veo Sairas phao hinou Darius veo hi koute haibüa daihaore.

⁶Ahasuerus nou lou veo koulouyu po hinou poa, puletao nou Judah alia Jerusalem hi buyu maitao hisü larü hinou rüloua aeti moyu sü soutare.

⁷Artaxerxes nou Persia hi veo sou-a buki, Bishlam, Mithredath, Tabeel alia puletaoye koa vah souyu maitao nou veo hi Aramaik mai la nou rüe, phouyu teile hiwo lah la hi dapa peie.

⁸Rehum teidei khowo alia rü-apeio Shimshai nou Jerusalem hi aeti moyu nahai Artaxerxes veo hi haibüa rüpeie:

⁹“Rehum teidei khowo alia rü-apeio Shimshai ae puletaoye koa vah souyu mai, chiku-apeimai alia Tripolis, Persia, Erek ae Babilon, Susa hi Elam mai,

¹⁰alia mainou tsükhou louveiyu aduna Ashurbanipal nou puh nuh hinou hulaiwua Samaria ae teinghi palova buyu Euphraitis rei polova hinou ve füshee shoa buyu maitao nou rüpeie.”

¹¹Puletao nou rütayu seikonasü haitaoe: “Veo Artaxerxes, ne hi teinghi loulo vada buyu, nevei kilai maitao nou khurüwe,

¹²“Ve aduo, zhuvea nou hai nahai süpeio, süolouzü nenou Eh hi seiveyu Jihudimai hai Jerusalem hi khaive louloure. Puletao nou soushi khaitouyu nuhdu nasü soushupu khaire alia thasho-a souche loulaire.

¹³Veo nenou haihai süpeio, süolouzü puletao nou nuhdu alia bouvo haina souche loure touyu thaio, maikhe mainou kikha hai pei paimoe, alia ne vei kikha hai khaita bailai.

¹⁴Chuhai Ewo louzü nevei veo khe hinou bubaie, neye panou hraongu ngaonü moyu donou ko haina hai seive paosüa bue.

¹⁵Südonou daoh puopao mainou rükhai tiyu larübvü nasü panou phoure donou kharochi peikhaio. Sükulouzü teidei haina hai veihmoyu nuhdu ali-e, teisa nou vemaitao hi alia teidei khomai hi veayu peiwe, süvanou nuhdu haina hai souhawure touyu sü süloulai.

¹⁶Nuhdu haina soushupu loure tilouzü alia bouvo tao soushuloure toulouzü, nevei teinghi loulova buyu rei dapolo vatha teidei tao hai nevei veo teidei soupai moe touyu sü, Eh nou veo ne hi paosüwe.”

¹⁷Veo nou chila haitao hai seipeie, “Rehum teidei khowo ae rü-apeio Shimshai alia puhai-e koa Samaria hinou vah souyu tao ae rei hinou teinghi loulo va buyu nuh mai hrülai hi khurüwe.

¹⁸“Neletao nou seiko seiveyu nasü dapalou-a ahi phoungao peiwure.

¹⁹Südonou larü nasü phoukhaio tea kharochi peiyu hinou phoupa ngaoloure. Süolouzü daoh puopao teile hinou Jerusalem nuh hai vemai pei hi reih souyu, souveayu alia soubüroyu nuh alie touyu hai Enou süloure.

²⁰Khouko bushoyu vemai linou Jerusalem hinou veo-a buki, rei hinou teinghi loulova hrüa buyu mai hrülai hi kiphaokha, navei kha, alia huh souyu kha hai kha-e.

²¹Südonou homaitao hi Enou kharochi peipumo koute, nuhdu nahai soudakhai-a buyu hinou soupu khaiso touyu kharochi ali peio.

²²Haihai thashoa nou souo; daisounou veoye soushi shulai.”

²³Artaxerxes hinou veyu seiko hai Rehum, Shimshai alia puhye koa vah souyu maitao hi phoupeiyu phaki, puletao nou thashoa Jerusalem hi veloua Jehudi maitao hi nuhdu haina hai soudakhaiso tea khuwure.

²⁴Süvanou Jerusalem Rathoki vah souyu hai Parsia hi veo Dairus nou vekou louyu po ahai koute vah soupu more.