Read Poumei Naga EZRA 5 Bible Online

EZRA 5 - Poumei Naga bible

EZRA 5

¹Rachi paolawo Haggai ae Iddo nahpoutu Zekhariah nou Judah ae Jerusalem hi buyu Jehudimai hisü puletao pei hi buyu Ramai zhih hinou rachi paopare.

²Süthaisü Shealtiel nahpoutu Zerubbabel ae Jehozadak nahpoutu Joshua nou Jerusalem hi MAPAO vei Rathoki nasü soutare; alia puhaiye rachi paolayu maitao nou soukha peie.

³Süphaki rei hinou teinghi loulova buyu nuh khowo Tattenai alia Shethar-Bozenai ae puh haiye koa vah souyu maitao nou puletao hi ve loua noue: “Thaonou Rathoki haina soudakhai louvei-e touyu kharochi peie?”

⁴Puletao nou Rathoki soushuyu hia soukha peiyu maitao zhih-a noure.

⁵Ana Ramai nghithou louzü Jehudimai hi tsümaitao ye zhua nou bue, puletao nou Darius hi seiko seitayu na chila vemo koute vah sousouwo teanou khumoe.

⁶Haitao hai rei hinou teinghi loulova buyu teideitao khowo Tattenai alia Shethar-bozenai ae puhaiye koa sanou vah souyu maitao nou veo Darius hi seiko rütayu sü haibüe:

⁷“Veo Darius, kaonayu nou pa ne hi butheo.

⁸“Eh nou Judah teidei alia dushoyu Ramai ki hi ve zhure touyu sü veo ye panou sülounüe. Puletao nou chuh adunou poa bouvo hi thouwe, puhmaitao nou vah hai thashoa nou alia veihshoa nou soupare.

⁹“Südonou, Eh nou puletao tsümai hi haibüa noue: ‘Thaonou ki haina haibüa soudakhai shulouwo touyu kharochi peige?’

¹⁰Etao nou puletao zhih-a noue, daiolouzü thaomai nou süthaisa-a souwe touyu nasü sülou-a rüthou loure donou.

¹¹“Puletao nou Eh hi haibüa chila peie: ‘Etao hai raki ae deiphao hi Ramai vei kilai maitao-e, alia daoraiki nou Israel veo adumai alinou soukhai touyu Rathoki nasü Etao nou soushupu-a baie.

¹²Ana Eh puopaoh maitao nou Rakiva buyu Ramai rarou-lekha souwuyu vanou Puhnou Eh puopaoh maitaoye pa Babilon hi veo Nebukhadnezzar, Khaldea mai bah hisü thaothou peiwure. Süvanou puletao nou Rathoki sü soushiwure alia maitao-a nüpoa Babilon hi satare.

¹³Sükuyuma, Babilon hi veo Sairas, puhnou pa veo soulouyu po arai nahinou Ramai ki hai soushupu louwo touyu kharochi hai peiwure.

¹⁴Veo Nebukhadnezzar nou Jerusalem Rathoki hinou sana alia shahu vei na poloua Babilon Rathoki hi khaitouyu tao-a Sairus veo nou popaloua puhnou dopa khaitouyu teidei khowo Sheshbazzar hi peiwure.’

¹⁵Alia puhnou paoe, ‘Paikhao haitao hai poloua Jerusalem Rathoki hi pothou khailo, alia Ramai ki nasü daovei fü hinou soupalo.’

¹⁶Südonou Sheshbazzar nou Jerusalem hi ve Ramai ki nasü soushu tare, süteile hinou poa zhaodo koute soua bue, ae süsü souche loumo hie.

¹⁷“Chuo, veo nou jüpa louzü, Jerusalem Rathoki nahai veo Sairas nou souda khailoua vei-e touyu kharochi peiho peimoe touyu nasü veo vei larü khaiyu buh hinou phoupei khaio. Süthai nou veo nou haina vei vah hai Ehi soulou veishiyu paosü peio.”