Read Poumei Naga EZRA 6 Bible Online

EZRA 6 - Poumei Naga bible

EZRA 6

¹Süthaisü Darius veo nou lüpei-a Babilon hi veo vei larü khaiyu buh hisü phoue.

²Ana Media teidei hi Ecbattana nuhdu hinou zükhai touyu larü ali haibüa rüthou khaitoua ngaoloue:

³“Sairas nou pa vekou louyu po araina hinou haibüa kharochi sü peikhai toue, süolouzü Jerusalem hi posheelayu ae meidei-a rathoyu Ramai vei ki nasü panou soudakhai palouo; Rathoki nasü mitar kainai kulai ae mitar kainai kalai.

⁴Bouvo hai chuh nou lu asü thoulai, süthai hai süü nou lu ali thoulai; sühi tayu sha teitei hai veo vei kini hinou phalai.

⁵Alia veo Nebukhadnezzar nou sana ae shahu nou souyu natao Jerusalem hinou Babilon hi potayu tao-a pokhaive Jerusalem Rathoki hisü thoulai.”

⁶Süthaisü Darius nou chila haibüa seipeie, “Teinghi loulova buyu Tattenai teidei khowo Shethar-bozenai alia nevei samai adu maitao. “Rathoki hinou tahro tawo;

⁷Ramai ki nasü panou vah soutawo, süsü Judah teidei hi khowo alia Jihudimai hi süthai-apei maitaoye panou daoraiki souyu buh nahinou pa soulo.

⁸Enou neletao hi kharochi peiwe, süolouzü neletao-a lou vah sü soukha-o. Puletao nou vah souyu zhohabo teitei hai, rei dapolao vanou buyu teidei tao hinou veo vei ki-kha khakhai tiyu hinou thasho-a peilai.

⁹Soulou shiyu veishi — chode, lacho ae zhoatu moa nghitu, southou, tai, rashidzü ae oliv theadzü haitao teitei hai, Jerusalem hi pove Ramai ye meidei-a sheelare donou napao maitao nou teithe-teithe vei darkayu veishi hai peilai.

¹⁰Sübüa panou puletaoye rakiva buyu Ramai jüpa hinou posheela loua veo alia venah maitao hrühmai sholoure donou veachi paoa khopeilai.

¹¹Süli baimoa Enou kharochi peipuwe, maita linoua chi haitao hai züba louzü, puh ki hisü nou kitai ali daozhou loua puhye khükhaiwulai, alia puh kisü panou houhrao khaiyu buh souwulai.

¹²Veo mai taliyuma, mai tyahrü tarali yuma kharochi haitao zümoa Rathoki haina soushi-a buyu khemai hisü, Jerusalem hinou puh zhih kua panou tholai tea dopalouyu Ramaie panou souha theo. Kharochi haitao hai, Darius, Enou peiwe, peikhaitiyu chi haitao lenoua zülo.”

¹³Süthaisü teidei khowo Tattenai, Shethar-bozenai alia puh haiye koa vah souyu mai hrülai nou veo Darius nou kharochi peiyu na thaifüa vah sü soutou peie.

¹⁴Rachi paolawo Haggai alia Zekhariah nou süpeiyu na thaifüa Rathoki sü Jehudimai hi süthai-apei maitao nou veihshoa soutare. Puletao nou Parsia hi veo Sairas, Darius ae Artaxerxes nou kharochi peiyu thaifüa Rathoki sü souche loure.

¹⁵Rathoki hai Darius veo nou vekou louyu po arou navei Roupa (Adar) khouh khoukha asü zhou soucheloue.

¹⁶Süthaisü Israel maitao, napao maitao, Levi maitao, alia ngaoba mainou nüloua dakhai veyu mai hrülai nou asashoa Rathoki sü Ramai bah hi posheela peie.

¹⁷Puletao nou Ramai Ki haina posheelayu phaki, chode kaihli, lachode kaih hai, zhaotu kaihdai, alia Israel mai mah donou tea nghitu kiahai hai Israel mai khü buyu na zhoubüa Ramai hi posheela peie.

¹⁸Moses vei larübvü hi rüthou khaitiyu thaifüa, Jerusalem hi Ramai vah soure donou napao maitao alia Levi maitaoye meme soua vah dadepeie.

¹⁹Mainou nülouyu hinou dakhai velouyu maitao nou tachopa louyu nüh hai khouh araina khoukha kiadai zhou nüh nüe.

²⁰Napao maitao alia Levi mai hrülai nou süzhou lahlaye soushee loue. Südonou puletao nou Tachopa nüh hi mainou nüpotayu hinou khaida velouyu maitao donou, puletao thaihou jürai maitao donou alia lah puletaoye donou zhaotu hai dathae.

²¹Haitao hai mainou nülou hinou khaida velouyu Israel maitao ae rah shiye thoyu hinou thaowua MAPAO, Israel maivei Ramai ye thota bailaire touyu mai hrülai nou touzhoe.

²²Puletao nou teithe anai hai khei thoumoyu raokhao tou-a asashoa nüh nüe. Puletao nou asa shore, daiolouzü Assaria hi veo-a Ramai nou le souda peia Rathoki souyu hi koa lou soukha peiyu vanou.