Read Poumei Naga EZRA 8 Bible Online

EZRA 8 - Poumei Naga bible

EZRA 8

¹Artaxerxes nou veo soua buyu ki khü haitao hai Ezraye koa Jerusalem hi dakhai veloue:

²Phinehas tyaosholea hi Gershom; Ithamar vei tyaonah hinou Daniel; David tyaonah hi Hattush; Shekaniah vei tyao nahtao; Parosh sholea hi Zekhariah, puhye koa louyu mai 150 zhih rüthouloue. Pahath-moab tyao nahtao hi, Zekhariah nahpoutu Eliehoenai khaiveloue, puhye koa poutumai nou mai 200 velou loue. Zattu tyaomaitao hi Jahaziel nahpoutu Shekaniah ae puhye koa velouyu nou mai 300. Adin vei sholea hinou, Jonathan nahpoutu Ebed, puhye koa velouyu nou mai 50. Elam vei tyaonah tao hinou Athaliah nahpoutu Jeshaiah, puhye koa salouyu nou mai 70. Shephatiah sholea hi, Maikhail nahpoutu Zebadiah puh loua nou mai 80 velou loue. Joab vei tyao nahtao hinou Jehiel nahpoutu Obadiah, alia puhye koa nou mai 218; Bani tyaonahtao hinou Josiphiah nahpoutu Shelomith, alia puhye koa velouyu hai mai 160. Bebai tyaonahtao hinou Bebai nahpoutu Zekhariah alia puhye salouyu maitao hai mai 28. Azgad vei sholea hinou, Hakkatan nahpoutu Johanan ae puhye koa dakhai velo(...)

¹⁵Ahava nuh hilova kükouyu rei phi hinou maikhe maitaoye save jüloua teithe asü sühinou koa bue. Eh buh sühinou maisou alia napao maitao hi zhuyu phaki, Levi vei khü hinou veyu mai ali-a hare.

¹⁶Südonou Enou Eliezer, Ariel, Shemaiah, Elnathan, Jarib, Elnathan, Nathan, Zekhariah ae Meshullam, süthai-apeimai haitao, alia Joiarib ae Elnathan, dou-apeimai haitaoe.

¹⁷Enou puletaoye sü Easiphia hi süthai-apeio Iddo teanou kuyu na hisü seitae, daiolouzü puhye panou Rathoki hi vah soupeire maiye seive peire donoue.

¹⁸Ramai nou zhuvea peiyu donou, puletao nou vah soulou süyu mai haitaoye save-e: Sherebiah teanou kuyu, puh hai Levi nahpoutu Mahli nahpoutu-e, puhnou puhnah maitao alia tyaomai tao mai 18 hai save-e.

¹⁹Süpeinou puhnou Merari vei khü hinou Hashabiah ae Jeshaiah tyarai mai 20 hai save-e.

²⁰Süthai-a David ae puh khü hinou peikho maitao nou panou Levi maiye soukha-a Rathoki hi vah soure donou dopa khaitouyu vah soumai 220 hai seive peie. Puletao mai teitei zhih hai rükhai toue.

²¹Süthaisü, Ahava rei hinou Etao mai hrülainou Ramai hi nakouloua veachi paolai tiyu hai shapa peie, daiolouzü Etao nou tayu veidu nasü veih-a panou buhisü vete loure donoue.

²²Daisounou tiyuo Enou veo hisü reih soumai ae reih vei rhei pfüyu maiye peio tea kho haore, daiolouzü Enou veo hisü haibüa paowure, “Eh Ramaio Puhye louche-a buyu maiye sü vupei baiwe, ana Puh ye louche moa buyu mai hisü Puh vei rarou-lekha nasü bue.”

²³Süvanou Etao nou lüh-a Ramai hi veachi paoyu nasü Puhnou Etao vei akho sü keinou peie.

²⁴Süthaisü Enou tsüsoua buyu napao mai kiahai sü dokupa khailou-e. Sütao hai thaomai-e tilouzü Sherabiah, Hashabiah ae puhai tyarai hinou mai kirouhai dopaloue.

²⁵Enou puletao hisü veo alia puhye sa-a chipha peiyu mai, adumai tao ae Israel mai tao nou Rathoki soure donou shahu, sana alia paikhao peikhai touyu teitei hai napao maitao hisü sühdou loua nou peie.

²⁶Enou süh douloua puletao hi peiyu hai: shahu — matric tons 22, shahu nou souyu paikhao tao 100 — sühcho 70, sana — sühcho 3,400. Sana nou souyu khaoshao 20 — sühcho 8.4 veishoyu hunou souyu khao 2, haihai sana muh raie.

²⁸Enou puletao hisü paoe, “Neletao hai MAPAO hinou sheere alia na haitao-a sou sheewure. Shahu ae sana haitao hai neletao puopaoh Ramai hisü posheela peiwure.

²⁹Südonou na haitao hai MAPAO ki hi pove napao mai, Levi mai alia Israel maiye süthai-apei mai nghoujü hi pove sühdou-a zhumo jühi soutaosoua kholouo.”

³⁰Süthaisü napao maitao alia Levi maitao nou shahu, sana ae paikhaotao sü Jerusalem Rathoki hi pove thoure donou süh douloure.

³¹Etao nou Jerusalem hi dakhai tare donou khouh ngaorai kaiyu khoukha kiahai zhousü Ahava rei nahai thaowua tapae. Ramai nou Etaoye sü ngaobamai hinou alia lududo hinou soushire veishi hai khopeie ae vupa peie.

³²Etao nou Jerusalem hi velou loua, sühinou teithe asü shoe.

³³Teithe adai zhou hai Rathoki hi louloua shahu, sana alia paikhao taosü süh douloua Uriah nahpoutu Meremoth napao hi peie, sühisü Phinehas nahpoutu Eleazar alia Levi mai ahai, Jeshua nahpoutu Jozabad ae Binui nahpoutu Noadiah haitao-a bue.

³⁴Na teitei hai doutou touloua alia chotou loua larü hi rüthou khaiwure.

³⁵Mainou nülouyu hinou khaida veyu mai hrülai nou Israel maivei Ramai hisü posheelayu khesü pove meidei-a thoue. Puletao nou Israel mai hrülai donou chode 12, zhaotu 96 alia nghitu 77 pove Ramai ye posheela-e. Süthai-a puletao nou mah sousheere donou nghitu 12 posheela-e. Hrikhaona haitao teitei hai Ramai hi meidei-a posheela peie.

³⁶Puletao nou veo nou peiyu larü nasü poloua rei dapolo nou buyu teinghi loulova teidei khomai alia adumaitao hisü peie, homaitao-a Ramai vei ki nasü soukha-e.