Read Poumei Naga NEHEMIAH 2 Bible Online

NEHEMIAH 2 - Poumei Naga bible

NEHEMIAH 2

¹Artaxerxes nou vekou louyu po kai phayu phaki, Nishan khouh (khouh adai thaisü), Enou veo vei zhaoh pai sü puh hi polou peie. Puhnou Eye raichoki leveayu sü ngaokhai toumo hie,

²südonou puhnou ahi chinoue, “Ne daisounou levea shoge? Ne sü sounou soumoro, ne hai vamo shoyu hali buyu pha-e.” Süthaisü E hai cho hare,

³ae puh hi haibüa chila peie, “Veoye sü panou hrüsho hrülou theo! Avei paipaoh maitaoye daovuh khaitouyu nuhdu nasü mainou soushiwua mei deilaiyu thaisü E kabüa lesa-a nou bulou khailaige?”

⁴Veo nou ahi paoe, “E neye donou dai soupeiyu ne jüpawe?” Enou rakiva buyu Ramai hi veachi paoe,

⁵ae veo hisü haibüa paoe, “Veo nou Eye zhuvea peilouzü, alia avei akho nasü aetou peilai toulouzü, Eye panou avei paipaoh maitaoye daovuh khaitouyu nuhdu, Judah vei teidei hisü tawo, sübüa soushi khaitouyu nuhdu nasü panou soushu dakhailo.”

⁶Süphaki veopfüpai hai veoye koa puh pe hinou bue, ae puhai nou avei akho nasü aetou peie. Puhnou ahi teile kasho loulaige ae Eye duki puh hi dakhai velai-e tea nou noue, ae Enou sükhesü puh hi chila peie.

⁷Süthaisü Enou veo hi paoe, “Veo nou aetou peilouzü, Euphratis rei vei teinghi loulova nou buyu teidei khowo hi seiko ali rüloua Eye peio, sübüa Judah teidei hi vete loumo koute Eye panou tawo.

⁸Veo vei vaohro khowo Asaph hia seiko ali rüpeia Eye panou Rathoki vei rokhubomü, nuhdu vei kivo ae Enou bure ki sü panou souloure donou süü peio tea Enou kho-e.” Enou khoyu hai khesü veo nou aetou peie, daiolouzü Ramai nou Eye kozho peie.

⁹Süthaisü veo nou reihmai peikhoyu maitaoli ae rhei pfüyu reihmai taoli hai Eye koa panou sata peie, ae Enou Euphratis Rei teinghi loulova buyu teidei hisü taho veo vei seiko khesü nuh teidei khoyu maitao hisü peiwure.

¹⁰Ana Beth Horon nuh hinou veyu Sanballat, ae Ammon nuh hinou peikhowo soua buyu Tobiath nou Israel maiye donou haveih soupeire mai ali vere touyu choulou khaie puhai sü vamo sholoure.

¹¹Enou Jerusalem hisü velou loure, ae teithe asü koute hai

¹²Ramai nou Eye panou Jerusalem donou vah soure donou süpeiyu nasü mai ali koute hia paongao moe. Süthaisü khei toutsü hinou Enou kushuloua nuhdu nasü mai taoli saloua tasühao zhuta-e. Etao sa-a tayu kikhaorü hai Enou pfülaiyu rheisüh nalikhei baie.

¹³Enou khei teile hinou nuhdu nasü teinghi loulo buyu Deikho vei Rokhubomü hilo vanou khekou Khao-nghou (Dragon) vei Dzüla sü tacho poa Nghoushi vei Rokhubomü hisü takoue. Enou sübüa nuhdu vei kivo pepo tayu ae mei deilaiyu rokhubomü khesü zhuta-e.

¹⁴Süthaisü Enou nuhdu vei teinghi palova nou reilova buyu Dzüla vei Rokhubomü ae Veo vei Dzükhao hisü takhe-e. Ana Enou pfüa tayu rheisüh nasü kivo vei pepo kouyu chuhtao nou ludu sü khaloua ludu phouhare.

¹⁵Sübüa Enou rheisüh sü pfüpoa kivo khesü Kidron Deikho hi koute hai zhupoa nou kou-e. Süthaisü Enou tayu ludu hinou dakhai poa nuhdu hisü Deikho vei Rokhubomü hi veloue.

¹⁶Enou daiki vewe, moa Enou dai souwe touyu hai nuh teidei khoyu mai ali-a panou sümoe, ae Enou avei thaihou-jürai Jihudimaitao, napao maitao, peikhoyu maitao ae vah soure maitao hia paongao moe.

¹⁷Ana chuo Enou puletao hisü paoe, “Neletao-a zhukhaio, Etao hai daizhou koute vea-a nou bue touyu, daiolouzü Jerusalem nuhdu hai soushi khaiwure ae rokhubomü khesü mei deilaiwure. Khe, Etao koa nou nuhdu vei kivo sü soushu dakhai loulai, sübüa Etao nou hraongu ngao-a buyu nasü souha laikhe.”

¹⁸Enou puletao hisü Ramai nou Eye kabüa kozho peiwe ae soukha peiwe touyu khesü paongao peie, alia veo nou kabüa ahi chi paopei khaitoue touyu khesü paongao peie. Puletao nou haibüa chila peie, “Etao tashuloua nou soushupu talai khe!” Puletao nou vah sü soutare donou souda loure.

¹⁹Ana Sanballat, Tobiah, ae Arab puona Geshem puletao nou Etao nou vah souta laire tea tsüchoda-a buyu nasü sülou khaie, puletao nou Etaoye konüa haibüa paoe, “Neletao nou vah soulai tea tsücho-a buyu hai nasü daige? Neletao hai veo pei hi aetou moa duta laire tea budou?”

²⁰Enou haibüa chila peie, “Rakiva buyu Ramai nou Etaoye veilouyu nasü peilai. Etao hai puhvei kilai maitao-e, ae Etao nou vah sü soushu talaire. Ana neletaoye donou Jerusalem hinou ngaozü na ali-a ha-e, moa neletao nou talou bei soure zü ali-a ha-e.”