Read Poumei Naga NEHEMIAH 3 Bible Online

NEHEMIAH 3 - Poumei Naga bible

NEHEMIAH 3

¹Nuhdu vei kivo nasü haibüa soushupu loue. Napao Peichana Eliashib ae puh thaihou jürai napao maitao nou Zhaotu Rokhubomü nasü soushu loure. Puletao nou sünasü pola shuloua sathou loure. Puletao nou kivo hai-a Reihkhaobu Kaih koute ae Hananel Reihkhaobu koute hai souloua sathou loure.

²Jeriko hi maitao nou soushotao hai soushu peie. Süthai hai Imri nahpoutu Zakkur nou soushu peie.

³Hassenaak puonah maitao nou Kha Rokhubomü nasü soupeie. Puletao nou kizhah sü thouloua rokhubomü nasü soushu loure, ae rokhubomü khure donou kityasüü thouloure.

⁴Puletao vei thai hai Hakkoz vei tyao, Uriah nahpoutu Meremoth nou soupeie. Meshezabel vei tyao, Berekhiah nahpoutu Meshullam nou süna thailao hai soupeie. Baana nahpoutu Zadok nou süna thailao hai soupeie.

⁵Tekoa hi nuh maitao nou kivo sütao thai hai soupeie, ana nuhdu sühi buyu matsü maitaoli hai süthaisa-a vah souyu maitao nou vahle peiyu khesü soupei bare.

⁶Paseah nahpoutu Joiada alia Besodeiah nahpoutu Meshullam nou Rokhubomü Akuna hai soushu dakhai peie. Puletao nou kizha sü thouloua nou rokhubomü nasü polawure, ae kityayu süü sü southou peie.

⁷Sünavei thailo hai Gibeon puona Melatiah, Meromoth puona Jadon, alia Gibeon hi maitao ae Mizpah nou Euphratis rei vei teinghi loulo buyu Teidei Khowo vei ki hi koute hai soupeie.

⁸Sana kuyu Harhaiah nahpoutu Uzziel nou kivo süthaitao hai soupeie. Poukai nüvei souyu Hananiah nou süna thailo hinou poa Kivo Dushoyu hi koute hai soupeie.

⁹Puletao masho hai Jerusalem dali khowo Hur nahpoutu Rephaiah nou soushu peie.

¹⁰Süthai hai Harumaph nahpoutu Jedaiah nou puh vei ki nghia buyu kivotao hai soushu peie. Hashabneiah nahpoutu Hattush nou süthaitao hai soushu peie.

¹¹Harim nahpoutu Malkhijah ae Pahath Moab nahpoutu Hashub nou kivo süthaitao hai ae Thaobvü vei Reihkhaobu nasü soupeie.

¹²Süthai Jerusalem nuhdu dalilo khowo Hallohesh nahpoutu Shallum nou kivo sü soupeie. Puhvei nah naotu maitao-a vah souyu hisü babou zhopeie.

¹³Hanua alia Zanoah nuhdu hinou hrüyu maitao nou Deikho hi Rokhubomü nasü soupeie. Puletao nou rokhubomü nasü tyare donou kityayu süü sü southou peire, alia kivo hai mitar 450 phali, Nghouhrao vei Rokhubomü hi koute hai soupeie.

¹⁴Beth Hakherem nuh teidei khowo Rekhab nahpoutu Malkhijah nou Nghouhrao vei Rokhubomü nasü soupeie. Puhnou hai nasü soushee puloua kityasüü ae ki zhaoyu süü hai thouloure.

¹⁵Mizpah nuh teidei khowo Kolhozeh nahpoutu Shallum nou Dzünghou vei Rokhubomü nasü soushu peie. Puhnou romü nasü souloua polashu peiwure, ae kityasüü ae ki zhaoyu süü sü thouloue. Puhnou kivo nasü Shelah vei Dzükhao hinou poa veo vei kipei hi koute, David vei Nuhdu hi talouyu phiheadou koute hai soupeie.

¹⁶Süthai hai Bethzur nuh teidei khowo Azbuk nahpoutu Nehemiah nou kivo hai David vei khüh hi koute, mainou zaibvü hekhai touyu hi, soureih souyu mai ki hi koute hai soupeie.

¹⁷Souche loumoa buyu kivo taoli hai Levi maitao nou soupeie: Bani nahpoutu Rohum nou kivo süthaitao hai soupeie. Süthai hai Keilah nuh teidei khowo Hashabiah nou puhvei teidei thaosoua kivotao hai soupeie.

¹⁸Keilah nuh teidei dalilo khowo Henadad nahpoutu Bavvai nou kivo süthaitao hai soushu peie.

¹⁹Puletao nou soukouyu kivo thailao hai Mizpah teidei khowo Jeshua nahpoutu Ezer nou reihna khaiyu ki nghoujütao hi soupeie, puhnou sühinou poa kivo khitayu hi koute hai soupeie.

²⁰Süna thaitao hai Zabbai nahpoutu Baruk nou Napao Peichana Eliashib ki hi talouyu ludu hi koute hai soupeie.

²¹Süsho hai Hakkoz tyao, Uriah nahpoutu Meremoth nou Eliashib vei ki akhai hi koute hai soupeie.

²²Napao maitao nou kivo haitao hai soupeie: Jerusalem nuhdu pehao hinou hrüyu napao maitao nou kivo süthaitao hai soupeie.

²³Süthai hai Benjamin ae Hasshub nou puhai kipa hi buyu kivotao hai soupeie; Ananiah vei tyao, Masseiah nahpoutu Azariah nou puhvei kipa buyu kivotao hai soupeie.

²⁴Azariah vei ki hinou poa kivo kainghou hi koute hai Henadad nahpoutu Binnui nou soupeie.

²⁵Uzai nahpoutu Palal nou kivo kainghou hinou poa chikuyu ki hi reihkhaomai nou buyu hi nghia buyu veofühao vei reihkhaobu koute hai soupeie. Süthai hai Parosh nahpoutu Pedaiah nou Dzü vei Rokhubomü nghia buyu Rathoki vei reihkhaobu hi koute hai soupeie. (Haina hai nuhdu hi Ophel tea kuyu buh, rathoki souyu mainou hrüa nou bue.)

²⁷Süthai hai Tekoa hi maitao nou kivo hai Rathoki vei reihkhaobu pah alilo vatha buyu hinou poa Ophel tea kuyu buh hi koute hai soupeie.

²⁸Süthai hai napao mai me ali nou lahkuku vei kipa hi buyu kivotao hinou reilova buyu Rhei Rokhubomü hi koute hai soupeie.

²⁹Süshokou Immer nahpoutu Zadok nou puhvei kipatsü buyu kivotao hai soupeie. Süthaitao hai Shekaniah nahpoutu Shemaiah, Teinghi palova Rokhubomü khopu, puhnou soupeie.

³⁰Süthai hai Shelemiah nahpoutu Hananiah ae Zalaph nahpoutu arou chena Hanun nou kivo kukhe nahai soupeie. Süthai hai Berekhiah nahpoutu Meshullam nou puhvei kijü buyu kivotao hai soupeie.

³¹Süthai hai sana kuyu Malkhijah nou kivo hai rathoki souyu mai ae huha souyu mainou buyu ki hi koute, süna hai Miphkad Rokhubomü, teinghi palova nou reilo buyu reihkhao maitao nou buyu kide peitao hi kivo vei kainghou hi koute hai soupeie.

³²Sana kuyu maitao ae huha souyu maitao nou kivo akhaitao hai soupeie, sütao hai kivo kainghou hi buyu kide hinou poa Zhaotu vei Rokhubomü hi koute-e.